Orere rẹ Calgary vwẹ Alberta rọhẹ ẹkuotọ ri Canada yen e de vwiẹ vwẹ. Ọsẹ vẹ oni mẹ fan orọnvwe rayen ọke me vwọ hẹ ọmọboba, mẹ vẹ oni mẹ da kua kpo asan rẹ ọsẹ vẹ oni mẹ rode. Ayen vwo ẹguọnọ mẹ vẹ oni mẹ mamọ; mẹvwẹ jẹ ọmọ rẹ oma vwerhan. Oma je vwerhen ovwẹ te ọke na siẹrẹ me da karophiyọ akpọ rẹ ufuoma ri mi yerin ọke yena.

 Me vwọ hẹ ẹgbukpe ighwrẹn, omavwerhovwẹn yena da va vwẹ abọ ọke rẹ oni mẹ vwọ rhoma rọvwọn ọsẹ mẹ, avwanre da kua kpo St. Louis, Missouri, vwẹ United States. Me da rhe mrẹvughe nẹ ọsẹ mẹ ohwo vẹ ọkon. Kerẹ udje, vwẹ ẹdẹ rẹsosuọ mi vwo nẹ isikuru kpokpọ mẹ te uwevwin, ọsẹ mẹ de nyo nẹ emọ evo hwe vwe, jẹ me nene ayen họnre-e. O de muophu hwe vwe ehwe rọ vrẹ ọ ri mi rioja rọyen vwẹ isikuru! Nẹ ọke yena yanran, kọke kọke kọyen mi vwo nene emọ rẹ isikuru mẹ họnra; me hẹ ẹgbukpe ighwrẹn ọke mi vwo tu họnre.

 Orharhe ophu ọgangan rẹ ọsẹ mẹ nẹrhẹ ivun miovwo oni mẹ, ọkieje yen ayen vwọ kunu. Ọke me vwọ hẹ ẹgbukpe 11, ke me da udi je reyọ ihuvwun egangan. Me da rhe dia ohwo ro gbe ozighi mamọ, kọke kọke kọyen mi vwo nene ihwo họnra vwẹ irhuvwun. Mi vwo wontọ nẹ ikọleji, jẹ uruemu rẹ ozighi-egbe mẹ na wene uvwe mamọ re.

 Mi vwo te ẹgbukpe 18, me da vwomaba isodje re se U.S. Marine Corps. Etiyin kọyen mi de yono obo re hwe ohwo. Ẹgbukpe iyorin vwọ wan nu, mi de vrẹn nẹ iruo rẹ isodje re yono kpahen oborẹ iroro rẹ ihworakpọ wian wan, rere me sa vwọ wian vwẹ Federal Bureau of Investigation yẹrẹ FBI. Me ton uyono na phiyọ vwẹ Yunivẹsiti ọvo rọhẹ United States, mi de kuophiyọ vwẹ Yunivẹsiti ọfa rọhẹ Canada ọke mi vwo rhivwin kpo oboyin.

 Me vwọ hẹ isikuru na, ofu rẹ ihworakpọ de rhi dje vwe hwe. Urhuru-evwo vọn asan eje, erọnvwọn eje rehẹ akpọ na vwo otọ-ọ, kọ ghwa họhọ nẹ ebẹnbẹn rẹ ihworakpọ che se no bẹdẹ-ẹ. Ki mi ghwe si ẹwẹn no nẹ ihworakpọ che se ru akpọ na phiyọ omamọ rẹ asa-an.

 Kidie nẹ mi niro nẹ akpeyeren mẹ yanghan ku, mi de rhi muoma phiyọ udi ẹda vroma, ihuvwun egangan ẹreyọ, ẹvwọtua rẹ efe, kugbe ọfanrhiẹn egbe. Ki mi nẹ ipati kpo ipati, ji muẹ emetẹ. Ọkieje yen me je vwọ họnra, kidie uyono rẹ isodje ra vwọ kẹ vwẹ na nẹrhẹ mi vwo udu ọgangan. Mi vwẹ ọhọ romobọ mẹ vwo brorhiẹn hwe ihwo ri mi niri nẹ i shenyẹ ihwo efa, ke me bro ayen kpo ohọnre. Me rha riẹn nẹ mi hirhephiyọ ọviẹn vwọ kẹ ozighi-egbe re-e.

 Ẹdẹ ọvo, mẹ vẹ ugbeyan mẹ vwọ reyọ ihuvwun egangan vwẹ uwevwin mẹ, jẹ avwanre phara igbo rẹ avwanre cha ra shẹ vwẹ orere ọfa, ugbeyan mẹ da nọ vwẹ sẹ mi vwo esegbuyota kpahen Ọghẹnẹ. Me da kpahen kẹ, “Ọ da dianẹ Ọghẹnẹ yen so ojaẹriọ rọhẹ akpọ na, me guọnọ riẹn kpahọ-ọn!” Vwẹ ẹdẹ rivẹ, me da ton iruo phiyọ vwẹ asan ọvo, Oseri ri Jihova ọvo re me vẹ ọyen gba wian da nọ vwẹ, “Wo rorori nẹ Ọghẹnẹ yen so ojaẹriọ rọhẹ akpọ na?” Onọ yena gbevwunu mamọ, kidie mẹ vẹ ugbeyan mẹ ta ota kpahọn odẹ rọ wanre. Vwẹ uvwre rẹ emeranvwe esan nẹ ọke yena yanran, avwanre da ta ota kpahen erọnvwọn sansan, ọ da chọn vwẹ uko vwọ riẹn oborẹ Baibol na ta kpahen enọ buebun ri kpokpo uvwe ẹwẹn.

 Ọsen mẹ re me vẹ ọyen gba dia uwevwin, guọnọre nẹ me vuẹ kpahen oborẹ mi yono-o. Vwẹ Ẹdijana rode ọvo, me da vuẹ nẹ mi durhie Iseri ri Jihova evo nẹ ayen rhi vwẹ Baibol vwo yono avwanre. Mi vwo nẹ iruo te uwevwin vwẹ ẹdẹ rivẹ, me da mrẹvughe nẹ ọ kua ekuakua na eje rehẹ uwevwin na vwọ djẹ kpo asan ọfa. Me da ro otafe ra viẹ. Me je nẹrhovwo rhe Ọghẹnẹ nẹ ọ chọn vwẹ uko. Ọyena yen obọ rẹsọsuọ me vwọ vwẹ oderhi Ọghẹnẹ, rọ dia Jihova, vwọ nẹrhovwo.—Une Rẹ Ejiro 83:18.

 Ẹdẹ ivẹ vwọ wan nu, aye gbe ọshare ọvo re dia Iseri ri Jihova da vwẹ uyono ri Baibol mu kẹ vwẹ. Ayen vwọ yanran nu, mi de se asan ichekọ vwẹ ọbe na You Can Live Forever in Paradise on Earth, mi de se ọbe na re vwẹ ason yena. a Oborẹ mi yono kaphen Jihova vẹ Ọmọ rọyen Jesu, te vwe ẹwẹn mamọ. Me da rhe mrẹvughe nẹ Jihova ọyen Ọghẹnẹ rẹ arodọnvwẹ, ọ da mamọ siẹrẹ ọ da mrẹ nẹ avwanre rioja. (Aizaya 63:9) Ẹguọnọ rẹ Jihova dje kẹ vwẹ vẹ ughwu rẹ ọmọ rọyen te vwe ẹwẹn mamọ. (1 Jọn 4:10) Ukuko na, me da rhe riẹn nẹ Jihova vwo odirin mẹ kidie “ọ guọnọre nẹ ohwo ọvuọvo ghwru-u, ẹkẹvuọvo nẹ ihwo ejobi kurhẹriẹ.” (2 Pita 3:9) Mi de no nẹ Jihova guọnọre nẹ me dia ugbeyan rọyen.—Jọn 6:44.

 Me da ton uyono ẹra phiyọ vwẹ udughwrẹn yena. Mi ku erọnvwọn erhọn phiyọ, ẹto mẹ pha grongron, osẹvwe mẹ ji djoshọ muẹ ohwo. Dedena, Iseri na nabọ dede uvwe kerẹ ohwo rẹ orua rayen rẹ ayen mrẹ krire. Ọyena ghwa obo ro fori nẹ Inenikristi rẹ uyota ru. Kọ ghwa họhọ ọke re me vẹ ọsẹ kugbe oni mẹ rode vwọ dia, jẹ aghọghọ mẹ vrẹ ọ rẹ ọke yena.

 Ememerha na erọnvwọn ri mi yono nẹ Baibol na cha, de rhi wene akpeyeren mẹ. Mi de bru ẹton mẹ, je dobọ rẹ ọfanrhiẹn egbe ji, me rha da udi vroma yẹrẹ reyọ ihuvwun egangan ọfa-a. (1 Kọrẹnt 6:9, 10; 11:14) Me guọnọ ru obo re cha nẹrhẹ oma vwerhen Jihova. Eriyin na, mi de noso nẹ o vwo utuoma kpahen orọnvwọn ọvo mi ruẹ, mi guẹn oma riase-e. Ukperẹ ọtiọyen, kọ da vwẹ te erhi. Ke me ta kẹ oma mẹ, ‘Me rha guọnọ yeren oka rẹ akpọ nana-a.’ Kpakpata ke me davwẹngba vwo wene iroro vẹ uruemu mẹ. Akpọ mẹ de rhi yovwinphiyọ kidie nẹ mi ruẹ nenẹ oborẹ Jihova guọnọre. Emeranvwe esan vwọ wan nu, vwẹ July 29, 1989 mi de bromaphiyame kerẹ ọvo usun rẹ Iseri ri Jihova.

 Baibol na chọn vwẹ uko vwo wene oka rẹ ohwo re me hepha. Dẹvure me fobọ họnra siẹrẹ ohwo da guọnọ ota mẹ. Jẹ enẹna mi rhe ruẹ ọtiọye-en, kidie me guọnọ nene “ohwo ọvuọvo ghwọ-ọ.” (Rom 12:18) Ọ dia ẹgba romobọ mẹ yen me vwo ruo-o, me kpẹvwẹ Jihova rọ vwẹ Ota rọyen vẹ ẹwẹn ọfuanfon na vwọ chọn vwẹ uko vwo ru ewene.—Galesha 5:22, 23; Hibru 4:12.

 Ukperẹ me vwọ dia ọviẹn vwọ kẹ ihuvwun egangan ẹreyọ, ozighi-egbe, kugbe ọfanrhiẹn, me davwẹngba mamọ vwo ruẹ obo re cha nẹrhẹ oma vwerhen Jihova. Ọnana churobọsi ẹgbaẹdavwọn me vwọ chọn ihwo uko vwọ riẹn Jihova. Mi vwo bromaphiyame nu, ikpe evo vwọ wan nu, me da kua kpo ẹkuotọ ọfa re ghwoghwo vwẹ asan ra da ma guọnọ ukecha. Mi rhiẹromrẹ aghọghọ ro se te ohwo obọ siẹrẹ e de yono ihwo je mrẹ oborẹ Baibol na wene akpeyeren rayen wan. Oma je vwerhen ovwẹ nẹ oni mẹ rhe dia Oseri ri Jihova fikirẹ ewene ri mi ruru vwẹ akpeyeren mẹ.

 Vwẹ 1999, vwẹ El Salvador, mi de wontọ nẹ isikuru ra riẹn phiyọ Isikuru rẹ Ihwo ri Ghwoghwo Uvie Na enẹna. Isikuru yena nabọ muegbe mẹ vwọ kẹ iruo rẹ aghwoghwo na kugbe ẹroevwote vẹ eyono rẹ iniọvo rehẹ ukoko na. Ukpe yena yen me je vwọ rọvwọn aye mẹ re se Eugenia. Avwanre ihwo ivẹ na ga vwẹ Guatemala kerẹ ekobaro ọkieje.

 Oma vwerhen ovwẹ mamọ enẹna, ukperẹ ofu rẹ akpọ vwo dje vwe. Uyono ri Baibol ri mi vwo ruiruo vwẹ akpeyeren mẹ, chọn vwẹ uko vwọ kẹnoma kẹ ọfanrhiẹn kugbe ozighi-egbe, ọ je nẹrhẹ me mrẹ obọdẹn rẹ ẹguọnọ vẹ ufuoma vwẹ akpeyeren mẹ.