E vwiẹ vwẹ vwẹ Montreal, rọ dia orere rọ ma rho vwẹ Quebec, rọhẹ ẹkuotọ rẹ Canada. Ọsẹ vẹ oni mẹ yọnrọn ovwẹ vẹ iniọvo mẹ erha ghwanre vwẹ asan ọvo rọ pha yoyovwin re se Rosemont. Avwanre eje nabọ yeren akpọ rẹ omavwerhovwẹn kugbe.

 Mi vwo ẹguọnọ rẹ Baibol na ọke me vwọ hẹ eghene. Me karophiyọ nẹ ọke me vwọ hẹ ẹgbukpe 12, oma vwerhen ovwẹ mi vwo se kpahen ikuegbe rẹ Jesu vwẹ ẹbẹre rẹ Baibol na re se Ọphọ Ọkpokpọ na. Ẹguọnọ vẹ erorokẹ ro dje kẹ ihwo te vwe ubiudu mamọ, ọtiọyena me guọnọ vwẹrokere. Jẹ, ọ da vwẹ mamọ nẹ me vwọ ghwaran na, mi rhe vwo owenvwe me vwọ vwẹrokere Jesu ọfa-a, fikirẹ erharhe rẹ igbeyan.

 Ọsẹ mẹ tẹn ona rẹ obo re hworo sazofonu. Ọtiọyena, ọ da vwẹ sazofonu rọyen na vwo ru vwẹ ẹse, ji yono uvwe obo ra so une. Mi vwo omavwerhovwẹn kpahen unẹ ẹsuọ te ẹdia rẹ mi de rhi yono obo re hworo igita. O kriri-i, mi de rhi vwo ẹko rẹ ibuine, ke durhie avwanre kpo asan sansan de re hworo. Ihwo ri ruẹ ine phiyọ ọsete de rhi vwo oniso rẹ ona mẹ, ayen da vuẹ vwẹ nẹ ayen cha shẹ ine mẹ. Me da rhọnvwe nẹ me cha wian kẹ ikọpini rode ọvo ro ruẹ ine phiyọ isete. Ine mẹ de rhi kperusi mamọ te ẹdia re de hworo ayen vwẹ iredio kọke kọke vwẹ Quebec.

 Kọ ghwa họhọ nẹ mi vwo erọnvwọn eje me guọnọre re. Mẹvwẹ eghene ro titiri, me je mrẹ igho dẹn. Nẹ urhiọke fiẹ ovwọnvwọn, me sasa oma, ihwo riẹn mie vwe, mi si odẹ mẹ phiyọ ẹbe vẹ ekuakua rẹ ihwo, ji nene ayen ro ifoto (autograph), me je vwomaphia vwẹ TV. Ason de rhe te, ki mi kpo ine ẹsuọ vẹ akpọẹriọ. Vwo nẹ ọke rẹ eghene rhe, yen me vwọ ton udi ẹda phiyọ rere mi se vwo hirharoku otu na, memerha na, me da je vwẹ ihuvwun egangan ẹreyọ vwọba. Mi ruẹ yangha yangha, mi ji gbe ọfanrhiẹn.

 Oka rẹ akpọ ri mi yerẹn na je ihwo evo kidie ayen rorori nẹ oma vwerhen ovwẹ. Ẹkẹvuọvo, mi muomaphiyọ ma rho ọke rẹ mẹvwẹ ọvo da herọ. Ofudjevwe vẹ ẹwan de mu vwe rọ. Ọ da vwẹ nẹ ọke rẹ une ẹsuọ mẹ rhi vwo kperusi mamọ yen ọga rẹ AIDS vwo hwẹ ihwo ivẹ ri ruẹ ine mẹ phiyọ isete. O gbevwunu mamọ! Dede nẹ mi vwo ẹguọnọ rẹ ine ẹsuọ, jẹ oka rẹ akpọ ri mi yerẹn na tun vwe oma mamọ.

 Dede nẹ erọnvwọn yovwin kẹ vwẹ, jẹ me riẹnre nẹ emu ọvo she chọ vwẹ akpọ na. Diesorọ oshenyẹ vwọ vọn asan eje? Ki mi roro nẹ diesorọ Ọghẹnẹ ji rhi ru emu vuọvo kpahọ-ọn? Ọke buebun yen me vwọ nẹrhovwo rhe Ọghẹnẹ sẹ ọ kpahen kẹ vwẹ. Ọke mi vwo kpo omaerovwon, me da rhoma ton ese rẹ Baibol na phiyọ. Dede nẹ mi ghwe vwo ẹruọ rẹ erọnvwọn buebun ri mi seri-i, jẹ me mrẹvughe nẹ oba rẹ akpọ na sikẹrire.

 O vwo ọke ọvo mi vwo se Baibol na, mi de rhi noso nẹ Jesu chirin owẹnvwe vwevunrẹ aton ẹdẹ 40. (Matiu 4:1, 2) Ke me ta kẹ oma mẹ nẹ siẹrẹ mi de ji chirin owẹnvwe, ọkiọvo, Ọghẹnẹ che dje oma rọyen kẹ vwẹ, ọtiọyena, me da rhuẹrẹ ẹdẹ phiyọ me vwọ owẹnvwẹ echiron phiyọ. Idughwrẹn ivẹ tavwen me ke tonphiyọ, Iseri rẹ Jihova ivẹ da vwẹ obọ hworo ẹchẹ mẹ, me da vuẹ ayen nẹ ayen ro uwevwin kerẹsiẹ a da mrẹ nẹ mi rhẹro rayen jovwo. Me da nọ ọvo usun rayen re se Jacques nẹ “Mavọ yen avwanre sa vwọ riẹn nẹ avwanre yerẹn vwẹ oba rẹ akpọ nana?” Ọ da reyọ 2 Timoti 3:1-5 vwọ kpahen kẹ vwẹ. Me nọ ayen enọ buebun, ẹkpahọnphiyọ rayen je vwerhen ovwẹ oma, kidie Baibol na yen ẹkpahọnphiyọ rayen ejobi nurhe. Ayen vwọ rhe omarẹ abo ibro nu, me da rhe mrẹvughe nẹ o rhe fo mi vwo chirin owẹnvwe ọfa-a.

 Me da ton uyono rẹ Baibol rẹ ọkieje phiyọ vẹ Iseri na. Ukuotọ rọyen, mi de bru ẹto mẹ re pha grongron, me da ton uyono ẹra rẹ ọkieje phiyọ vwẹ Ọguan Ruvie rọhẹ ekogho mẹ. Iniọvo na dede uvwe sasasa, edede yena de toroba imuẹro ro rhe vwe nẹ mi mrẹ uyota na vughe re.

 Vwọrẹ uyota, ofori nẹ mi ru ewene rode vwẹ akpeyeren mẹ rere mi se vwo ru nene oborẹ Baibol na tare. Ewene ọvo ro fori nẹ mi ru yen, mi vwọ dobọ rẹ ihuvwun egangan ẹreyọ vẹ ọfanrhiẹn ji. O ji fo nẹ mi wene uruemu rẹ ojevwe romobọ ro rhe vwe rere mi se vwo dje erorokẹ kẹ ihwo efa. Kidie mẹvwẹ ọvo vẹ emọ mẹ ivẹ yen gba dia, kọ fori nẹ mi yono obo ra vwẹrote ayen vẹ oborẹ ayen se vwo vwo omamọ rẹ oyerinkugbe vẹ Jihova. Ọtiọyena, mi de siobọnẹ iruo rẹ une ẹsuọ mẹ, iruo ra da hwa omosa kẹ vwẹ kọyen mi ruẹ.

 Ọ lọhọre mi vwo ru ewen nana eje-e. Dede nẹ mi davwẹngba mi vwọ dobọ rẹ ihuvwun egangan ẹreyọ ji, mi ji shufi rọyen abọ ibro. (Rom 7:19, 21-24) Jẹ, ọ rọ ma bẹn kẹ vwẹ yen akpọ rẹ ọfanrhiẹn ri mi yerẹn. Vwọba, iruo kpokpọ mẹ na ghwọrọ ovwẹ oma, imigho ra hwa kẹ vwẹ na ji dje vwe ofu. Igho me mrẹ vwẹ inọke ivẹ me da so une bun nọ igho ra hwa kẹ vwẹ emeranvwe erha.

 Ẹrhovwo yen chọn vwẹ uko vwo ru ewene nana eje. Isese rẹ Baibol rẹ ọkieje je vwẹ ukẹcha kẹ vwẹ. O vwo ẹkpo rẹ Baibol evo ri phiuduphiyọ ovwẹ awọ. Ọvo usun rayen yen 2 Kọrẹnt 7:1. Ọ tare nẹ Inenikristi “họ oma [rayen] nẹ ẹgua rẹ ugboma vẹ erhi.” Ẹkpo rẹ Baibol ọfa rọ kẹ vwẹ imuẹro nẹ mi se siobọnu erharhe rẹ iruemu mẹ yen Filipae 4:13, rọ tare nẹ, “Mi se ru emu ejobi vwi Kristi rọ kẹ vwẹ ogangan.” Jihova kpahenphiyọ ẹrhovwo mẹ, ọ je chọn vwẹ uko vwo vwo ẹruọ rẹ uyota rẹ Baibol na ji yeren akpọ nene. Ọnana yen mu vwe vwọ vwomakpahotọ kẹ. (1 Pita 4:1, 2) Mi de bromaphiyame kerẹ ọvo usun rẹ Iseri rẹ Jihova vwẹ ukpe rẹ 1997.

 O muẹro nẹ ọ da dianẹ mi ji yeren oka rẹ akpọ ri mi yerẹn jovwo, mane ji mi ghwure. Ukperẹ ọtiọyen, me riavwerhen rẹ akpeyeren ro fiotọ enẹna! Aye mẹ Elvie bicha vwẹ mamọ. Avwanre riavwerhen re vwo yono ihwo efa kpahen Baibol na kerẹ ighwoghwota rẹ ọkieje. Iruo nana kẹ vwẹ omavwerhovwẹn vẹ otekẹvwẹ. Me kpẹvwẹ Jihova ro vwo si vwe kẹrẹ oma.—Jọn 6:44.