Clodean, ọyen ọvo usun rẹ Iseri ri Jihova rọ dia South Africa, re mu kpo họspito vwọ kẹ omaẹbẹrẹ. O vwo ega sansan vwẹ oma rọ cha nẹrhẹ o brorhiẹn rẹ oka rẹ omaesivwon rọ guọnọre. Tavwen a ke bẹrẹ vẹ ọke ra vwọ bẹrẹ nu yen oma vwọ rhọ je miavwọn, ọ je ro ẹnwan ọke buebun. Omarẹ idughwrẹn rẹ ihwe ro vwo rhivwin kpo uwevwin nu, jo ji se rhi chidia-a. Fikirẹ ọga ri COVID-19 na, ihwo gbe sa kọn bro ra-a.

 Kidie nẹ ọ guọnọ muomaphiyọ fikirẹ obo re phia kẹ-ẹ, Clodean da rẹ Ọghẹnẹ nẹ ọ kẹ ọyen ẹgba rere o se vwo bru ihwo efa uche. Vwẹ ọke rẹ oma rọyen vwo shephiyọ tẹdia ro de se chidia re, kpakpata o de se aye ọvo rọ dia oniọvo rẹ ohwo egodo rọyen, ro yono Baibol na vẹ Iseri ri Jihova jovwore, je dobọji. Clodean de dje ẹkpo ri Baibol evo re bọn ohwo gan vwọ kẹ, ọnana de mu aye na vwọ rhoma ton uyono ri Baibol phiyọ. Clodean je nabọ dje erere rọ herọ e de kpo emẹvwa rẹ Inenikristi vwọ kẹ, vwẹ ọke vuọvo na, o ji vwo imuẹro nẹ ohwo rọ vwẹ Baibol yono na se churufi uyono rẹ ukoko na womarẹ vidio kọnfrẹsin. Aye na de ghini churufi omẹvwa na je kpahenphiyọ onọ vwẹ ẹbẹre ra da nọ enọ vwẹ ọrhuẹrẹphiyotọ rẹ omẹvwa na.

 Clodean da rha ta ota vwọ kẹ oniọvo otete rẹ aye ro yono na, ro ji vwo owenvwe ro vwo yono Baibol na. Ọ tobọ vuẹ Clodean kpahen ihwo efa ri ji vwo owenvwe rẹ ayen vwo yono. Kẹ, die yen nẹ obuko rọyen rhe? Clodean da ton uyono ri Baibol phiyọ vẹ eya ẹne efa. Ẹkẹvuọvo, ikuegbe rọyen na vwoba vwẹ etiyi-in!

 Fikirẹ ọdavwẹ okokodo ri Clodean vwo kpahen ihwo efa, ọ da rhe ton uyono ri Baibol phiyọ vẹ eya ihwe efa​—⁠enana eje phiare vwẹ ọke rẹ ọga ri COVID-19 na​—⁠o de rhi vwo ihwo 16 rọ vwẹ Baibol yono! Evo usun rẹ ihwo na kpo emẹvwa rẹ Inenikristi ọkieje womarẹ vidio kọnfrẹsin. Kidie nẹ Clodean mu oma phiyọ erọnvwọn nana, ọ da chọn uko vwo si ẹwẹn vwo nẹ ebẹnbẹn rọyen na. O ji no nẹ o se bru ihwo efa uche kidie nẹ Jihova rọ dia “Ọghẹnẹ rẹ uchebro” bru ọyen uche vwẹ ọke ebẹnbẹn rọyen.​—⁠2 Kọrẹnt 1:​3, 4.

 Mavọ yen oma ru ihwo ri Clodean vwẹ Baibol vwo yono, kpahen oborẹ ayen yonori? Ọvo usun rayen da ta: “Me mrẹ erere vwẹ idjerhe buebun. Jẹ ọ rọ ma rho yen mi vwo yono kpahen odẹ rẹ Ọghẹnẹ. Ọnana rhe chọn vwẹ uko vwo sikẹrẹ Jihova.” Vwọ kpahen ohwo rẹsosuọ ri Clodean ke nene yono Baibol na kugbe, o muegbe rẹ omaebrophiyame enẹna. Erọnvwọn nana eje ri Clodean rhiẹromrẹ na nẹrhẹ oma vwerhọn mamọ. Vwọ kpahen omaẹbẹrẹ na, oma na je nabọ rhe gan mamọ rẹ.