Marta rọ dia Oseri ri Jihova vwẹ Guatemala yono ephẹrẹ ri Kekchi rere o se vwo ghwoghwo ovuẹ ri Baibol na kẹ ihwo re jẹ ephẹrẹ yena. Ẹdẹ ọvo, ọ da mrẹ ọshare ọvo ro nẹ evunrẹ họspito ọvo cha. Ọshare na pha kerẹ ohwo ro nẹ ọko ri Kekchi ọvo rhe, rọhẹ ekogho rọ vọnre vẹ igbenu. Iseri ri Jihova fobọ ghwoghwo ota te oboyi-in. O de bro ra re ghwoghwo ota kẹ vwẹ ephẹrẹ ri Kekchi ro nyo emerha rọyen na.

 Marta da nọ sẹ ọyen sa vwẹ uyono ri Baibol mu kẹ. Ọshare na da rhọnvwe kẹ vẹ omavwerhovwẹn, ẹkẹvuọvo ọ da vuẹ nẹ ọyen vwo igho rọ vwọ hwosa phiyọ uyono na-a. Marta da vuẹ ọshare na nẹ Iseri ri Jihova vwẹ Baibol vwo yono ihwo ọphẹ. Ọ da je vuẹ nẹ o se yono womarẹ ifonu, orua rọyen je sa vwomaba. Ọshare na da rhọnvwe. Kidie nẹ ọshare na sa jẹ ji se Spanish, Marta da vwẹ Baibol ri New World Translation of the Holy Scriptures vwẹ ephẹrẹ ri Spanish kẹ. Ọ da je kẹ ọbe re se What Does the Bible Really Teach? vwẹ ephẹrẹ ri Kekchi. Udughwrẹn rọ vwọ kpahọn, ọshare na vẹ aye rọyen kugbe emọ ivẹ rayen da ton uyono ri Baibol phiyọ vẹ Marta womarẹ ifonu. Abọ ivẹ yen ayen ruẹ uyono na vwẹ udughwrẹn. Marta da ta: “Kidie nẹ me sa jẹ Kekchi ọtiọye-en avwanre ke vwẹ Spanish vwo ruẹ uyono na, ọshare na me fan kpo ephẹrẹ ri Kekchi vwọ kẹ aye rọyen. Emọ rayen nyo Spanish.”

 Ọshare na ipastọ vwẹ Ishọshi rọyen. Ko yono ihwo rẹ Ishọshi rọyen obo re yoniro vwẹ uyono ri Baibol rọyen. Oborẹ ihwo rẹ ishọshi na yonori je ayen mamọ, ayen da nọ kpahen asan ro de yono iyono kpokpọ nana. Ọ ghwa vwọ vuẹ ayen kpahen uyono ri Baibol rọyen, ayen ọvuọvo ke vwomaba uyono na. O rhe kri-i, ihwo ri te omarẹ 15 keyen vwomaba uyono ri Baibol na rẹ ayen ruẹ womarẹ ifonu. Ọke vwọ yanran na, kẹ ayen muẹ agboro kẹrẹ ifonu na rere ihwo eje se vwo nyo eta na fiotọ.

 Marta vwọ vuẹ ekpako ukoko rọyen kpahen uyono ri Baibol na, ọvo usun rẹ ekpako na de kpo ọko rẹ ihwo rẹ Marta yono na dia. O de durhie ayen nẹ ayen rhe kerhọ kẹ ota rẹ otu ọvo rẹ oniruo okinriariẹ a cha ta vwẹ ọko ro sherabọ te unọke ọvo siẹrẹ a da ro imoto yẹrẹ inọke ivẹ siẹrẹ a da vwẹ owọ yan. Ayen da rhọnvwe nẹ ayen cha rhe, ihwo 17 keyen rare.

 Udughwrẹn evo re kpahenrọ, oniruo okinriariẹ na vẹ iniọvo evo da ghwọrọ ẹdẹ ẹne vwo yono ihwo na. Vwẹ urhiọke, ayen nughe rẹ ividio sansan rẹ ephẹrẹ ri Kekchi vwẹ jw.org, ayen mi ji yono ibroshọ re se Amono Yin Ruẹ Ọhọre ri Jihova Nonẹna? Vwe oghẹruvo, ayen mi nẹ ividio evo rehẹ JW Broadcasting. Oniruo okinriariẹ na ji vwo ọrhuẹrẹphiyotọ rẹ ohwo ọvuọvo vwo vwo ohwo rọ vwẹ Baibol vwo yono.

 Vwẹ uvwre rẹ ẹdẹ ẹne na, iniọvo na ji ghwoghwo vwẹ ọko ri Kekchi sansan ri ghwe sheri-i, ayen de ji durhie ihwo na rhe omẹvwa oghẹresan ọvo. Vwẹ omẹvwa na, iniọvo na de jiro vwọ kẹ ihwo 47 re rhere na nẹ ayen vwo ọrhuẹrẹphiyotọ rẹ ohwo ro che yono ayen Baibol na. Orua uhwọvo de ghini ru ọtiọyen.

 Emeranvwe evo vwọ wan nu, ekpako na de vwo ọrhuẹrẹphiyotọ rẹ ayen vwo ru omẹvwa ọvo vwẹ oba rẹ kudughwrẹn kudughwrẹn vwẹ ọko ri Kekchi na. Enẹna, ihwo ri te omarẹ 40 yen kpo emẹvwa ọkieje. Iniọvo na vwo ru ẹkarophiyọ rẹ ughwu ri Jesu vwẹ ọko na, oma da vwerhen ayen mamọ nẹ ihwo ri te 91 sa rhe.

 Marta vwọ karophiyọ oborẹ enana ejobi tonphiyọ wan vẹ erere ro nuro rhe, ọ da ta: “Me kpẹvwẹ Jihova mamọ. Ọke evo mi roro nẹ mi che se ru bun vwẹ iruo rẹ ẹga na-a. Ẹkẹvuọvo, Ọghẹnẹ sa vwẹ avwanre vwọ vwẹ ukẹcha kẹ ihwo efa. Ọ riẹn obo rehẹ ubiudu rẹ ihwo rehẹ ọko na, ọtiọyena o de si ayen kẹrẹ ihwo rọyen. Jihova vwo ẹguọnọ rayen.”