“Joshua rọ dia United States rọ gare vwẹ Guyana jovwo tare nẹ “unu che se gbikun rẹ aghọghọ ro te ohwo obọ siẹrẹ a da ga vwẹ asan ra da ma guọnọ ukẹcha-a!” Ọtiọyen oma je vwerhen Iseri buebun re je ra ga vwẹ Guyana. a Die yen e se yono mie iniọvo nana re ga vwẹ asan ra da ma guọnọ ukẹcha? Mavọ yen udje rayen sa vwọ chọn wẹ uko vwo muegbe rẹ ẹwẹn wẹn siẹrẹ wọ da guọnọ ra ga vwẹ asan ra da ma guọnọ ukẹcha vwẹ ẹkuotọ ọrhorha?

 Oniọvo Linel ghwoghwo iyẹnrẹn esiri na vwẹ ekogho ra fobọ wia-an vwẹ ẹkuotọ rọyen rọ dia United States, tavwen ọ ke kua kpo Guyana. Ọ da ta: “Avwanre ihwo 20 yen e ji kpo ọko ọvo vwẹ West Virginia. Omamọ oyerinkugbe rẹ iniọvo na vẹ iruo rẹ aghwoghwo re me riavwerhen rọyen vwẹ udughwrẹn ivẹ soso wene akpeyeren mẹ! Oruru mẹ kpahen ẹga ri Jihova da rhe gan vrẹ obo ri jovwo.”

 Aye gbẹ ọshare ọvo re se Garth vẹ Erica roro kpahen ẹkuotọ ọrhorha rẹ ayen da sa ga, ayen de brorhiẹn nẹ ayen che kpo Guyana. Diesorọ? Erica da ta: “Mẹ vẹ ọshare mẹ vughe aye gbẹ ọshare ọvo re kua kpo Guyana ra ga. Oruru vẹ ẹguọnọ rayen kpahen iruo na de mu avwanre je vwọ kua kpo oboyin. Erica vẹ Garth riavwerhen rẹ ẹgbukpe erha vwẹ iruo rẹ ayen niri “ghanghanre.” Garth da ta: “Avwanre vwọ davwen iruo rẹ aghwoghwo na vwẹ ẹkuotọ ọrhorha, avwanre da rhe mrẹ obo rọ vwerhen te.” Ikpe evo vwọ wan nu ọ vẹ aye rọyen de kpo Isukuru ri Gilead, enẹna ayen ga vwẹ Bolivia.

 Uchebro ri Baibol na sa chọn avwanre uko vwo ru akpeyeren avwanre lọhọ. (Hibru 13:5) Baibol na ji bru avwanre uche nẹ, a nabọ roro tavwen e ki brorhiẹn ride vwẹ akpeyeren. (Luk 14:26-33) Ọnana churobọ si orhiẹn rẹ ohwo vwo kpo ẹkuotọ ọrhorha! Garth de si: “Mẹvwẹ vẹ Erica ru akpeyeren avwanre lọhọ tavwen avwanre ki kua kpo Guyana. Avwanre shẹ uwevwin vẹ eki avwanre, eriyin ji te erọnvwọn efa rẹ avwanre ghwa guọnọ-ọ rehẹ evunrẹ uwevwin na. Ọ reyọ ikpe evo tavwen avwanre ki se ru ewene nana. Dedena, avwanre sẹro rẹ oruru rẹ avwanre vwọ ga vwẹ Guyana, kukpe kukpe yen avwanre vwo kpo oboyin.”

 Igho ọyen orọnvwọn ọfa ro fori nẹ e roro kpahen. Ihwo re ga vwẹ asan ra da ma guọnọ ukẹcha vwẹ ẹkuotọ evo sa wian vwẹ ẹkuotọ na, siẹrẹ urhi rẹ ẹkuotọ na da rhọnvwe kẹ ayen. Evo siobọnu iruo raye-en, ukperẹ ọtiọyen ayen reyọ ikọmputa rayen vwo ruiruo vuọvo rẹ ayen ruẹ vwẹ ẹkuotọ rẹ ayen nu rhe. Efa de kpo ẹkuotọ rayen ra wian ọmọke krẹn nu, ayen me rhoma rhivwin rhe. Aye gbẹ ọshare ọvo re se Paul vẹ Sinead rhivwin kpo Ireland obọ ọvo kukpe kukpe da ra wian. Ayen dia Guyana tobọ te ẹgbukpe ighwrẹn rẹ ayen vwo vwiẹ ọmọtẹ rayen nu. Iruo rẹ ayen ruẹ obọ ọvo kukpe kukpe vwẹ ẹkuotọ rayen na, chọn ayen uko vwọ ga vẹ omavwerhovwẹn vwẹ ẹgbukpe 18 soso vwẹ Guyana.

 Une Rẹ Ejiro 37:5 da ta: “Phi idjerhe wẹn phihọ obọ rẹ Ọrovwohwo; vwẹ ẹro vwọ suọ, ko ruo kẹ wẹ.” Ọkieje yen Christopher vẹ Lorissa ri nẹ United States rhe vwọ nẹrhovwo kpahen ọdavwẹ rẹ ayen vwọ ga vwẹ asan ra da ma guọnọ ukẹcha vwẹ ẹkuotọ ọrhorha. Ọke ayen de ruẹ uyono rẹ orua, ayen ji roro kpahen erhuvwu ro che no rhe vẹ ebẹnbẹn ayen che hirharoku siẹrẹ ayen de kpo ẹkuotọ ọfa da ra ga. Kidie nẹ ayen guọnọ kpo asan rẹ ayen de yono ephẹrẹ ọfa-a, ayen de brorhiẹn nẹ ayen che kpo Guyana, kidie oyibo yen a jẹ vwẹ etiyin.

 Ayen vwo ru ọyena nu, ayen de ru nene uchebro ri Baibol rọhẹ Isẹ 15:22: “Ọvwiroro rha hẹ asa-an emu ejobi ko she chọ, ẹkẹvuọvo ọvwiroro da herọ emu ko she phihọ.” Ayen de si rhe Oghọn Ukoko rọ vwẹrote iruo rẹ aghwoghwo na vwẹ Guyana, b nẹ ayen guọnọ ra ga vwẹ oboyin je vuẹ ayen kpahen oma rayen. Ayen je nọ kpahen asan re de sivwin ihwo, aruọke na, kugbe ẹkuruemu rẹ ihwo na. Oghọn Ukoko na da kpahen phiyọ enọ rayen, je vuẹ ayen kpahen ekpako rehẹ ekogho rẹ ayen cha kua ra na.

 Linel ra ta ota kpahen siẹvure ga kerẹ oniruo okinriariẹ vwẹ Guyana enẹna. Tavwen o ki kpo oboyin, o ji ru nene uchebro ri Baibol rọhẹ Isẹ 15:22. Ọ da ta: “Ọ dia igho ọvo yen mi kokori vwọ kẹ oyan na-a, me je nọkpẹn rẹ uchebro mie ihwo efa re gare vwẹ ẹkuotọ ọrhorha dẹvure. Mi nene ihwo rẹ orua mẹ, ekpako rẹ ukoko mẹ, kugbe oniruo okinriariẹ rẹ avwanre ta ota kpahen oyan na. Mi de ji se ẹbe sansan rẹ ukoko na teyenphia re ta ota kpahen ihwo re ga vwẹ asan ra da ma guọnọ ukẹcha.”

 Ihwo buebun re guọnọ ga vwẹ ẹkuotọ ọrhorha niro nẹ o yovwirin re vwo kpo ẹkuotọ na ra mrẹ obo rọ hepha tavwen a ke kparoma kpo oboyin. Aye gbẹ ọshare ọvo re se Joseph vẹ Christina da ta: “Obọrẹsosuọ avwanre tu vwo kpo Guyana, avwanre dia oboyin emeranvwe erha. Ọyena chọn avwanre uko vwọ mrẹ oborẹ asan na hepha. Avwanre de rhivwin kpo re muegbe rẹ erọnvwọn eje rẹ avwanre guọnọre, avwanre ke kua kpo oboyin.”

 A sa vwọ nabọ ga Ọghẹnẹ vẹ omavwerhovwẹn vwẹ ẹkuotọ ọrhorha, ofori nẹ iniọvo re ga vwẹ asan ra da ma guọnọ ukecha vwo ẹwẹn rẹ omaevwoze, kugbe owenvwe rẹ ayen vwo ru ewene vwo nene oborẹ ihwo na yerẹn akpọ wan vẹ ẹkuruemu rayen. Kerẹ udje, iniọvo re kua nẹ ẹkuotọ ri djirori kpo ẹkuotọ re rhorha mrẹvughe nẹ asan na vọnre vẹ emeraranvwe, ishi-shi, inyẹ, inwe, kugbe erọnvwọn efa tiọyen. Joshua ra ta ota kpahen siẹvure da ta: “Me je dia asan rẹ ishi-shi vọnre tiọna dẹvo-o. Ishi-shi rehẹ Guyana pha rhuarho! Jẹ, ọke vwọ yaran na e da rhe riẹnriẹn ovwẹ oma. Me mrẹvughe nẹ siẹrẹ e de ru uwevwin rẹ ohwo fuanfon ishi-shi rhe che buo-on. Ọnana churobọ si a vwọ hworhẹ imize, hwerhe uwevwin, ji ghwẹ inuhu kuẹfia ọkieje.”

 Re vwo wene vwo nene ẹkuruemu rẹ ihwo rẹ ẹkuotọ efa ji churobọ si ra vwọ riemu ra je re dẹvo-o, ji yono obo re chere ayen. Joshua da ta: “Mẹvwẹ vẹ ọrivẹ mẹ vuẹ iniọvo na nẹ ayen yono avwanre obo re chere emu rayen wan. Avwanre de chere emu kpokpọ, avwanre mi durhie iniọvo evo vwẹ ukoko na nẹ ayen rhi nene avwanre riọ. Ọnana idjerhe oyoyovwin ọvo avwanre vwo vughe iniọvo na je bọn ohwohwo gan.”

 Vwọ kpahen ẹkuruemu rẹ ihwo na, Paul vẹ Kathleen da ta: “Ọ lọhọre avwanre vwo ru nene uruemu rẹ ihwo na ji vwẹrokere oborẹ ayen sẹn osẹnvwe wa-an, kidie eyena emu ọrhorha kẹ avwanre. Ọtiọyena ko fori nẹ avwanre vwomakpotọ ru ewene re vwọso Baibol na-a. Re vwo ruẹ nene ẹkuruemu rẹ ihwo na si avwanre kẹrẹ iniọvo rẹ ukoko na, ọ je nẹrhẹ avwanre riavwerhen rẹ iruo rẹ aghwoghwo na.”

 Joseph vẹ Christina ta ẹwẹn rẹ ihwo buebun rẹ ayen vwọ ta: “Ebruphiyọ re herọ bun vrẹ ebẹnbẹn vẹ egbabọse rẹ ohwo che rhiẹromrẹ. Ra vwọ kua nẹ asan ro fun ohwo oma chọn avwanre uko vwo ru ewene. Erọnvwọn rẹ avwanre niri ghanghanre jovwo rha ghanre kẹ avwanre ọfa-a. Oborẹ avwanre rhiẹromrẹ nẹrhẹ oruru rẹ avwanre vwo ru ọhọre ri Jihova ọkieje ganphiyọ. Ọnana nẹrhẹ avwanre vwo ẹwẹn rẹ otekẹvwẹ.”

 Erica ra ta ota kpahen siẹvure da ta: “Ra vwọ ga vwẹ asan ra da ma guọnọ ukẹcha nẹrhẹ ovwẹ vẹ ọshare mẹ riẹn obo ro mudiaphiyọ ra vwọ vwẹroso Jihova. Avwanre mrẹ ukẹcha rọyen vwẹ idjerhe rẹ avwanre je rhe rhiẹromrẹ dẹvo-o. Avwanre sikẹrẹ ohwohwo phiyọ kerẹ aye gbẹ ọshare fikirẹ oborẹ avwanre rhiẹromrẹ.”