Maria Lúcia ro nẹ Brazil rhe rioja rẹ ọga re se Usher’s syndrome, ọnana ọga ra riuku rọyen, rọ nẹrhẹ ihwo evo dierhọn, diunu ji memerha rhuẹro. E vwiẹrẹ kerẹ odierhọn, o de yono ephẹrẹ rẹ idin vwẹ ọke emọ. Ro vwo te omarẹ ẹgbukpe 30 re, ọ rha mrorẹ te-e. Dede nẹ o vwo ebẹnbẹn nana ejẹ, Maria Lúcia si oma nẹ ihwo-o. Asaọkiephana, ọ vrẹ omarẹ ẹgbukpe 70 re, jẹ o ji yeren akpọ rẹ omavwerhovwẹn vẹ akpọ ro vwo otọ.

 Maria Lúcia mrẹ Iseri ri Jihova vwẹ 1977, tavwen ẹro rọyen ki rhu. Ọ da ta: “Me mrẹ Adriano rọ dia Oseri ri Jihova okrinọ-ọ na, rẹ me vẹ ọyen gbe kpo isikuru ọvo jovwo. Ọ da vuẹ vwẹ kpahen ive rẹ Ọghẹnẹ veri kpahen iparadaisi vwẹ otọrakpọ na rọ cha vwẹ obaro na, rọ dia akpọ rẹ ihwo eje de che vwo omakpokpọ. Obo rọ vuẹ vwẹ na vwerhen ovwẹ oma mamọ, ọtiọyena, mi de rhiabọreyọ uyono ri Baibol. Okriri-i, ke me rhe ton omẹvwa ẹra phiyọ vwẹ ukoko ọvo rọhẹ Rio de Janeiro, rọ dia asan rẹ ikoko evo da fan eta rayen kpo ephẹrẹ rẹ idin. Me da rhe yanphiaro vwẹ ukoko na womarẹ rẹ ukẹcha ri Jihova, ji bromaphiyame vwẹ July 1978.”

 Ọke evo vwọ wan nu, Maria Lúcia da vwomaba ukoko re riẹn obo ra jẹ ephẹrẹ rẹ idi-in. Ọnana da rhe dia egbabọse vwọ kẹ ẹsosuọ, kidie o nyo obo ra ta vwẹ emẹvwa na-a. Iniọvo ivẹ da vwẹ ukẹcha kẹ. Ayen chidia kẹrẹ vwẹ emẹvwa na, ji siẹ obo ra ta na phiyọ ọbe kẹ. Maria Lúcia da ta: “Ki mi se ọbe na abọ buebun vwẹ obuwevwin, rere mi se vwo vwo ẹruọ rẹ ovuẹ na. Ọke vwọ yanran na, iniọvo eya ivẹ nana de rhi yono ephẹrẹ rẹ idin, ayen keyen fan kẹ vwẹ.”

 Orẹmrẹ ri Maria Lúcia vwọ braphiyọ na, ọ rha mrẹ oborẹ iniovo na djuabọ wa-an. Ọtiọyena, ona re vwo djobọte obọ rẹ ohwo siẹrẹ a da jẹ ephẹrẹ rẹ idin kọyen o vwo ruiruo. O djisẹ oborẹ ọnana mudiaphiyọ rọ vwọ ta: “Mi phi obọ mẹ phiyọ ọ rẹ ohwo rọ fan eta na kẹ vwẹ na. Vwẹ idjerhe ọtiọyena, ke me sa riẹn obo ro djuobọ wan.”

 Maria Lúcia dje ọdavwaro phia kpahen ukẹcha rẹ ihwo re fan eta kẹ na vwọphia. Ọ da ta: “Ayen okẹ eghanghanre ri nẹ obọ ri Jihova rhe, womarẹ ukẹcha rayen ke me mrẹ erere vwo nẹ emẹvwa, isikoko vẹ eghwẹkoko cha.”

 Maria Lúcia muomaphiyọ iruo rẹ aghowghwo na. Ọ vwẹ ona re vwo djobọte obọ rẹ ohwo siẹrẹ a da jẹ ephẹrẹ rẹ idin vwo ghwoghwo ota kẹ idin efa, ẹgbaẹdavwọn ro vwo ghwoghwo iyẹnrẹn esiri na je vwerhen idin na oma mamọ. Vwẹ ọkẹ rẹ ọga ri COVID-19 na, Maria Lúcia si ileta buebun womarẹ ukẹcha rẹ oniọvo rọyen ọshare re se José Antônio, ro dierhọn ji rhuẹro. a

 Mavọ yen Maria Lúcia ruro wan? Ọ da ta: “Me reyọ ẹbẹre rẹ iroba rọ pha phẹghẹ phẹghẹ rọ họhọ ibiẹbe ri L vwo ruiruo. Ọ chọn vwẹ uko vwo siẹ eta na phiọnphiọn ji si ayen phiyọ ẹko. Oniọvo mẹ José Antônio nabọ karophiyọ emu. Ọ vwẹ iyovwinreta vẹ ẹkpo ri Baibol sansan vwọ nẹ vwẹ, me da vwẹ ayen ba ileta na. Me davwẹngba vwo si eta na vwẹ idjerhe rẹ idin de se vwo ẹruọ rayen. Ọ dia idin eje yen se se eta re si phiyọ otọ-ọ.”

 Dede nẹ asaọkiephana Maria Lúcia rhuẹro re, jẹ ọ je dia ọgbowian. Karoline, rọ dia ọvo usun rẹ iniọvo re fan eta kẹ na da ta: “Maria Lúcia wian owian rẹ uwevwin rọyen eje, o ruẹ asan eje fuan je rhuẹrẹ erọnvwọn eje phiyọ ẹdia ro fo ayen. Oma vwerhọn ro vwo chere emu je ghanrọ vwọ kẹ igbeyan rọyen.”

 Ọkpako ọvo rọ ga vwẹ ukoko ri Maria Lúcia re se Jefferson da vwọba: “Maria Lúcia vwo ẹguọnọ okodo kpahen Jihova. Ọ ji vwo ẹguọnọ rẹ ihwo. Ọkieje yen o vwo ruẹ erọnvwọn ri che fierere kẹ ihwo efa. Ọyen ohwo rọ guọnọ erhuvwu rẹ ihwo efa.”​—Filipae 2:4.