Irma rọ dia Germany joma te ẹgbukpe 90 re. Kidie nẹ o vwo asidẹnti egangan abọ ivẹ, ji kpo omaẹbẹre sansan, o rhe se vwobọ vwẹ iruo rẹ aghwoghwo ri nẹ uwevwin kpo uwevwin kirobo ro ruẹ jovwo-o. Ọtiọyena, kọ vuẹ ihwo efa kpahen esegbuyota rọyen womarẹ ileta ro siẹ vwo rhe ihwo rẹ orua vẹ igbeyan. Ihwo nabọ rhiabọreyọ ileta rẹ uchebro vẹ ọbọngan rẹ Irma siẹ vwo rhe ayen, ayen tobọ vwẹ ifonu se, rẹ ayen nọ kpahen ọke ro che vwo si efa rhe. Ihwo buebun si ileta rẹ akpẹvwẹ bro ra, je vuẹ nẹ ọ rhoma si ileta efa rhe ayen. Irma da ta: “Enana eje kẹ vwẹ omavwerhovwẹn je nẹrhẹ mi se vwobọ vwẹ iruo rẹ aghwoghwo na vọnvọn.”

 Irma ji siẹ ileta vwo rhe ihwo buebun re ghwore. Ọ da ta: “Aye ọvo rọ kpakore vwẹ ifonu vwo se vwe, ọ da vuẹ vwẹ nẹ ileta mi si rhe ọyen bọn ọyen gan ọke rẹ ọshare rọyen vwo ghwu. O phi ileta na phiyọ Baibol rọyen, kọvwọnvwọn kovwọnvwọn kọyen o vwo se. Aye ọfa rẹ ọshare rọyen ghwuru o kri nọ-ọ na, je tanẹ ileta mi si rhe ọyen yen ma chọn ọyen uko vwọ vrẹ eta rẹ olori ẹga rọyen. Kidie nẹ o vwo enọ buebun, ọ da nọ vwẹ sẹ mi vwo uphẹn rere ọyen kọn bru vwe rhe.”

 Ugbeyan rẹ Irma ọvo rọ dia Oseri ri Jihova-a rọ kua kpo asan oshesheri vuẹrẹ nẹ o si ileta rhe ọyen. Irma da ta: “Aye na nabọ sẹro rẹ ileta na eje. O vwo ghwu nu, ọmọtẹ rọyen da vwẹ ifonu vwo se vwe. Ọ da vuẹ vwẹ nẹ ọyen se ileta na eje ri mi si rhe oni rọyen, ọ da nọ vwẹ sẹ mi ji se si ileta tiọyena rhe ọyen.”

 Irma nabọ riavwerhen rẹ iruo aghwoghwo rọyen. Ọ da ta: “Me rẹ Jihova ọkieje nẹ ọ kẹ vwẹ ẹgba me sa vwọ ga. Dede nẹ mi che se kpo aghwoghwo ri nẹ uwevwin kpo uwevwi-in, mi ruẹ asan rẹ ẹgba mẹ teri.”