Bob djẹ iroko 100 vwẹ unọke ọvo ọke rẹ odju vwo djuẹ rẹ ekpahen ọgangan ji vwo muẹ vwẹ Alberta rọhẹ Canada. Siẹvuọvo na itaya rẹ obuko rẹ imoto rọyen da sa. Kidie nẹ ọ riẹnre nẹ itaya rẹ imoto rọyen sare-e, kọ je dje iroko iyorin kpo uwevwin rọyen.

 Bob da ta obo re phiare vwẹ ileta ro si kpo Ọguan Ruvie rẹ Iseri ri Jihova vwẹ ekogho na. “Ighene iyorin da djẹ imoto rayen kẹrẹ ọmẹ, ayen de si ovakpo rẹ imoto rayen kpotọ, ayen da vuẹ vwẹ nẹ itaya rẹ imoto mẹ sare. Avwanre da domaji vwẹ orhoma rẹ idjerhe na, ayen da vuẹ vwẹ nẹ ayen cha chọn vwẹ uko vwo wene. Me tobọ riẹn sẹ mi vwo itaya ọfa vẹ ijaki ra vwọ kpare imoto kpenu-u. Mi vwo chidia agbara rẹ ukpono mẹ vwẹ orhoma rẹ idjerhe na, ayen da shọrọ ro obotọ rẹ imoto mẹ, ayen da mrẹ itaya vẹ ijaki na, ayen de wene itaya rọ sare na. Aruọke na muekpahen gangan, jẹ imicho she. Dede nẹ osẹnvwe rayen pha yoyovwin ayen ji wene itaya rẹ imoto mẹ ghene, rere mi se vwo kpo asan me ra. Mi rhe se ru ọnana komobọ jovwo-o.

 “Me kpẹvwẹ ighene iyorin re dia Iseri ri Jihova re chọn vwẹ uko na. Ayen hẹ ekogho yena ghwoghwo nuwevwin kpo uwevwin. Ighene na nabọ ruẹ nene oborẹ ayen ghwoghwo. Ukẹcha rẹ ayen vwọ kẹ vwẹ davwaro mamọ, ọ dianẹ ayen rhere jovwo-o me rha rioja krekri vwẹ etiyin. Ono yen riẹnre sẹ me cha mrẹ ighene tiọyen re pha kerẹ emekashe re ji rhe vwe ẹdẹ yena?”