Maud rọ dia France wian vwẹ isikuru ọvo rọ da vwẹrote emọ rẹ oma rayen she chọ. O krinọ-ọ na, e yono emọ rẹ iklasi ọvo kpahen ohwekufia rọ vwomaphia vwẹ uwodi ri Nazi. Ihwo rehẹ uwodi na kuẹ iwun re ko ẹbẹre emwa phiyọ. Ikọlọ rẹ ẹbẹre emwa na vẹ obo re kpirhin ayen wan yen e vwo vughe oboresorọ e vwo mu ohwo vuọvo phiyọ uwodi na.

 Vwọ kpahen ẹbẹre emwa ri itrayango ri pọpo rẹ ihwo evo vwẹ uwodi na kuẹ phiyọ, oyono na da ta: “Mi rorori nẹ ayen eshare ri duẹ eshare.” Iklasi na vwo kuphiyọ nu, Maud de bru oyono na ra re dje kẹ nẹ ẹbẹre emwa ri itrayango ri pọpo yen e vwo vughe Iseri ri Jihova vwẹ usuon ri Nazi. a Ọ da nọ sẹ ọ sa reyọ ẹbe ri vwo evuẹ ri shekpahen ota na rhe. Oyono na da rhọnvwe kẹ, ọ da je vuẹ nẹ ọ vwẹ evuẹ na phia kẹ emọ rẹ iklasi na.

 Ra vwọ ta ota kpahen uyovwinrota vuọvo yena vwẹ iklasi ọfa, oyono ọfa de dje ihoho rẹ ẹbẹre emwa sansan re ko phiyọ iwun rẹ ihwo re mu phiyọ uwodi na vwọ kẹ emọ na. Ihoho na djere gbagba nẹ itrayango ri pọpo yen e vwo vughe Iseri ri Jihova rehẹ evunrẹ uwodi na. Vwẹ okuphiyọ rẹ uyono na, Maud de ji dje ẹbe evo ri shekpahen ota na kẹ oyono na. Oyono na da reyọ ayen, o de ji vwo ọrhuẹrẹphiyotọ rẹ Maud vwọ vwẹ ovuẹ na phia kẹ emọ na.

 Maud muegbe rẹ ota rẹ ibrẹro 15 vwọ kẹ iklasi rẹsosuọ na. Ẹkẹvuọvo, o vwo te iklasi na, oyono na da ta kẹ: “Wọ sa vwẹ unọke ọvo vwọ ta ota kẹ ayen.” Maud da tuọnphiyọ vẹ ividio ro dje oborẹ Iseri ri Jihova rioja wan vwẹ otọ rẹ usuon ri Nazi. E vwo ni ividio na te asan ra da tanẹ e mu emọ 800 rẹ Iseri ri Jihova mie esẹ vẹ ini rayen, Maud da daji. O de se oborẹ emo erha usun rayen rhiẹromrẹ. Ividio na vwo re, Maud de kuophiyọ vẹ isese rẹ ileta rẹ Gerhard Steinacher rọhẹ ẹgbukpe 19 ro nẹ Austria rhe siri. O siro vwo rhe ọsẹ vẹ oni rọyen inọke evo tavwen isodje ri Nazi ki hwe vwẹ 1940. b

 Maud je vwẹ ọkpọ rẹ ovuẹ yena phia vwẹ iklasi rivẹ na. Fikirẹ uduefiogbere ri Maud, nẹ ọke yena yanran iyono ivẹ na ki djunute Iseri ri Jihova ọke rẹ ayen de yono kpahen ohwekufia rọ vwomaphia vwẹ uwodi ri Nazi.