Obọ yovwin Madián vẹ Marcela vwẹ Medellín rọhẹ Colombia. A hwa omamọ rẹ osa kẹ Madián vwẹ asan ro de ruiruo, ọnana nẹrhẹ ayen sa dia uwevwin rọ pha yoyovwin. Ẹkẹvuọvo, emuọvo da rhe phia rọ nẹrhẹ ayen roro kpahen obo re ma ghanre kẹ ayen kerẹ idibo ri Jihova. Ayen da ta: “Vwẹ 2006 avwanre kpo osikoko rẹ oghẹresan rẹ ẹdọke ọvo ro vwo uyovwinrota na ‘Ru Ubiẹro Wẹn Lọlọhọ.’ Eta buebun ra vwọphia dje oboresorọ ọ vwọ ghanre rẹ avwanre vwo ru akpeyeren avwanre lọhọ rere avwanre sa vwọ ga Jihova vọnvọn. Avwanre vwo nẹ osikoko na kpo, avwanre da mrẹvughe nẹ avwanre ruẹ ọtiọye-en. Ẹdẹdẹ yen avwanre dẹ, ọnana da nẹrhẹ avwanre riesa te ohọre.”

 Ota rẹ Madián vẹ Marcela nyori vwẹ osikoko na da nẹrhẹ ayen mrẹvughe nẹ ofori ayen vwo ru akpeyeren rayen lọhọ, ayen de ghini ru ọtiọyen. Ayen da ta: “Avwanre de siobọ rẹ igho ẹghwọrọ avwanre kpotọ, avwanre da kua kpo uwevwin otete, shẹ imoto avwanre, je dẹ imotosaikoro.” Vwọba, ayen rhe kpo asan ra da shẹ ekuakua ride-e, rere ayen vwo jẹ ekuakua re vrẹ ayen oma ẹdẹ. Kẹ ayen ghwọrọ ọke buebun vwo yono ihwo re dia kẹrẹ ayen Baibol na. Ayen je vwẹ ugbeyan vwo mu ekobaro oghẹresan ri vwo oruru kpahen ẹga ri Jihova. a

 O rhe kri-i, Madián vẹ Marcela de brorhiẹn rẹ ayen vwọ kua kpo ukoko otete vwẹ ọko ọvo ra da guọnọ ukẹcha rere ayen sa vwọ hẹre iruo rẹ aghwoghwo rayen phiyọ. Ayen se vwo kpo oboyin, Madián de siobọnu iruo rọyen. Madamu rọyen ko no nẹ emu ọvo kpokpo. Madián da nọ madamu rọyen: “Dede nẹ igho ra hwa kẹ wẹ bunru, wọ sa ghene tanẹ oma vwerhen owẹ?” Ọ da rhọnvwe nẹ oma ghene vwerhen ọye-en, kidie o vwo ebẹnbẹn buebun rọ sa rhuẹrẹ phiyọ-ọ. Madián da ta: “Ọ dia uche igho ra hwa kẹ ohwo yen ma ghanre-e. Obo re ma ghanre ọyen ohwo vwọ riẹn obo re kẹ omavwerhovwẹn. Re vwo yono ihwo kpahen Ọghẹnẹ kẹ vwẹ vẹ aye mẹ omavwerhovwẹn, avwanre guọnọre nẹ omavwerhovwẹn tiọyena ganphiyọ, kọyensorọ avwanre vwọ guọnọ vwomakpahotọ vọnvọn vwọ kẹ iruo nana.”

 Madián vẹ Marcela vwo omavwerhovwẹn vẹ otekẹvwẹ, kidie ẹga ri Jihova yen ma ghanre kẹ ayen. Vwẹ uvwre rẹ ikpe 13 re wanre na, ayen gare vwẹ asan ra da ma guọnọ ukẹcha vwẹ ikoko rehẹ uherevie rẹ obohwẹre ọnre vẹ ẹbẹre ọnre shera vwẹ Colombia. Enẹna ayen riavwerhen rẹ uphẹn rẹ ẹga ro te ayen obọ kerẹ ekobaro oghẹresan.