Oni ọvo re se Desicar guọnọ dia ọkobaro ọkieje rere ọ sa vwọ hẹre iruo rẹ aghwoghwo rọyen phiyọ. Venezuela rọ dia ẹkuotọ ro rhiẹromrẹ uweren ọgangan yen ọ dia. Dedena, o vwo owenvwe rọ vwọ dia ọkobaro ọkieje, o de ghini ru ọtiọyen. Oma vwerhenrọ vwọ kpahen obo ro ruru na, ẹkẹvuọvo ọga ri COVID-19 da vwomaphia.

 Vwẹ ọtonphiyọ rẹ ọga ri COVID-19 na, Desicar da rhe mrẹ bẹnbẹn rọ vwọ reyọ ena kpokpọ ra guọnọre na vwo ghwoghwo ota. A vwọ womarẹ ileta esio vwo ghwoghwo ota kẹ ihwo, ọyen egbabọse vwọ kẹ. Vwọba, ọ sa reyọ vidio kọnfrẹsin vwo ruiruo rẹ aghwoghwo na-a kidie intanẹti pha ghanghanre vwẹ ekogho rọ dia. Ọ da ta: “Ọnana nẹrhẹ ofu dje vwe. Kpregede na mi rhe se ghwoghwo ota kirobo ri mi ruẹ jovwo-o. Mi de roro nẹ me davwan kerẹ ọkobaro ọkieje-e.”

 Ọtiọyena vwẹ January 2021, oghọn ukoko rẹ Iseri ri Jihova vwẹ Venezuela da rhọnvwe nẹ e se vwobọ vwẹ egbadaẹdjẹ oghẹresan vwẹ ẹkuotọ na. E de ru ọrhuẹrẹphiyotọ ra vwọ vwẹ eta rẹ otu evo ra sanere vwọphia vwẹ iredio steshọni ri te omarẹ 60 kugbe TV shanẹl 7 vwẹ oba rẹ udughwrẹn iyorin vwẹ emeranvwe ri January na. E jiriro kẹ Iseri ri Jihova nẹ ayen durhie ihwo ri vwo owenvwe, rere ayen kerhọ rẹ uhworo na ji nughe rẹ eta ra vwọphia vwẹ TV shanẹl na. Oghọn ukoko da je reyọ enọ vẹ ẹkpo ri Baibol sansan ri churobọ si ota ọvuọvo vwọ phia, rẹ iniovo rẹ avwanre sa reyọ vwo ruiruo vwẹ ileta esio rayen vẹ otaẹtakuẹgbe vwẹ ifonu. Vwọba, oghọn ukoko de ji jiro kẹ iniọvo na nẹ ayen womarẹ ovuẹ re siẹ rhe ihwo vwẹ ifonu ji vwo ruiruo​—ọnana ona kpokpọ rẹ Iseri ri Jihova buebun vwo ghwoghwo ota vwẹ Venezuela.

 Oma vwerhen Desicar ro vwo vwobọ vwẹ egbadaẹdjẹ na. Dede nẹ ọ je reyọ ona re vwo siẹ ovuẹ rhe ihwo womarẹ ifonu vwo ghwoghwo ota dẹvo-o, o de brorhiẹn rọ vwọ davwọn ni. Dedena, ọ guọnọ ukẹcha. Desicar da ta: “Me tẹn ona rẹ obo ra reyọ itẹknọlọgi vwo ruiruo-o,” ọtiọyena ọ da vuẹ ọmọtẹ rọyen nẹ o yono ọyen, o gbi kri-i, Desicar de muegbe ro vwo vwobọ vwẹ egbadaẹdjẹ na.

 Womarẹ ovuẹ esio, Desicar de durhie ihwo buebun rere ayen rhe kerhọ vwọ kẹ uhworo re ru phiyotọ na. Obo ri nẹ obuko rọyen rhe gbere unu. Ihwo buebun ri Desicar durhieri da kerhọ rẹ ota na je nọ enọ. Ihwo efa re sa kerhọ re ota na-a da nọ Desicar obo ra tare. Desicar da ta: “Oborẹ mi si phiyotọ vwẹ uvwre rẹ ọke rẹ omẹvwa na yen mi vwo nene ayen ta ota. Mi ji rhi vwo orhivwinbrura re vrẹ iyorin vwẹ emeranvwe ọvo dẹvo-o, ẹkẹvuọvo, vwẹ oba rẹ egbadaẹdjẹ na, mi de rhi vwo te 112!” a

 Desicar de ji durhie oniọvo rọyen ọkpako rọ dia kẹrẹ rọ dia Oseri ri Jihova-a, nẹ ọ yanrhe rhe kerhọ rẹ ota ra tare vwẹ iredio na. Desicar da ta: “O gbevwunu mamọ oniọvo mẹ vwọ rhe. Vwẹ ughọjọ ẹrenren rẹ urhiọke vwẹ kẹdijana kẹdijana, yen mi vwo kpo uwevwin rọyen rere mẹ vẹ ọyen vwọ kerhọ rẹ ota na kugbe. Ọ me nọ enọ buebun uvwrẹ rẹ ọke rẹ ota na kugbe ọke rẹ ota na de kuphiyọ nu.” Oniọvo ri Desicar de ji kpo ẹkarophiyọ rẹ ughwu ri Jesu re ruru womarẹ vidio kọnfrẹsin, ọ da je vwẹ uphẹn kẹ Desicar nẹ ọ reyọ itanẹti rọyen vwo ruiruo.

 Desicar da ta: “Me kpẹvwẹ Jihova mamọ, me je kpẹvwẹ ekpako rẹ ukoko mẹ rẹ ayen vwọ dia uvi rẹ ọbọngan vwọ kẹ vwẹ. Ayen vwẹ ukẹcha vwọ kẹ vwẹ sa vwọ rhoma rhe mrẹ aghọghọ vwẹ iruo rẹ aghwoghwo na.” (Jerimaya 15:16) Desicar ji ruiruo rẹ ọkobaro rọyen na kpobaro phiyọ, o ji yono ihwo rọ mrẹre ri dje owenvwe phia womarẹ ovuẹ rẹ ifonu.