Vwẹ 2017, ẹko rẹ Iseri ri Jihova evo da ruo okọ vwo nẹ ubrakpọ ri Mosquito (Miskito) rọhẹ Nicaragua. Odẹ rẹ okọ rayen na yen Sturi Yamni. Ọvo vwẹ usun rayen re se Stephen da ta: “Oborẹ avwanre guọnọre yen avwanre vwo phi udu phiyọ awọ rẹ ẹmẹko rẹ iseri ri dia ekogho robọ je te je chọn ayen uko vwo ghwoghwo iyẹnrẹn esiri na vwẹ ekogho rayen rọ vwa ruarho na.”

 Iseri ri Jihova 12 nana de vrẹ nẹ Pearl Lagoon ayen de muo oyan ro gron vwo te iroko 200 phiyọ vwo kpo Río Grande de Matagalpa. Jẹ ayen nama riẹn nẹ odẹ rẹ okọ rayen na ro mudiaphiyọ “Iyẹnrẹn Esiri” vwẹ ejajẹ ri Miskito na che rhi fierere kẹ ihwo re dia kẹrẹ urhie na-a. Ayen vwọ gua oma rẹ inọke 12 nu, uche ason rẹ ayen domaji de rovwon oma herọ-ọ. Iseri nana de ri te asan rẹ ayen ra na, omo orere re se La Cruz de Río Grande. Iseri esan ri dia ẹkuotọ na de rhiabọ dede iniọvo eshare vẹ eya eghanghanre nana.

 Vwẹ ason yena, oghwọrọ da phia. Ogiribo ọgangan de dju, osio na da rhọ gangan vwẹ ekogho rẹ urhie ride rehẹ Río Grande de Matagalpa. Vwẹ uvwre rẹ inọke evo urhie na da rhe vọn muavwehwẹ, o de rhi ku ro evun rẹ orere na vwẹ ẹdẹ ivẹ. Ame de ri ku Ọgua Ruvie vẹ iwevwin rẹ ihwo buebun vwẹ La Cruz. Iniọvo ri nẹ asan ọfa rhe na da vwẹ ukẹcha kẹ ihwo rẹ ọko na vwọ djẹ nẹ uwevwin rẹ ayen rẹ ame kuru na. Egenege rẹ oniọvo ọvo ro vwo ibruwevwin ivẹ yen buebun rayen diare vwẹ ason ivẹ.

 Vwẹ ason rẹ erha rọyen, osun ri La Cruz de bru iniọvo nana ri nẹ asan ọfa rhe na ra nokpẹ rẹ ukẹcha mie ayen. Rọ vwọ dianẹ okọ rayen re se Sturi Yamni na yen okọ vuọvo rọ sa gua vwẹ urhie na rọ vọnre vwẹ ọke yena na, osun na da rẹ iniọvo na nẹ ayen chọn ọyen uko vwo mu ihwo re sa vwẹ ukẹcha phia vwo kpo ọko ọfa rẹ oghwọrọ na ji te oma. Omavwerhen iniọvo na ayen de nene ayen wiankugbe.

 Urhiọke rọ vwọ kpahọn, iniọvo erha da vwomaba ihwo re guọnọ vwẹ ukẹcha phia na. Stephen da ta: “Vwẹ ọke nana, jẹ ọgbọghọ rẹ urhie na ganre mamọ re. Irhe ride ri ghwie notọ re phorhẹ vwẹ enu rẹ urhie na, ọkẹre na ra djẹ mamọ, ọ djẹ kpakpata vrẹ iroko 18 vwẹ unọke ọvo.” Dede nẹ ebẹnben nana ejobi herọ, jẹ avwanre se bi okọ rẹ avwanre na te emeko erha.

 Iniọvo erha nana re vwomaba ayan na reyọ uphẹn nana vwọ vwẹ uchebro vwọ kẹ ihwo re dia eko na kirobo rẹ ayen guọnọre vwẹ ọke yena. Iseri na da ghare Awake ri 2017 ọvo ro vwo uyovwinrota na “When Disaster Strikes—Steps That Can Save Lives” vwọ kẹ ihwo na, uyovwinrota na nabọ fo aruọke dẹn.

 Oborẹ iniọvo na ru vwọ kẹ ihwo re dia ekogho rẹ oghwe na kuru na nabọ da ayen aro dẹn. Ihwo evo vwẹ ọko na da ta: “Ayen vwo owenvwe rẹ ayen vwọ vwẹ ukẹcha phia vwẹ ọke re bẹnbẹn.” Efa ji vwo oniso nẹ, “Ayen ghini vwo ẹguọnọ rẹ irivẹ rayen.” Ayen vwọ mrẹ ẹgbaẹdavwọn rẹ iniọvo nana ayen vwọ vwẹ ukẹcha vwọ kẹ ihwo rẹ ẹga rayen vẹ ihwo efa buebun re, ihwo rehẹ ọko na de rhi vwo owenvwe rẹ ayen vwọ kerhọ rẹ ovuẹ ro nẹ Baibol na rhe.