Rachel rọ dia Dominican Republic enẹna da ta: “E vwiẹ vwẹ vwẹ orua rọ ga Jihova. Ọ da vwẹ nẹ ọke me vwọ hẹ ẹgbukpe ighwrẹn, ọsẹ mẹ da dobọ ẹga ri Jihova ji, kọ reyọ vwọso uyota na. Kọ rhe nẹrhẹ ọ bẹn kẹ vwẹ mi vwo vwobọ vwẹ ẹga rẹ uyota na. Kerẹ udje, o ve kẹ vwẹ nẹ ọ cha kẹ vwẹ erọnvwọn evo me da dobọ rẹ ẹga ri Jihova ji​—erọnvwọn kerẹ ifonu, oyan kpo Disneyland, yẹrẹ ikadi rẹ ATM rọyen! Ọkievo, o hwe vwe rere me vwọ dobọ rẹ ẹga ri Jihova ji. Ọ me ta nẹ me rha sa ta ota yẹrẹ ya-an, mi rhe che se kpo emẹvwa-a. Ọyena sa dobọ mẹ ji-i, kidie mi vwo owenvwe mi vwo kpo emẹvwa.

 “Ọsẹ mẹ davwẹngba rere o vwo juvwe ehwe vwẹ obaro rẹ oni mẹ. Ọ tare nẹ ọ cha wan oni mẹ oma me da vuẹ kpahen ehwe na. O guẹn riase vwọ kpahen era vẹ eka rehẹ oma mẹ na, rọ vwọ ta nẹ uyono ri karate rọ gba vwẹ yono na yen so omaẹwan na.

 “Kidie nẹ mẹvwẹ omotete oshọ rẹ ọsẹ mẹ ji mu vwe mamọ, me rha sa vuẹ Oni mẹ vwọ kpahen obo re phia-a. Ọtiọyena, Jihova kọyen me vuẹ. Me yan sherẹ ro aghwa rọhẹ obuko rẹ uwevwin rẹ avwanre vwẹ Maryland, U.S.A. O vwo urhe ri oak ọvo rọ pha yoyovwin ri mi yerẹn kpenu vwẹ aghwa na, etiyin kọyen me da ta ota kẹ Jihova. Me vuẹ kpahen oborẹ oma ru vwe kugbe oborẹ mi che ru kẹ siẹrẹ mi de te omiragua​—manẹ kọ sa sẹro arhọ mẹ te ọke yena. Me je vuẹ kpahen oborẹ mi che ru vwẹ akpọ kpokpọ rọ cha na, orua ri mi che vwo, kugbe ufuoma vẹ aghọghọ ro che rhe vwe ababọ rẹ oshọ vẹ emiavwe.

 “Ọkieje yen me vwọ mrẹ ukẹcha vẹ ọbọngan ri Jihova ọke rẹ ọsẹ mẹ vwọ davwẹngba rere ọ vwọ dobọ rẹ ẹga me vwọ kẹ Jihova ji womarẹ ọ vwọ jẹ udi kẹ vwẹ yẹrẹ hwe vwe. Jihova bọn vwẹ gan je cha vwẹ uko vwọ sẹro evun-ẹfuọn mẹ.

 “Mi bromaphiyame ọke me vwọ hẹ ẹgbukpe ihwe, me da ton iruo rẹ ọkabaro phiyọ ẹgbukpe ivẹ vwọ wan nu. Ẹsosuọ, ọsẹ mẹ riẹn vwọ kpahen owọẹjẹ ivẹ mẹ na-a. Ọ vwọ riẹn kpahọn obaro obọ, o de dje ọhwa mẹ guọghọ.

 “Ihwo evo vuẹ vwẹ nẹ me boba nọ vwọ kẹ iruo rẹ ọkobaro, ayen je rọ ẹnwan nẹ me riẹn ọghanrovwẹ rẹ orhienbro mẹ na-a. Me mrẹ ighene buebun re dia Iseri ri Jihova vwẹ ekogho mẹ ri ruẹ yovwẹn vwẹ ẹga ri Jihova-a. Ayen mu ẹwẹn kpahen akpọẹriọ vẹ ehaẹha. Oborẹ ayen ruẹ na họhọ obo ri che siurhurhu! Ọkievo me guọnọ ru oborẹ ayen ruẹ na. Ki mi roro, ‘Me da ra dobọ rẹ aghwoghwo ji je riakpọ kerẹ ighene efa me vẹ ayen gba edje vwo?’ Ẹkẹvuọvo, siẹrẹ oma de ru vwe ọtiọyen, ke me ta ota vwọ kẹ Jihova kpahọn.

 “Me vwọ hẹ omarẹ ẹgbukpe 15, ikọmpini ọvo re de dje emwa de durhie uvwe nẹ me rhe wian kẹ ayen. Ayen vuẹ vwẹ nẹ ayen cha hwa okposa kẹ vwẹ rere mi nene ayen wian vwẹ Milan, Italy. Ayen vwọ vuẹ vwẹ nẹ me sa dia ohwo ro dje emwa phia vwẹ imagazini ji ku ayen phiyọ kẹ ihwo mrẹ vwẹ afieha, ọ da nẹrhẹ oma vwerhen ovwẹ. Me dia ọkobaro joma te ẹgbukpe erha re, mi de roro, ‘Iruo nana sa kẹ vwẹ igho obuebun je nẹrhẹ me dia ọkobaro ọke grongron!’ Kidie nẹ ọsẹ mẹ yanjẹ avwanre vwo, ki mi roro, igho na sa vwẹ ukẹcha kẹ vwẹ vwọ vwẹrote oni mẹ.

 “Me nẹrhovwo kpahen ẹdia na. Mi de nene oni mẹ rọ ga kerẹ ọkobaro ikpe buebun re ta ota kpahọn, ọtiọyen ji te ọkpako ọvo re muọghọ kẹ. Kirobo rẹ mi ji ruẹ jovwo, me da ra nẹrhovwo vwẹ urhe mẹ na. Jihova kpahenphiyọ ẹrhovwo mẹ rọ vwọ reyọ ọkpako ọvo vwo dje ẹkpo ri Baibol ọvo kẹ vwẹ. Ọyehẹ Aghwoghwo 5:​4, rọ tare nẹ: ‘Wo de ve ive kẹ Ọghẹnẹ, wo gbe eghẹrẹ wọ ke hwa-a.’ Mi veri nẹ me cha ga Jihova vọnvọn, jẹ oshọ mu vwe nẹ iruo yena se djobọte oyerinkugbe mẹ vẹ Jihova. Ọtiọyena, me da sen iruo na.

 “Dede nẹ erọnvwọn nana eje phiare vwẹ ọkiemọ mẹ, mi ghwuru-u! Asaọkiephana mẹvwẹ vẹ ọshare mẹ, Jaser, kugbe ọmọshare avwanre, Connor, rọhẹ egbukpe irhirin yeren akpọ rẹ omavwerhovwẹn enẹna. Jaser ọkpako, Connor ọyen oghwoghwota ro ji bromaphiyame-e. Me hẹ ẹga ọkieje joma te ẹgbukpe 27 re.

 “Ọkieje yen mi vwo roro kpahen otaẹtakuẹgbe ogrongron rẹ mẹ vẹ Jihova vwori vwẹ urhe ri oak vwevunrẹ aghwa rọhẹ obuko rẹ uwevwin rẹ avwanre na. Me rẹ Jihova nẹ ọ cha vwẹ uko, o de ru ọtiọyen vwẹ idjerhe rẹ oghẹresan. Ọ bọn vwẹ gan, bru vwẹ uche je sẹro mẹ. Vwẹ akpeyeren mẹ eje, Jihova dje kẹ vwẹ abọ buebun nẹ ọyen omamọ ọsẹ. Oma vwerhen ovwẹ nẹ mi brorhiẹn me vwọ vwẹ udu mẹ eje vwọ ga Jihova. Ọnana yen orhiẹn rẹ aghwanre ro me yovwin ri mi bruru re.”