Osman vẹ aye rọyen kugbe ọmọtẹ rayen vwẹ imikpekpa vwo ruẹ aghwoghwo rẹ azagba vwẹ otafe rẹ asan re shi ihwo phiyọ vwẹ Chile. Siẹvuọvo na, ọ da mrẹ ihwo buebun ri sunẹ cha, vẹ orivwin rẹ ayen muru rẹ ayen che shi. Evo usun rayen da vwẹ Osman vwo roro pastọ rayen, ọtiọyena ayen de bro ra ra gbanọ je vuẹ nẹ, “Pastọ wẹ kobiruo wọ vwọ fobọ rhe, avwanre rhẹro wẹ!”

 Dede nẹ Osman davwẹngba vwọ vuẹ ayen nẹ ọyen dia pastọ raye-en, jẹ edo rayen sa nẹrhẹ ayen nyo obo rọ ta-a. Ibrẹro evo vwọ wan nu, rẹ ihwo na vwọ ro asan re shi ihwo phiyọ na nu, evo usun rayen de rhivwin rhe, ayen da ta kẹ: “Pastọ, avwanre hẹrhẹ owẹ vwẹ oboyin.”

 Edo na vwo kpotọ nu, Osman da vuẹ ayen ohwo rẹ ọyen hepha vẹ oboresorọ ọ vwọ hẹ etiyin. Ihwo na de muophu ta ota kpahen pastọ rayen rọ rhere-e. Ayen vwo ru ọtiọyen nu, ayen da nọ Osman: “Wọ sa rhe ta ota kẹ avwanre nẹ Baibol rhe?” Osman da rhọnvwe.

 Ọke ro vwo kpo asan re che shi ohwo na phiyọ, Osman da nọ ayen enọ evo kpahen ohwo ro ghwuru na, o de ji roro kpahen ẹkpo ri Baibol evo ro che se. O vwo te etiyin, o de dje oma kẹ otu na je vuẹ ayen nẹ kerẹ ọvo usun rẹ Iseri ri Jihova ọyen vwobọ vwẹ iruo re vwo ghwoghwo iyẹnrẹn esiri na kẹ ihwo.

 Ọ da vwẹ ọbe rẹ Ẹvwọphia 21:3, 4 kugbe Jọn 5:28, 29 vwo dje kẹ ayen nẹ ọ dia ọhọre rẹ Ọghẹnẹ rẹ ihwo vwo ghwu-u. Ọ da tanẹ o rhe che kri-i, Ọghẹnẹ kọ cha kpare ihwo ri ghwuru vrẹnushi, kẹ ayen cha dia otọrakpọ na bẹdẹ. Osman vwọ ta eta nana nu, ihwo buebun da gbanọ je kpẹvwẹ vwọ kẹ “iyẹnrẹn esiri yena ro nẹ obọ ri Jihova rhe.” O de rhivwin kpo asan rẹ imikpekpa na hepha.

 Ayen vwo shi ohwo na nu, evo usun rayen de bru Osman ra vwẹ asan rẹ imikpekpa na hepha, ayen da nọ vẹ orua rọyen enọ kpahen Baibol na. Ọ vẹ ayen da ta ota ọke grongron, ayen vwo yanran, ayen da joma reyọ ẹbe na eje rehẹ imikpekpa na.