Bryn, rọ dia North Carolina, U.S.A., ọyen ọvo usun rẹ Umẹ Rọvwẹrote Omaesivwo, re vẹ họspito gba wian vwọ vwẹrote ọdavwẹ rẹ Iseri ri Jihova re muọga.

 Fikirẹ ọga ri COVID-19, họspito buebun rha rhọnvwa kẹ erhorha nẹ e ro evun rọye-en. Bryn de se ohwo rọ vwẹrote irueru rẹ ẹga vwẹ họspito na sẹ o vwo obo ro se ru vwọ vwẹ ukẹcha kẹ Iseri ri Jihova re muọga vwẹ etiyin.

 Bryn de nene ohwo rọ vwẹ ukẹcha kẹ ohwo rọ vwẹrote irueru rẹ ẹga vwẹ họspito na ta ota. Kidie nẹ ọ cha sa ro evun rẹ họspito na-a, Bryn da nọ sẹ a sa vwẹ ukeri rẹ ifonu rọyen vwọ kẹ Iseri ri Jihova rehẹ etiyin, rere o se nene ayen ta ota. A da rhọnvwe kẹ.

 Bryn de ji roro kpahen ihwo re wian vwẹ họspito na. Ọtiọyena, ọ da vuẹ ohwo ro ke se na nẹ, o vwo ọdavwaro kpahen owian rẹ ihwo rẹ hospito na ruẹ, je nọ ayen sẹ oma rayen nabọ gan, kidie o se mrẹ nẹ ofu dje ihwo buebun vwẹ asan eje, ma rho kẹ ihwo re wian vwẹ họspito fikirẹ ọga ri COVID-19 na.

 Ohwo ro seri na da vuẹ nẹ ọga ri COVID-19 na nẹrhẹ ofu rẹ akpọ dje ihwo rẹ họspito na hwe.

 Bryn da ta: “Iwẹbsaiti avwanre vwo evuẹ re sa chọn ohwo uko vwo yerin ghene ofudjevwe. Wọ da guọnọ ubiota na ‘stress’ vwẹ jw.org, wọ cha mrẹ erọnvwọn evo re sa chọn ewiowian na uko.”

 Rẹ ayen je vwọ ta ota na, ohwo na da guọnọ ubiota na “stress” vwevunrẹ iwẹbsaiti na, ọ da mrẹ erọnvwọn sansan ri shekpahọn. Ọ da ta: “Ghwo! Mi che dje ọnana kẹ ohwo rọ vwẹrote irueru rẹ ẹga vwẹ họspito na. Ọnana che fierere vwọ kẹ ewiowian avwanre na vẹ ihwo efa, me cha teyọnphia rere me gharọ vwọ kẹ ayen.”

 Idughwrẹn evo vwọ wan nu, Bryn de nene ohwo rọ vwẹrote irueru rẹ ẹga vwẹ họspito na ta ota, ohwo na da vuẹ nẹ ayen fuẹrẹn iwẹbsaiti na ji teyen ẹbe ri shekpahen ofudjevwe vẹ ẹnwan vwọ phia. Ayen gharerọ kẹ inọsu vẹ ihwo efa re wian vwẹ họspito na.

 Bryn da ta: “Ohwo rọ vwẹrote irueru rẹ ẹga vwẹ họspito na kpẹvwẹ ovwẹ mamọ vwọ kẹ owian rẹ avwanre vẹ ẹbe ra riẹn si na. Ọ tare nẹ ọ chọn ayen uko mamọ.”