Vwẹ ukpe ri 2005, o vwo aye ọvo vwẹ India re se Sowbhagya rẹ ọshare rọyen ghwu jovwo. Vwẹ ọke ọshare na vwọ hẹ akpọ, ọ nabọ vwẹrote aye rọyen vẹ ọmọtẹ rayen rọhẹ ẹgbukpe erha re se Meghana. Enẹna, Sowbhagya mrẹ bẹnbẹn rọ vwọ vwẹrote oma rọyen vẹ ọmọtẹ rọyen.

 Marho, ihwo rhọnvwa rhiabọreyọ Sowbhagya-a. Ihwo rẹ orua rọyen niro vẹ ọmọtẹ rọyen phiyọ ihwo re yara ayen ke ria, ayen je vuẹ ọkieje nẹ ọyen oghwa vwọ kẹ ayen. Kidie nẹ ọ guọnọ uchebro, Sowbhagya ko kpo ishọshi, ẹkẹvuọvo ihwo rẹ ishọshi na niro sakamu kidie ogbere ọyen o ruẹ. Ọtiọyena, Sowbhagya kọ guọnọ iruo rere ọ sa vwọ vwẹrote oma rọyen vẹ ọmọtẹ rọyen. Dede nẹ ọ davwẹngba rọyen eje vwọ guọnọ iruo, jẹ ọ sa mrẹ-ẹ.

 Sowbhagya da ta: “Ofu rẹ akpọ dje vwe hwe, ọtiọyena, mi de brorhiẹn mi vwo hwe oma mẹ. Dedena, me riẹnre nẹ mi de ghwu, ọmọtẹ mẹ che hirharoku egbabọse buebun. Ọtiọyena, mi de brorhiẹn me vwọ reyọ arhọ mẹ vẹ ọ rẹ ọmọtẹ mẹ.” Kidie nẹ o nẹ oma rọyen kueku, o ji no nẹ e vwo ẹguọnọ rọye-en, Sowbhagya da ra dẹ obo ro che vwo hwe oma rayen.

 Sowbhagya vwọ hẹ itreni kpo uwevwin, Oseri ri Jihova ọvo re se Elizabeth de bro ra je nene ta ota. Sowbhagya da vuẹ nẹ ọyen vwo iruo-o, Elizabeth da ta nẹ ọ cha vwẹ ukẹcha kẹ vwọ guọnọ iruo. Elizabeth da je vuẹ nẹ ọyen kpo uyono ri Baibol. Ọnana gbe Sowbhagya unu mamọ kidie dede nẹ o kpo ishọshi buebun re, jẹ o ji rhi nyo kpahen ihwo ri yono Baibol na-a. Elizabeth de durhie Sowbhagya nẹ ọ rhe, rere o se vwo yono Baibol na.

 Sowbhagya vwo te uwevwin, o ji vwo ẹwẹn ro vwo hwe oma rọyen. Ẹkẹvuọvo, ohwo rẹ orua rọyen ọvo mu Meghana kpo oyan ọvo, ọtiọyena, Sowbhagya de brorhiẹn rọ vwọ hẹrhẹ ọmọtẹ rọyen tavwen o ki ru obo rọ guọnọ ru na.

 Vwẹ uvwre rẹ ọke yena, o de brẹ Elizabeth ra, Elizabeth da nabọ dede te oma. Elizabeth de dje ọbe na What Does the Bible Really Teach? vwọ kẹ. Sowbhagya guọnọ yono kpahen uyovwinrota na, “Where Are the Dead?” Uyovwinrota na jere fikirẹ ughwu rẹ ọshare rọyen. Vwẹ ẹdẹ yena, Sowbhagya de rhiabọreyọ uyono ri Baibol.

 Elizabeth de durhie Sowbhagya vwo kpo ọghwẹkoko re che ru vwẹ udughwrẹn rọ cha na, Sowbhagya de rhiabọreyọ edurhie na. Iyovwinreta rẹ ọghwẹkoko na jere mamọ tẹdia o de brorhiẹn nẹ ọ guọnọ dia ọvo usun rẹ Iseri ri Jihova. Ro vwo nẹ ọghwẹkoko na te uwevwin, ọ da mrẹ iruo.

 Sowbhagya ji yono Baibol na. Asaọkiephana, ukperẹ o vwo hwe oma rọyen, ọ da rhe mrẹvughe nẹ akpọ fobọ re yerin. O de bromaphiyame, ukuotọ rọyen, ọmọtẹ rọyen Meghana de ji bromaphiyame. Nonẹna, ayen ihwo ivẹ na ga kerẹ ekobaro rẹ ọkieje, Meghana je wian owian ri bẹtẹl nẹ uwevwin rọyen cha vwẹ asan re de ruiruo rẹ efanfan vwẹ India.

 Oma vwerhen Sowbhagya vẹ Meghana mamọ nẹ Elizabeth ta ota kẹ Sowbhagya vwẹ itreni, dje ọdavwẹ phia, je vuẹ uyota ri Baibol na! Ayen je kpẹvwẹ Jihova mamọ. Meghana da ta: “Ọ rha dianẹ avwanre yono uyota ri Baibol na jovwo-o, jẹ e shi avwanre krire. Oma vwerhen avwanre enẹna. Mẹvwẹ vẹ oni mẹ hẹrhẹ ọke avwanre cha vwọ rhoma gbane ọsẹ mẹ, yono kpahen Jihova, je vuẹ vwọ kpahen obo ri Jihova vwo sivwin arhọ avwanre.”