Ọshare ọvo djẹ nẹ Eritrea rhe Norway vwẹ 2011. Ọke rẹ Iseri ri Jihova vwo ghwoghwo te asan rọ dia, ọ da vuẹ ayen nẹ ọyen mrẹ Iseri ri Jihova evo vwẹ ẹkuotọ rẹ ọyen nu rhe. Ọ tare nẹ ọke rẹ ọyen vwo ruiruo rẹ isodje vwẹ oboyin, Iseri ri Jihova re mu phiyọ uwodi fikirẹ esegbuyota rayen rhọnvwa vwomaba isodje-e, o toro obo ra vwẹ oja re ayen te-e.

 Ukuko na emu ọvo da phia rọ rhe nẹrhẹ e mu ọshare na phiyọ uwodi. Ọ vẹ Iseri ri Jihova erha nana—Paulos Eyasu, Negede Teklemariam, vẹ Isaac Mogos—re mu phiyọ uwodi rhanvwe 1994 fikirẹ esegbuyota rayen keyen gba hẹ uwodi na.

 Rọ vwọ hẹ uwodi na, ọshare na da rhe mrẹvughe nẹ Iseri ri Jihova ruẹ nene oborẹ ayen yono. Ọ mrẹvughe nẹ ayen ihwo rẹ uyota, ayen tobọ ghara emuọre rayen vẹ ihwo efa rehẹ uwodi na. O ji vwo oniso rẹ oborẹ Iseri ri Jihova rehẹ uwodi na yono Baibol kuẹgbe kẹdẹ kẹdẹ, ji durhie ihwo efa nẹ ayen vwomaba ayen. Ọke ra vwọ vuẹ ayen nẹ e che siobọnu ayen siẹrẹ ayen da ghwobọphiyọ ọbe ro djerephia nẹ ayen rha dia Iseri ri Jihova ọfa-a, ayen da sen.

 Oborẹ ọshare nana rhiẹromrẹ na te re ẹwẹn mamọ, ọke rọ vwọ kua kpo Norway o de rhi vwo ẹwẹn rọ vwọ riẹn oboresorọ Iseri ri Jihova vwo vwo esegbuyota ọgangan tiọyen. Iseri ri Jihova vwo ghwoghwo ota te asan rọyen, kpakpata o de nene ayen ton uyono ri Baibol phiyọ, ko ji kpo ẹmẹvwa rayen.

 Vwẹ September 2018 o de bromaphiyame kerẹ ọvo usun rẹ Iseri ri Jihova. Enẹna, ọ reyọ kuphẹn kuphẹn ro rhiephiyọ vwo ghwoghwo ota kẹ ihwo rẹ Eritrea vẹ Sudan re jẹ ephẹrẹ rọyen, o ji jiro kẹ ayen nẹ ayen yono Baibol na ji vwo esegbuyota ọgangan.