Virginia, rọ dia ọvo usun rẹ Iseri Jihova, ro muọga rẹ obọ gbowọ re se locked-in syndrome. Oma rọyen ghwuru. Ọ sa mrorẹ ji nyẹme, ji rhiẹro rọyen ji rhurhu ayen, o ji se kpogho uyovwin rọyen ememerha. Ọ sa ta ota yẹrẹ ke gba re emu-u. Jovwo, ọyen ohwo vẹ omakpokpọ gbrọgbrọ. Ekẹvuọvo, vwẹ urhiọke rẹ ẹdẹ ọvo vwẹ 1997, obuko rẹ uyovwin rọyen da sa kain, asan na da miavwọn ọke grongron. Ọshare rọyen de muo kpo họsipito, ovwọnvwọn rẹ ẹdẹ vuọvo yena, o de shero. Udughwrẹn ivẹ vwọ wan nu, o de gegẹrovi vwẹ asan ra da vwẹrote ihwo rẹ oma rayen ganre kakaka-a, ọke yena jẹ oma rọyen ghwuru re jẹ e ji phi ijini ra vwọ wẹn (ventilator) phiyọ uwen rọyen. Ẹdẹ ibro, ọ sa karophiyọ emuvuọvo, yẹrẹ vughe oka rẹ ohwo rọ hepha dede-e.

 Virginia de gbikun rẹ obo re rhoma phia. “Ememerha na ẹgba ra vwọ karophiyọ emu ro rhe vwe ko rhivwin bru vwe rhe. Me da nẹrhovwo nẹ ọtọ ubiudu rhe. Me guọnọ ghwu jẹ ọmọ mẹ vwo rere o vwo jẹ oni evwo-o. Mi se vwo fiudugberi, ke me davwẹngba vwọ karophiyọ ẹkpo ri Baibol sansan re me riẹnre jovwo.

 “Ukuotọ rọyen, idọktọ de si vwe nẹ asan ra da vwẹrote ihwo rẹ oma rayen ganre na-a. Emeranvwe esan vwọ wan e vwo mu vwe kpo họsipito sansan vẹ asan ra da vwẹrote ihwo oma rayen ganre-e nu, e de mu vwe rhivwin kpo uwevwin. Ọke yena oma me ji ghwu, me je guọnọ ukecha rẹ ihwo efa mi ki se ru kemu kemu. Ofu rẹ akpọ de ghwe dje vwe hwe! Mi de no nẹ mi rhe fiemu kẹ Jihova kugbe ihwo efa-a. Me je ro ẹnwan kpahen ẹroevwote rẹ ọmọ mẹ.

 “Me da rhe ton isese phiyọ kpahen iniọvo efa ri ji hirharoku oka rẹ edia mẹ na re, o de gbevwunu mamọ kpahen obo rẹ ayen se ru vwọ kẹ Jihova vwẹ ẹdia tiọyena. Ukuotọ rọyen, me da rhe vwẹ ẹro abavo vwo ni ẹdia mẹ na je tẹnrovi oborẹ mi se ru. Tavwen ọga na ke tonphiyọ, me ghwa mrẹ ọke buebun ghwọrọ phiyọ iruo rẹ ẹga na-a. Enẹna, uphẹn na rhiephiyọ re. Ukperẹ ẹnwan rẹ akpọ vwo muvwerọ, ke me tẹnrovi oborẹ mi se ru kẹ Jihova.

 “Mi de rhi yono oborẹ a vwẹ ikọmputa vwo ruiruo. Me reyọ ikọmputa rọ sa riẹn oborẹ me nuẹ uyovwin wan vwo ruiruo. Ọ nẹrhẹ oma ghwọrọ ohwo, jẹ ona nana sa nẹrhẹ mi se ru uyono ri Baibol ji ghwoghwo ota kẹ ihwo womarẹ ileta vẹ e-mail. Ophapha re si ibieta phiyọ yen mi vwo nene ihwo re kẹrẹ ovwẹ ta ota. Ohwo rọ vẹ ọyen gba ta ota na ko djobọte ubiota ọvuọvo rọhẹ ophapha na. O de djobọte ubiota rọ gbare-e, ki mi wrowro ẹro kẹ; o de rhe djobọte ọ rọ gbare, ki mi rhurhu ẹro. Avwanre ki dje ona nana ẹvwẹvwanriẹn bẹsiẹ re vwo se eta vẹ irhiẹ reta. Iniọvo eya ri nene uvwe ghwọrọ ọke kuẹgbe mamọ nabọ rhe tona rẹ obo re me ta re. Ọkiọvo, ayen de djobọte ubiota rọ gbare-e, avwanre ke hwẹ.

 “Oma vwerhen ovwẹ mi de vwobọ vwẹ iruo rẹ ukoko na. Ọkieje yen me vwọ vwomaba uyono womarẹ ona ra vwọ reyọ ifonu yerẹ ikọmputa vwo ru uyono (videoconferencing). Mi se siẹ ẹkpahọnphiyọ mẹ phiyotọ, ohwo ọfa ko rhe se phia ọke a da nọ enọ na. Me je vwomaba ẹmẹko rẹ iseri evo vwo nẹ JW Broadcasting womarẹ use rẹ ividio. a

 “Ẹgbukpe 23 soso yen me muọga nana re. Ọkievo, mi muomaphiyọ. Ẹkẹvuọvo, mi se phi ẹdia yena kparobọ womarẹ ẹrhovwo ẹnẹ, ukẹcha rẹ iniọvo ukoko na, kugbe mi vwo vwobọ vwẹ iruo rẹ ukoko na. Vwọrẹ uyota, womarẹ ukẹcha ukoko na, ki mi se ruiruo rẹ ọkobaro ubrọke omarẹ ẹgbukpe esan gbẹ. Me davwẹngba me vwọ dia omamọ udje vwọ kẹ ọmọ mẹ Alessandro, rọ rọvwọnre rọ je ga kerẹ ọkpako enẹna. Ọ vẹ aye rọyen je ga kerẹ ọkobaro ọkieje.

 “Ọkieje yen mi vwo roro kpahen obo mi che ru vwẹ paradaisi rọ cha vwẹ obaro na. Orọnvwọn rẹsosuo re me guọnọ ru yen me vwọ reyọ upho mẹ vwọ ta ota kpahen Jihova. Me je guọnọ kpo ohwọrhọ da ra yan je mrẹ igbenu iyoyovwin. Ọ vwọ dianẹ ọ vrẹ ẹgbukpe uje soso re a vwọ vwẹ emu rẹ amiame vwọ kẹ vwẹ re na, me cha sa hẹrhẹ ọke mi vwo gbe ako phiyọ omamọ re se apple-e. Ọyen uyota nẹ, kerẹ ohwo rẹ Italy, me rhẹro ọke mi che vwo chere je re emu rẹ ihwo rẹ Italy re vwerhen ovwẹ, vẹ pizza!

 “ ‘Iphierophiyọ rẹ esivwo’ yen chọn vwẹ uko vwọ sẹro rẹ ubiudu mẹ. (1 Tẹsalonaika 5:8) Akpọ kpokpọ na re me mrẹ oma mẹ vwevunrẹ rọyen na, kẹ vwẹ aghọghọ dede nẹ me hẹ ẹdia nana, mi ji vwo imuẹro nẹ o rhe che kri o ki vwoba-a. Vwọrẹ uyota, me rhẹro ‘uvi rẹ arhọ’ ri Jihova veri womarẹ Uvie rọyen na, mi nẹ kiọkiọkiọ vwo kpo ọke yena.”—1 Timoti 6:19; Matiu 6:9, 10.