Ihwo rẹ ephẹrẹ, uvwiẹ kugbe ẹgborho sansan dia evunrẹ asan ọvo rọ fọre riẹn ro sherabọ kẹ irere ride vwẹ Amazon rain forest rọhẹ South America. Vwẹ July 2017, Iseri ri Jihova 13 de kpo oyan vwẹ Urhie ri Maroni kugbe irhie itete vwẹ ẹbẹre rẹ ọnre va nẹcha vwẹ French Guiana. Die yen ọdavwẹ rayen? Ayen guọnọ hwarhiẹ iphiẹrophiyọ rọhẹ Baibol na vwo rhe ihwo re dia kẹrẹ urhie na.

 Emeranvwe ọvo tavwen ayen ki kpo oyan na rọ reyọ ẹdẹ 12, ayen de ru omẹvwa ọvo vwo muegbe rẹ oma rayen. Winsley da ta: “Avwanre yono kpahen irere na, ihwo na, kugbe oborẹ egbemuo rẹ avwanre se vwo fiotọ.” Ohwo vuọvo che mu iroba rẹ ame cha sa ro-o, ro che phi ebọkpọ vẹ amwa rọ sa gba siẹ irhe sherhẹn phiyọ. A cha ro aropleni abọ ivẹ, ji chidia evunrẹ okọ vwẹ inọke buebun.

 Ẹro vọ yen ihwo ra sanere vwọ kẹ oyan nana vwo ni uphẹn ro te ayen obọ na? Claude vẹ Lisette ri te edje re vwo wontọ nẹ iruo re, brokpakpa rhiabọreyọ edurhie na. Claude da ta: “Oma vwerhen ovwẹ mamọ, dedena omoshọ ji mu vwe. Kidie mi nyo ikuegbe buebun ro muoshọ dẹn kpahen irhie evo rehẹ oboyin na re djẹ ọkẹre mamọ.” Vwọ kpahen oshọ ro muro, Lisette da ta: “Me ro ẹnwan kpahen oborẹ me sa vwọ jẹ ephẹrẹ rẹ Amerindia.”

 Mickaël rọ dia ọvo usun rẹ ihwo re rare na ji vwo ẹwẹn tiọyen. Ọ da ta: “Avwanre ghwa nabọ vughe ihwo ri Wayana-a. Ọtiọyena, mi de ru ehiahiẹ kpahen ayen vwẹ intanẹti rere me sa vwọ riẹn uyeren vẹ eta rayen evo.”

 Shirley rọ vẹ ọshare rọyen Johann gbe kpo oyan na, si ephẹrẹ sansan ra jẹ vwẹ irere re kẹrẹ urhie na phiyọ ọbe. Ọ da ta: “Avwanre danlodu ividio sansan vwẹ evo usun rẹ ephẹrẹ na vwẹ jw.org, avwanre da je dẹ ọbe re se vwo yono eta evo vwẹ ephẹrẹ ri Wayana.”

 Vwẹ Tuesday, July 4, iniọvo na da ro aropleni vwẹ Saint-Laurent du Maroni vwo kpo Maripasoula, rọ dia orere otete ọvo vwẹ asan ro sherabọ vwẹ French Guiana.

 Vwẹ uvwre rẹ ẹdẹ ẹne, iniọvo na da ro okọ itete re churu ijini si re se pirogue, re ghwoghwo vwẹ ọko sansan rehẹ orhoma rẹ irhie itete rẹ ame rayen djẹ rua urhie ri Maroni na. Roland rọ dia ọvo usun rẹ ihwo ri kpo oyan na da ta: “Ihwo rẹ Amerindia na vwo omavwerhovwẹn kpahen ovuẹ ri Baibol na. Ayen vwo enọ buebun, evo rayen tobọ guọnọ nẹ avwanre vwẹ Baibol vwo yono ayen.”

 Vwẹ ọko ọvo, Johann vẹ Shirley ghwoghwo ota kẹ aye gbe ọshare ọvo re dia ighene. Omoni rẹ aye na hwe oma rọyen o krinọ-ọ. Johann da ta: “Avwanre dje ividio re sẹ A Native American Finds His Creator kẹ ayen. Ividio na te ayen ẹwẹn mamọ. Ayen da vwẹ imel adrẹsi rayen kẹ avwanre rere a sa rha ta ota.”

 Asan ro me sherabọ rẹ ayen rare vwẹ orhoma rẹ urhie na yen Antécume Pata. Ohwo ro suẹn ọko na rhọnvwe kẹ Iseri na rẹ oma rayen bruku nẹ ayen churu emwa rayen si irhe sherhẹn vwẹ uphẹphẹ. Ayen de ji nene emotọ rẹ asan na họ vwẹ urhie na.

 Ayen vwo vrẹn nẹ etiyin, ayen de kpo ọko re se Twenké, ayen vwo te oboyin, ayen da mrẹ nẹ ihwo na vwere ohwo rayen ọvo ro ghwuru. Éric rọ dia ọvo usun rẹ ihwo ri ru ọrhuẹrẹphiyotọ rẹ oyan na da ta: “Osun rẹ ọko na re se ‘Grand Man’ da rhọnvwe kẹ avwanre nẹ e se kpo kasan kasan vwẹ ọko na, re bru ihwo uche. Osun rẹ orere na vẹ orua rọyen vwo ọdavwaro kpahen ẹkpo rẹ avwanre se kẹ ayen vwẹ Baibol ri Wayana ọvo. Avwanre ji dje ividio sansan ri shekpahen evrẹnushi re vuve rọyen vwẹ Baibol na kẹ ayen.”

 Ayen vwo nẹ etiyin, ayen da ro aropleni wan urhie na, nẹ Maripasoula vwo kpo omorere ọvo re se Grand-Santi. Ayen de ghwoghwo kẹ ihwo re dia orere na nẹ Tuesday fiẹ Wednesday. Vwẹ Thursday, ayen da rhoma mu oyan phiyọ vwẹ inọke iyorin gbubro wan Urhie ri Maroni vwo kpo ọko re se Apatou.

 Vwẹ ẹdẹ re teri tavwen e ki te ẹdẹ rọ koba rẹ ọyan na, ayen de kpo irere ri Maroons rehẹ evunrẹ egbo. Emọ rẹ ihwo rẹ Africa re mu kpo eviẹn vwẹ South America ọke rẹ Suriname vwọ hẹ otọ rẹ usuon rẹ ẹkuotọ ọfa yen dia irere na. Iseri ri Jihova na de durhie kohwo kohwo rẹ ayen mrẹre vwo kpo omẹvwa ọvo rẹ ayen ruru vwẹ egbo na vwevunrẹ utughe rode rẹ ayen vwo vi. Claude da ta: “Ọke rẹ avwanre vwọ mrẹ ihwo buebun re rhere, udu rẹ avwanre da vọn vẹ aghọghọ. Urhiọke rẹ ẹdẹdẹ yena yen avwanre durhie ayen!” Karsten ro ji kpo ọyan tiọyen dẹvo-o da vwẹ ephẹrẹ ri Aukan vwọ ta ota rotu ro vwo uyovwinrota na “Is This Life All There Is?” Ihwo ujọne gbẹ uhwọvo yen nẹ irere sansan rhe omẹvwa na.

 Re vwo ku oyan na phiyọ, ighwoghwota na de rhivwin kpo Saint-Laurent du Maroni. O gbe ayen unu mamọ rẹ ayen vwọ mrẹ oborẹ ihwo na vwo urhurusivwe rẹ ovuẹ na te, kugbe oborẹ ayen rhiabọreyọ ẹbe, ji ni ividio sansan rẹ Iseri ri Jihova ruru.

 “Lisette da ta: “Unu che se gbe oborẹ oma vwerhen ovwẹ te-e.” Cindy da je ta: “Uphẹn tiọna de rhiephiyọ ọke ọfa. Me cha rẹ nẹ a vwẹ ovwẹ boma. Wọ riavwerhen rẹ aghọghọ rẹ oyan na-a, wo che se vwo ẹruọ mẹ-ẹ.”

 Omavwerhovwẹn rẹ ayen mrẹre nẹrhẹ evo usun rẹ ihwo re rare na vwo ẹwẹn rẹ ayen vwo rhivwin. Mickaël da ta: “Avwanre choma ra vwọ rhoma ra.” Winsley kua kpo Saint-Laurent du Maroni re. Claude vẹ Lisette re vrẹ ẹgbukpe 60 re, ji brorhiẹn rẹ ayen vwo kpo Apatou.