Zarina vwo bromaphiyame kerẹ ọvo usun rẹ Iseri ri Jihova nu, ọ da kua nẹ Russia kpo otorere rọyen vwẹ Central Asia vẹ ẹwẹn ro vwo yono emetẹ rọyen ivẹ kpahen Jihova. Kidie nẹ o vwo igho-o, ko nene ọse vẹ oni rọyen kugbe oniọvo rọyen rọ rọvwọnre dia uvun ọvo. Ọse vẹ oni rọyen da jurhi kẹ nẹ o rhe yono emọ rọyen kpahen Baibol na ọfa-a. Ayen da je vuẹ emetẹ rọyen nẹ ayen nene oni rayen ta ota kpahen Baibol na-a.

 Zarina ko roro kpahen obo ro se vwo yono emetẹ rọyen kpahen Jihova. (Isẹ 1:8) Ọtiọyena kọ yare odjekẹ vẹ aghwanre mie Jihova womarẹ ẹrhovwo ọkieje. Zarina de ru nene oyare rọyen ro vwo muẹ emetẹ rọyen vwọ yan oyan ogrongron kọke kọke, rere o se vwo yono ayen kpahen igbevwunu rẹ emama vwẹ idjerhe. Oyan nana chọn emetẹ rọyen uko vwo vwo owenvwe rẹ ayen vwọ riẹn kpahen ọmemama na.

 Ọtiọyena, Zarina kọ guọnọ idjerhe ro se vwo yono ayen kpobarophiyọ womarẹ ọbe re se What Does the Bible Really Teach? a Ko siẹ ẹkoreta sansan vẹ enọ rayen phiyọ ẹmẹbe. O ji siẹ eta efa ba rere emetẹ rọyen se vwo vwo ẹruọ rẹ ovuẹ na. Ọ me chọrọ phiyọ obotọ rẹ imashini ra vwọ fọnrhọ emwa rọhẹ uvun na. Ọke rẹ emetẹ rọyen dahẹ uvun na, ayen mi yoro ọbe na phia. Ayen de se nu ayen mi si ẹkpahọnphiyọ rayen phiyotọ.

 Ona yena rẹ Zarina vwo ruiruo na, chọn rọ uko se vwo yono emetẹ rọyen iyovwinreta ivẹ vwo nẹ ọbe ri Bible Teach rhe tavwen ayen ke kua kpo asan ọfa ra dia. Etiyin rẹ ayen kua ra na, kọyen Zarina se vwo yono emetẹ rọyen ababọ rẹ ẹvwọsuọ ro nẹ obọ rẹ ihwo rẹ orua cha. Vwẹ October 2016, emete rọyen ivẹ na de bromaphiyame vẹ omavwerhovwẹn nẹ oni rayen sa vwẹ aghẹnghẹn vẹ aghwanre vwo yono ayen kpahen Jihova.