Ẹdẹ ọvo rẹ Eliso rọ dia ọvo usun rẹ Iseri ri Jihova vwọ vwẹ Baibol vwo yono aye ọvo, ihwo ivẹ de won aye na ọrhorha kpregede. O vwo te anurhoro, ọ da mrẹ olori ẹga ọvo vẹ aye rọyen. Eliso nyori nẹ ọmọshare vuọvo rẹ ayen vwiẹre ghwuru o krinọ-ọ na.

 Ọke rẹ Eliso vwọ vuẹ ayen nẹ ughwu rẹ ọmọ rayen na darọ mamọ, olori ẹga na vẹ aye rọyen ke viẹ gangan. Olori ẹga na da ta vẹ ophu: “Me riẹn oboresorọ Ọghẹnẹ vwọ vwẹ uphẹn kẹ emu tiọna nẹ ọ phia-a! Die yen nẹrhẹ ọ reyọ ọmọshare mẹ vuọvo? Etiyin ẹgbukpe 28 yen me ga cha re, mi ji ruẹ emu esiri buebun, ọnana kẹ obo rọ vwọ hwosa kẹ vwẹ! Diesorọ Ọghẹnẹ vwo hwe ọmọshare mẹ?”

 Eliso de dje kẹ aye gbe ọshare na nẹ ọ dia Ọghẹnẹ yen hwe ọmọshare raye-en. O de ji nene ayen ta ota kpahen iyovwinreta kerẹ ọtanhirhe, evrẹnushi, kugbe oboresorọ Ọghẹnẹ vwọ vwẹ uphẹn kẹ erọnvwọn ebrabra ne phia. Olori ẹga na vẹ aye rọyen da vuẹ Eliso nẹ enọ rẹ ayen nẹrhovwo kpahan yen ọ ghwa kpahenphiyọ na.

 Udughwrẹn rọ vwọ kpahọn, olori ẹga na vẹ aye rọyen da rhe vwomaba aye na ọke re vwo yono. Ọke yena jẹ Eliso vẹ aye na yono uyovwinrota na, “Real Hope for Your Loved Ones Who Have Died,” vwẹ ọbe na What Does the Bible Really Teach? Olori ẹga na vẹ aye rọyen da nabọ vwobọ vwẹ uyono na.

 Ọke vwọ yanran na, ayen ihwo ivẹ de ji kpo ọghwẹkoko oghẹresan rẹ Iseri ri Jihova vwẹ Tbilisi rọhẹ Georgia. Ẹguọnọ vẹ oyerinkugbe rẹ iniọvo rẹ ayen mrẹre vwẹ ọghwẹkoko na te ayen ẹwẹn mamọ, oka rẹ oyerinkugbe tiọyena yen ayen je guọnọ nẹ ihwo rẹ ẹga rayen vwo, ẹkẹvuọvo ayen se vwo-o.