Danielle rọ dia ọvo usun rẹ Iseri ri Jihova vwẹ South Africa, mrẹ ekpu rọ chọrọ ọneki ọvo ẹro vwẹ asan ra da shẹ ikofi. Iwọlẹti rọyen vẹ ikadi ri ATM ra vwọ dẹ emu riosa yehẹ evunrẹ ekpu na. Kidie nẹ ọ guọnọ mu ekpu na rhe ohwo ro vworo, Danielle kọ guọnọ ukeri rẹ ifonu yẹrẹ ukeri rẹ asan rẹ ohwo na dia, ẹkẹvuọvo odẹ rẹ ọshare ọvo yen ọ mrẹre. Ọ davwẹngba sẹ ọ sa guọnọ ọshare na womarẹ ibanki rọyen, ẹkẹvuọvo ọ wianre-e. Dedena ọ dobọji-i, o de se idọktọ ọvo rọ mrẹ ukeri rẹ ifonu rọyen vwẹ resiti ọvo rọhẹ evunrẹ ekpu na. Ohwo rọ kpahenphiyọ use na da tanẹ ọyen cha vwẹ ukeri rẹ ifonu ri Danielle vwọ kẹ ọshare na.

 O gbe ọshare na unu mamọ rẹ use vwo nẹ ọfisi ri dọktọ na bro rhe; a da vuẹ nẹ Danielle guọnọ vwẹ ekpu rọyen rọ mrẹ tọrọ vwọ kẹ rhivwin. Ọ vwọ rhe re reyọ ekpu na, Danielle vẹ ọsẹ rọyen de yeren. Ayen da vuẹ oboresorọ ayen vwọ davwẹngba rayen eje rere ayen sa vwọ vwẹ ekpu na vẹ ekuakua rehẹ evun rọyen kẹ. Ayen da tanẹ kerẹ Iseri ri Jihova, ayen davwẹngba vwo yeren akpọ nene uchebro ri Baibol. Ọyen sorọ ayen vwọ guọnọ dia ihwo rẹ uyota ri ruẹ emu rẹ ọghọ ọkieje.—Hibru 13:18.

 Inọke evo vwọ wan nu, ọshare na de si ovuẹ rhe Danielle vẹ ọsẹ rọyen, rọ vwọ rhoma kpẹvwẹ ayen fikirẹ ekpu vẹ iwọlẹti na. Ọ da ta: “Ẹgbaẹdavwọn rẹ ovwan vwọ guọnọ ovwẹ mrẹ na davwaro mamọ. Oma vwerhen ovwẹ me vwọ mrẹ wẹ vẹ orua wẹn. Ọkieje yen me cha vwọ karophiyọ uruemuesiri wẹn na. Me guọnọ toro igho nana vwo djephia nẹ oborẹ wo ruru na davwaro mamọ. Me riẹnre nẹ ovwan vwẹ ekuakua sansan vwo ze vwẹ ẹga rẹ Ọghẹnẹ rẹ ovwan na. Omamọ uruemu re me mrẹre vwẹ oma rẹ Danielle na ghwe djephia nẹ omamọ rẹ ihwo yen ovwan ruẹ. Ovwan kobiruo mamọ, e jẹ Ọghẹnẹ bruba kẹ iruo rẹ ovwan.”

 Emeranvwe evo vwọ wan nu, ọsẹ ri Danielle da rhoma mrẹ ọshare na, ọshare na da vuẹ obo re phia kẹ ọyen, rọ vwọ mrẹ ipọsu ọvo ro ghwruru. Rọ vwọ dẹ emu vwẹ oghwa ọvo, ọ da mrẹ ipọsu ọvo vwẹ otọ. Rọ vwọ mrẹ aye ro vwo ipọsu na, ọ da reyọ kẹ je vuẹ oboresorọ o vwo ru ọtiọyen. Kidie ọyen obo re ji ru kẹ ọyen o krinọ-ọ na. Ọ da ta: “Uruemuesiri re dje kẹ ohwo se muo ji vwo dje uruemuesiri kẹ ihwo efa, ọ me rhe nẹrhẹ akpeyeren yovwin kẹ ihwo eje.”