Vwẹ uvwre rẹ ọke rẹ ọga ri COVID-19 na, iniọvo avwanre ru ewene phiyọ ona rẹ oborẹ ayen sa vwọ reyọ evuẹ ri Baibol re vọnre vẹ uchebro na vwọ kẹ ihwo efa. Ukperẹ ayen vwo ru aghwoghwo rẹ azagba yẹrẹ bru ihwo ra vwẹ iwevwin rayen, aghwoghwo rẹ ifonu vẹ ileta kọyen ayen ma reyọ vwo ruiruo. a Ihwo buebun vwẹ ẹro ọghanghanre vwo ni ẹgbaẹdavwọn rayen na, Jihova ji ku ebruphiyọ rọyen ku iruo na. (Isẹ 16:​3, 4) Roro kpahen ikuegbe sansan rẹ obo re rhiẹromrẹ vwẹ ẹkuotọ ọvo rẹ ame riariẹ phiyọ.

 Tavwen ọga rẹ akpọeje na ke rhe phia, ọkieje yen Helen vwo brẹ eghene aye ọvo ra rere ayen se vwo yono Baibol na kugbe. Ẹkẹvuọvo aye na rhọnvwa-a. Ọke rhie a mrẹ ẹdẹ re vwo jurhi nẹ dohwo duwevwin rọyen dia fikirẹ ọga ri COVID-19 na, Helen da vwẹ Baibol vẹ ọbe ri Die Yen Baibol na Se Yono Avwanre? vwọ kẹ. Vwẹ uvwre rẹ ọke rẹ ihwo je vwọ hẹ uwevwin na, Helen da rhoma vuẹ nẹ ayen ton uyono ri Baibol phiyọ, je tanẹ ifonu yen ayen che vwo ruo. Vwẹ udje nana, eghene rẹ aye na da rhọnvwephiyọ uyono ri Baibol na. Ọ nabọ riavwerhen rẹ uyono na, o kriri-i, ọ da vuẹ Helen nẹ ayen rhe yono kẹdẹ kẹdẹ! Aye na da je ton uyono ẹra ọkieje phiyọ womarẹ ifonu. Vwọba, ọ je reyọ obo ro yono vwo ruiruo vwẹ akpeyeren rọyen je vuẹ ihwo efa kpahọn.

 Kerẹ ẹbẹre ọvo rẹ iruo rẹ aghwoghwo rayen, Iseri ri Jihova vwẹ ukoko ọvo de si ileta vwo rhe elọkpa rehẹ ekogho na, vwo dje ọdavwaro phia fikirẹ iruo rẹ ayen ruẹ. O gbe elọkpa na unu rẹ ayen vwọ mrẹ ileta na. Ọvo usun rẹ elọkpa na da vuẹ Jefferson rọ dia ọkpako rẹ ukoko nẹ, “Mi rori jovwo nẹ Iseri ri Jihova vwo utuoma kpahen elọkpa.” Jefferson de dje fiotọ kẹ nẹ ọyena dia uyota-a. Eta re vwo ruiruo vwẹ ileta na vwerhen elọkpa na oma mamọ tẹdia rẹ ayen da reyọ ileta na vwọ tamu anurhoro rẹ ogba rẹ elọkpa na. Ọlọkpa ọfa da rha ta: “Ọnana sa nẹrhẹ ihwo efa vwẹ omamọ rẹ ẹro vwo ni avwanre.”

 Edna vẹ Ednalyn ayen ekobaro b rẹ ọkieje. Kidie nẹ ayen vwo inẹtwọku vwẹ uwevwin raye-en, ayen rha sa vwomaba ukoko rayen vwo ru uyono womarẹ vidio kọnfrẹsini-i. Ọtiọyena, ayen da vwẹ ifonu se ohwo rọ dia kẹrẹ ayen rọ dia Oseri-i, ayen da nọ sẹ o se churu ayen fi Wi-Fi rọyen je vuẹ nẹ ayen cha hwosa. Aye na da vwẹ uphẹn kẹ ayen vwo churufio ọphẹn. Ọke rẹ Edna vẹ Ednalyn vwo durhie nẹ ọ vwomaba omẹvwa na, o de ru ọtiọyen. Asaọkiephana, aye na, ọmọ rọyen ọvo vẹ ivwrọmọ rọyen ivẹ nene Iseri na yono Baibol na ji kpo emẹvwa rẹ Inenikristi ọkieje.

 Iniọvo re dia ekogho ọvo durhie ihwo re dia kẹrẹ ayen, e re vẹ ayen gbe ruiruo, vẹ ihwo efa rhe kerhọ rẹ ota rẹ otu ra cha vwọphia womarẹ vidio kọnfrẹsin. Ellaine, rọ wian vwẹ họspito ọvo vwẹ ekogho na ke siomauko ro vwo durhie ihwo re vẹ ọyen gba wian kuẹgbe. O rori nẹ ọ sa dianẹ idọktọ evo vwẹ ẹro ọchọchọ vwo nẹ Iseri na. Dedena, o si ovuẹ vwo durhie idọktọ rehẹ họspito na kerẹ igbeyan. Ihwo re ma bẹn kẹ edurhie vwẹ usun rẹ idọktọ na yen aye gbe ọshare ọvo. Ẹkẹvuọvo, ro vwo roro je nẹrhovwo kpahọn nu, ọ da vwẹ ifonu si ovuẹ rẹ edurhie rhe ayen. Aye na da kpahen: “Wọ guọnọ nẹ me vwomaba ẹga wẹn?” Ellaine da ta nẹ kohwo kohwo yen vwo uphẹn ro vwo kpo omẹvwa na, ọ dia Iseri ri Jihova ọvo-o. Vwẹ ẹdẹ rọ vwọ kpahọn, o de gbe Ellaine unu nẹ aye gbe ọshare na fobọ vwomaba omẹvwa na womarẹ vidio kọnfrẹsin! Ellaine da ta: “Tavwen omẹvwa na ki kuphiyọ, aye na de si ovuẹ rhe vwe tanẹ: ‘Ọna yen obọ rẹsosuọ ri mi vwo kpo omẹvwa rẹ Iseri ri Jihova. O je vwe. Oma vwerhen ovwẹ. Wẹkobiruo wo vwo durhie uvwe.’ ”

 Ellaine durhie idọktọ 20 rhe omẹvwa na, oma vwerhenrọ nẹ 16 rhere. Kerẹ Pọl, ọ da ta: “Oma vwerhen ovwẹ nẹ mi fiudugberi vwo ‘ghwoghwo iyẹnrẹ esiri rẹ Ọghẹnẹ na’ vwọ kẹ ihwo re me vẹ ayen gba wian.”​—1 Tẹsalonaika 2:2.

 Ọga rẹ akpọeje na nẹrhẹ erọnvwọn gan kẹ ihwo eje. Ẹkẹvuọvo, iniọvo avwanre re dia ẹkuotọ rẹ ame riariẹ phiyọ na vẹ asan efa sa sẹro aghọghọ vẹ uruemu abavo rayen, womarẹ ayen vwo ru oborẹ ayen se ru vwo bru ihwo efa uche je vwẹ ukẹcha kẹ ayen.​—Iruo rẹ Iyinkọn Na 20:35.