Yanmei rọ dia Oseri ri Jihova vwẹ Asia, vwẹ ukẹcha kẹ aye ọvo ro rhuẹro re se Mingjie vwọ shariẹ idjerhe vrẹ. a Mingjie da ta kẹ: “Wẹ kobiruo. E jẹ Ọghẹnẹ bruba kẹ wẹ!” Yanmei da nọ Mingjie sẹ o se nene yono Baibol. Mingjie da tanẹ o krire ọyen vwọ nẹrhovwo nẹ Ọghẹnẹ chọn ọyen uko vwọ mrẹ ukoko rọyen vughe. Diesorọ ọ vwọ nẹrhovwo ọtiọyen?

 Mingjie da tanẹ vwẹ 2008 ugbeyan rọyen ọvo ro ji rhuẹro durhire kpo ishọshi ọvo ra da vwẹ ukẹcha kẹ ihwo rẹ ẹbẹre ọvo rẹ oma rayen shechọ. Rọ vwọ kerhọ rẹ ota rẹ orherẹn na nu, ọ da nọ kpahen ọbe ro se eta na nurhe. Orherẹn na da vuẹ nẹ Baibol na rọ dia ọbe rẹ Ọghẹnẹ yen eta na nurhe. Mingjie de rhi vwo owenvwe ọgangan ro vwo se Baibol na. Ọtiọyena, o de se Baibol ri braille re ruru vwọ kẹ irhuẹro vwẹ ephẹrẹ ri Chinese. O se ukori 32 ri Baibol na re, vwẹ omarẹ emeranvwe esan. Mingjie vwo se Baibol na te asan ọvo, ọ da rhe mrẹvughe nẹ uyono rẹ Eghẹnẹ Erha ri Kuomakugbe Dia Ọvo re yono vwẹ ishọshi dia uyota-a, nẹ Ọghẹnẹ vwo odẹ, odẹ rọyen Jihova.

 Ememerha na, ofu de rhi dje Mingjie fikirẹ orharhe uruemu rẹ ihwo ri kpo ishọshi na. Ayen ruẹ nene obo ro se vwẹ Baibol na-a. Kerẹ udje, emu rẹ ihwo re chekọ yen a vwọ kẹ irhuẹro na. Oshenyẹ nana darọ mamọ, ọtiọyena, kọ guọnọ ishọshi ọfa rọ cha vwomaba vwẹ ekogho na. Ọnana yen sorọ rẹ Mingjie vwọ nẹrhovwo nẹ Ọghẹnẹ chọn ọyen uko vwọ mrẹ ukoko uyota rọyen na vughe.

 Fikirẹ omamọ uruemu rẹ Yanmei djephia, Mingjie da rhọnvwe nẹ ọ vwẹ Baibol vwo yono ọyen. Ọke vwọ yanran na, Mingjie de kpo omẹvwa rẹ Iseri ri Jihova. Ọ da ta: “Omẹvwa rẹsosuọ re me rare cha sa chọrọ ovwẹ ẹro-o. Iniọvo na eje nabọ dede uvwe sasasa. Oborẹ ayen ruru na te vwe ẹwẹn mamọ. Dede nẹ me sa mrorẹ-ẹ, mi niroso nẹ ẹguọnọ rayen dia ọ rẹ omeru-u.”

 Mingjie nabọ yan obaro te asan ro vwo kpo emẹvwa ọkieje. O vwo omavwerhovwẹn rọ vwọ so ine rẹ ukoko na, ẹkẹvuọvo kidie nẹ e vwo ọbe une re ruru vwọ kẹ irhuẹro-o, kọ pha bẹnbẹn rọ vwọ sune. Ọtiọyena, womarẹ ukẹcha rẹ ukoko na Mingjie de ru ọbe une romobọ rọyen. Ọ reyọ inọke 22 o ki se ru ine 151 na eje phiyọ braille! Vwẹ April 2018, Mingjie da rhe dia oghwoghwota. Ukuko na, kọ vwẹ inọke 30 vwo ghwoghwo kemeranvwe kemeranvwe.

 Ọ sa vwọ chọn Mingjie uko vwo muegbe vwọ kẹ omaebrophiyame, Yanmei de ru enọ vẹ ẹkpo ri Baibol rehẹ ọbe na Organized to Do Jehovah’s Will phiyọ uhworo. Mingjie de bromaphiyame vwẹ July 2018. Ọ da ta: “Ẹguọnọ rẹ iniọvo na dje kẹ vwẹ vwẹ ọghwẹkoko yena te vwe ẹwẹn mamọ. Ẹro mẹ de sun ame kidie me ro evunrẹ ukoko rẹ Ọghẹnẹ rẹ uyota na re.” (Jọn 13:34, 35) Enẹna Mingjie ga kerẹ ọkobaro ọkieje kidie ọ guọnọ dje ẹguọnọ kẹ ihwo efa kirobo re ji dje ẹguọnọ kẹ.