Ukpe ri 2010 yen Ed vẹ aye rọyen, Jennie, ka vwọ davwen aghwoghwo re ruẹ womarẹ ifonu ni. a Jennie da ta: “O je vwe kakaka-a. Me da vuẹ ọshare mẹ nẹ, ‘Mi rhe che vwobọ vwọ ọfa-a!’ ” Ed ji vwo ọkpọ iroro yena. Ọ da ta: “Use rẹ ihwo re guọnọ shẹ erọnvwọn kẹ vwẹ vwẹ ifonu je vwe-e, ọtiọyena ọ cha bẹn kẹ vwẹ me vwọ womarẹ ifonu ghwoghwo ota.”

 Ọga ri COVID-19 da rhe tonphiyọ, a da dobọ rẹ aghwoghwo rẹ nuwevwin kpuwevwin rẹ Iseri ri Jihova ruẹ ji. Kidie nẹ ayen guọnọ yan nene urhi ri Jesu re vwo ghwoghwo iyẹnrẹn esiri na, ileta esio vẹ aghwoghwo re ruẹ womarẹ ifonu kọyen ayen reyọ vwo ruiruo. (Matiu 24:14; 28:​19, 20) Vwẹ ọke vuọvo na, ayen ji ruẹ emẹvwa rẹ Inenikristi vẹ emẹvwa rẹ aghwoghwo na womarẹ vidio kọnfresin. Vwẹ ọvo usun rẹ emẹvwa tiọyena, Ed de fiudugberi rhoma davwen aghwoghwo rẹ ifonu ni. Mavọ yen oma ruro rọ vwọ guọnọ ton use rẹsosuọ rọyen phiyọ? Ọ da ta: “Oshọ muvwe mamọ te ẹdia rẹ me da nẹrhovwo vwọ kẹ ukẹcha! Ọtiọyena mi de se ohwo na. Etiyin me wan mrẹ Tyrone.” b

 Tyrone vẹ aye rọyen Edith dia ọko ri Kentucky vwẹ U.S.A. Tyrone hẹ ẹgbukpe 83, ọ je mrorẹ te-e. Dedena, o rhiabọreyọ uyono ri Baibol ri Ed jiri vwọ kẹ. O se ọbe re vwo yono na vẹ iglasi rọ nẹrhẹ ibieta rhua, ọ da ton eyono ri Baibol rẹ ọkieje phiyọ vẹ Ed womarẹ ifonu.

 Omarẹ emeranvwe ọvo vwọ wan nu, Tyrone vẹ Edith da ton uyono ẹra phiyọ vwẹ ukoko rọ kẹrẹ ayen. Jẹ, kidie nẹ ayen vwo intanẹti-i, use rẹ ifonu kọyen ayen vwo ruẹ omẹvwa na. Die yen nẹrhẹ Edith vwo omavwerhovwẹn kpahen uyota na?

 Ed vẹ Jennie nyo urhuru rẹ Edith rọ vwẹ ukẹcha kẹ Tyrone vwọ kpahanphiyọ enọ ji nene rhie Baibol rayen vwẹ ọke re vwo yono. Ẹkẹvuọvo, ọ vwomaba uyono na vrẹ ọtiọye-en. Jennie da ta: “Oborẹ ọ ta ota wan na djephia nẹ emuọvo da vwẹ ubiudu, jẹ me vẹ Ed riẹn oboresorọ-ọ.”

 Ẹdẹ ọvo, Jennie ko niro nẹ ofori ọyen vwo nene Edith ta ota. Ọtiọyena, o vwo no nẹ uphẹn nabọ rhiephiyọ ro vwo nene ta ota re, kọ vuẹ ọshare rọyen Ed nẹ ọ vwẹ ifonu na kẹ ọyen. Ọ da ta: “Tyrone, mi nyo urhuru rẹ aye wẹn, me guọnọre nẹ ọ chọn avwanre uko vwo se ẹkpo ri Baibol ọvo yẹrẹ kpahenphiyọ onọ ọvo.”

 Ọ vwọ fọ emerha nu, Edith da kpahen vẹ upho ri bọrọ bọrọ rọ vwọ ta: “Mi vwo ẹwẹn mi vwo nene uwe ta ota. Mẹvwẹ Oseri ri Jihova. Me dobọ rẹ iruo rẹ aghwoghwo na ji vwẹ ẹgbukpe 40 re.”

 Ọnana gbe Jennie unu. Ọ da ta: “kọyen wẹwẹ oniọvo mẹ!” ayen ihwo ivẹ da viẹ.

 Ọke vwọ yanran, Ed da vwẹ ibroshọ rẹ Rhivwin Bru Jihova Rhe vwọ kẹ Edith. Idughwrẹn evo re vwọ kpahọn, Ed vẹ Jennie de vwo oniso rẹ ewene vwẹ oma rẹ Edith. Ed da ta: “Ẹsosuọ, obo rọ ta ota wan djerephia o muomaphiyọ. Jẹ, enẹna oma vwerhọn.” Edith de rhi sikẹrẹ Jihova. Asaọkiephana, ọ ga kerẹ oghwoghwota rẹ oma vwerhan. Ọshare rọyen bromaphiyame kerẹ ọvo usun rẹ Iseri ri Jihova vwẹ July 2022.

 Ed da karophiyọ oka rẹ ẹwẹn ro vwori kpahen aghwoghwo re ruẹ womarẹ ifonu, iroro rọyen ko kpo otaẹtakuẹgbe ọ vẹ Tyrone vwori. Ed vwo se Jọn 6:44 ji djefiotọ vwọ kẹ nẹ Jihova yen siẹ ihwo rhe uyota na nu, Tyrone da rhọnvwephiyọ, ọ da ta: “Mi rhẹro rẹ use wẹn rhabae.” Oma je vwerhen Jennie nẹ ọ vẹ ọshare rọyen se fiudugberi vwobọ vwẹ aghwoghwo re ruẹ womarẹ ifonu. Jennie da ta: “Jihova brẹba oka rẹ ẹgbaẹdavwọn tiọyena.”