A ghere ovwẹ ghwanre vwẹ ẹga ri Fada vwẹ Rochester, New York. Ọsẹ vẹ oni mẹ fan orọnvwe ọke re me vwọ hẹ ẹgbukpe ẹrenren. Ọtiọyena, vwẹ uvwre rẹ udughwrẹn na umu uwevwin rẹ oni mẹ yen me dia, vwẹ oba rẹ udughwrẹn na, ki mi rhe nene ọsẹ mẹ dia vwẹ ekogho rẹ edafe dia. Me vwọ mrẹ obo rẹ oni mẹ davwẹngba te rọ sa vwọ vwẹrote emọ esan, ke me vwẹ ẹro roro kpahen obo re me vwọ dia ọdafe me sa vwọ chọn orua mẹ uko.

 Ọsẹ mẹ guọnọre nẹ mi yerin omamọ rẹ akpọ, ọtiọyena, o de vwo ọrhuẹrẹphiyotọ re me vwọ ra mrẹ isikuru ọvo ra nabọ vughe re de yono obo ra vwẹrote hotẹl. Isikuru na jevwe, me da rhọvwen nẹ me cha ra vẹ ẹwẹn nẹ Ọghẹnẹ yen kpahenphiyọ ẹrhovwo mẹ re me vwọ dia ọdafe rẹ omavwerhan. Mi de yono kpahen obo ra vwẹrote hotel, urhi rẹ ekiẹchuọ kugbe obo ra vwẹrote igho ri kọmpani vwẹ ẹgbukpe iyonri, je me wian vwẹ hotẹl re de phi djogba vwẹ Las Vegas, Nevada.

 Me vwọ hẹ ẹgbukpe 22, mẹvwẹ yen vwẹ ukẹcha kẹ vice prẹsidẹnt ri hotẹl re de phi djogba na. Ihwo ni vwe kerẹ ọdafe rẹ omavwerhan, me ria omamọ rẹ emu je da idi re ma ghanre kparobọ. Igbeyan mẹ re me vẹ ayen gba wian me ta, “Tẹnrovi obo ri suẹn akpọ na​—⁠Igho” Vwẹ ẹro rayen, igho yen kẹ ohwo uvi rẹ omavwerhovwẹn.

 Owian mẹ, ọ re me vwọ vwẹ emu kẹ edafe ride re cha Las Vegas de phi djogba. Dede nẹ ayen feri, jẹ ọhọhọre nẹ omavwerhan aye-en. Oma rha je vwerhan ovwẹ-ẹ. Vwọrẹ uyota, igho mẹ vwo buẹphiyọ yen jẹ ason me ra sa vwerhẹ-ẹn, vwọba ẹwan mẹ je ganphiyọ. Ki mi roro sẹ mi ji yerin. Ofu rẹ obo ri mi yerẹn akpọ wan dje vwe hwe, me da nọ Ọghẹnẹ vwẹ ẹrhovwo, “Tivọ me da mrẹ uvi rẹ omavwerhovwẹn?

 Vwẹ ọke yena, iniọvo mẹ emetẹ ivẹ re dia Iseri ri Jihova kua rhe Las Vegas. Dede nẹ me rhọvwen reyọ ẹbe raye-en, je me rhọnvwenre nẹ me vẹ ayen se Baibol mẹ kugbe. Vwẹ Biabol mẹ na, a teyen eta ri Jesu phia vẹ kọlọ ọvwavware. Kidie nẹ me rhọvwanphiyọ kemu kemu ri Jesu tare, iniọvo mẹ ke tẹnrovi eta rọyen na. Mẹvwẹ ọvo ji se Baibol na komobọ mẹ.

 Emu buebun ri mi seri gbevwunu dẹn. Kerẹ udje, Jesu tare: “Ọke rẹ ovwan da nẹrhovwo, ovwan ta eta ri fiemu-u kirobo rẹ egiye na ruẹ-ẹ, ayen roro nẹ Ọghẹnẹ ke nyo ayen kidie nẹ ayen ta eta buebun.” (Matiu 6:​7, The New American Bible) Ẹkẹvuọvo, orherẹn ọvo kẹvwẹ ifoto ri Jesu, ọ da vuẹ vwẹ nẹ me da nẹrhovwo kẹ ifoto na je vwanriẹn Our Fathers kugbẹ Hail Marys abọ ihwe, Ọghẹnẹ cha kẹ vwẹ uchunu rẹ igho re me guọnọre eje. Jẹ, siẹrẹ me da vwariẹn ota ọvo abọ buebun, ọ rha dia eta ri fiemu-u ye me ta na? Mi ji se eta ri Jesu nana: “Wo se ohwo ọvuọvo ọsẹ wẹn vwẹ otọrakpọ na-a; Ọsẹ vuọvo wo vwori, ọ hẹ obodjuvwu.” (Matiu 23:​9, NAB) Mi de ji roro, ‘kẹ diesorọ mẹvwẹ vẹ ihwo efa ri kpo ẹga ri Fada vwo se orherẹn rẹ avwanre “Ọsẹ”?

 Ọke rẹ mi vwo se ọbe ri Jems vwẹ Baibol na yen me vwọ nabọ roro kpahen obo ri mi vwẹ akpeyeren mẹ ruẹ. Vwẹ uyovwin rọyen 4, Jems de si: “Wọ riẹnre jovwo nẹ ẹguọnọ re akpọ nana mudiaphiyọ eghren vwọ kẹ Ọghẹnẹ? Ọtiọyena, Kohwo kohwo rọ guọnọ vwo ẹguọnọ rẹ akpọ na jẹ ọ vwẹ oma rọyen vwo ru ọvweghrẹn rẹ Ọghẹnẹ.” (Jems 4:​4, NAB) Owọ ri 17 yen me gbevwunu: “Ohwo rọ riẹn obo ri yoma ro ru, o re ruo-o, ọyen umwuemu.” Mi de se iniovo mẹ vuẹ nẹ me cha dobọ re owian mẹ vwẹ hotẹl re de phi djogba na ji kidie obo re ruẹ vwẹ etiyin nẹrhẹ mi vwobọ vwẹ obo re chọre kerẹ idjogba kugbe urhuru evwo.

 Me guọnọ ru oyerinkugbe mẹ vẹ Ọghẹnẹ kugbe orua mẹ yovwinphiyọ. Mi de brorhiẹn ri mi vwo ru akpeyeren mẹ lọhọ me sa vwọ mrẹ ọke vwo ru ọtiọyen. Ẹkẹvuọvo ewene na lọhọre-e. Kerẹ udje, a da rhe kẹ vwẹ uphẹn re me vwọ dia ohwo rode vwẹ hotẹl na, rọ sa nẹrhẹ osa mẹ kpenu asakuerha vwọ vrẹ obo ri jovwo. Jẹ me vwọ nẹrhovwo kpahen ẹdia na nu, mi de brorhiẹn nẹ me rha guọnọ oka rẹ akpọ ọtiọyen na ọfa-a. Me da dobọ rẹ owian na ji, me da ton emeki ra vwọ lamineti rẹ ẹbe re siẹ edẹ rẹ emu phiyọ vwẹ asan ra da shẹ emu vwẹ amasan ra paki moto phiyọ vwẹ egodo rẹ oni mẹ.

 Dede nẹ Baibol na chọn vwẹ uko vwọ mrẹ obo re ma ghanre vwẹ akpeyeren re, me je rhe rhọvwen kpo emẹvwa rẹ Iseri ri Jihova-a. Iniọvo mẹ da nọ vwẹ oboresorọ ivun rẹ Iseri ri Jihova vwo miovwo uvwe. Me da vuẹ ayen: “Kidie nẹ Ọghẹnẹ rẹ ovwan Jihova hra erua. Ọke vuọvo ri mi vwori re me vẹ orua na vwọ ghwọrọ ọke kugbe yen ọke ri Krismasi kugbe orẹ rẹ ẹdẹ re vwiẹ ohwo, jẹ ovwan ruẹ enana-a.” Oniọvo mẹ ọvo da tuẹn oviẹ phiyọ, ọ da nọ vwẹ: “Die wo ruẹ vwẹ ẹdẹ ri chekọ na eje? Avwanre guọnọ nene uwe ghwọrọ ọke kugbe ọkieje. Ẹkẹvuọvo, wo brorhiẹn wo vwo bru avwanre rhe vwẹ ẹdẹ nana ọvo kidie wo niro nẹ ofori wọ vwọ rhe.” Eta rọyen na te vwe ẹwẹn dẹn, me vẹ ọyen da viẹ kugbe.

 Me rhe vwọ riẹn nẹ Iseri ri Jihova vwo ẹguọnọ rẹ orua rayen mamọ, nẹ ẹro ri mi vwo no ẹsosuọ na chọre, mi de rhi brorhiẹn mi vwo kpo omẹvwa rayen ọvo vwẹ Ọguan Ruvie rọ kẹrẹ ovwẹ. Etiyin me da mrẹ Kevin, ọ nabọ tẹn ona rẹ uyono ri Baibol dẹn. Me vẹ ọyen da ton uyono ri Baibol na phiyọ.

 Kevin vẹ aye rọyen yeren akpọ ri kekpe rere ayen sa vwọ mrẹ ọke vwọ chọn ihwo efa uko vwo vwo ẹruọ ri Baibol na. Igho rẹ ayen mrẹ ji te ayen ghwọrọ vwo kpo Africa kugbe Central America ra vwẹ ukẹcha phia vwẹ iruo rẹ ebanbọn rẹ eghọn rẹ ukoko vwọ kẹ iniọvo na. Oma nabọ vwerhan ayen, ayen ji vwo ẹguọnọ rẹ ohwohwo dẹn. Mi de rhi no nẹ, ‘me guọnọ oka rẹ akpọ tiọyena.’

 Kevin dje ividio ọvo kẹ vwẹ kpahen aghọghọ rọ herọ vwẹ ẹga ri imishọnare, mi de brorhiẹn nẹ ọna yen obo re me guọnọ ru. Emeravwen esan ri mi vwo muomaphiyọ uyono ri Baibol na nu, me de bromaphiyame kerẹ Oseri ri Jihova vwẹ 1995. Ukperẹ me vwọ nokpẹn rẹ efe mie Ọghẹnẹ, me da nẹrhovwo nẹ: ‘Wọ kẹ vwẹ efe eyẹ ọbẹvwẹ-ẹ.’​—Isẹ 30:8.

 Enẹna mi feri dẹn, ọ dia kidie nẹ mi vwo igho buebu-un, ẹkẹvuọvo kidie nẹ me riẹn Ọghẹnẹ. Honduras yen me da mrẹ aye mẹ Nuria, mẹ vẹ ọyen ga kugbe kerẹ  imishọnare vwẹ Panama kugbe Mexico. Eta ri Baibol na ghini uyota: “Ebruba rẹ Ọrovwohwo nẹrhẹ efe cha, ọ vwẹ enuebro ba-a”​—Isẹ 10:22.