Ukpe ri 2023 yen ọ vwọ gba ẹgbukpe 75 re, rẹ Iseri ri Jihova vwo ruiruo rẹ efanfan vwẹ Papiamento. Papiamento ọyen ejajẹ ra reyọ vwo nẹ Dutch, Portuguese, kugbe Spanish rhe. Nonẹna, ihwo re joma te 350,000 re dia otọ rẹ ame riariẹ phiyọ rẹ Aruba, Bonaire, kugbe Curaçao yen jẹ Papiamento. E ji se ayen otọ rẹ ame riariẹ phiyọ rẹ ABC.

Uvwre rẹ ikpe 1926 fiẹ 1929 yen a ton iruo aghwoghwo na phiyọ vwẹ etọ rẹ ame riariẹ phiyọ na. Ọke rẹ imishọnare ri wontọ nẹ Isikuru ri Giliẹd rhi vwo te Curaçao ukpe ri 1946, jẹ a vwẹ ikoko evo vwo mu vwẹ otọ rẹ ame riariẹ phiyọ na re. Ẹkẹvuọvo, a je rhe fan ẹbẹ vuọvo kpo Papiamentoo. Ẹbe ri Dutch, English, kugbe Spanish yen e vwo ruẹ emẹvwa vwẹ Papiamento vẹ English. Dede nẹ iniọvo na riẹnre nẹ ofori ayen vwo vwo ẹbe ra fan nẹ Baibol rhe vwẹ ejajẹ ri Papiamento, jẹ egbabọse buebun herọ. Kerẹ udje, idishọnare ri Papiamento herọọ, o ji vwo idjerhe ra ta ota wan vẹ obo re si eta waan. Oniọvo Bill Yeatts yen ọvo usun rẹ imishọnare rẹsousuọ re ji kpo etọ rẹ ame riariẹ phiyọ na, ọ vwẹ ukẹcha phia vwẹ iruo rẹ efanfan na. Kirobo re djunute vwẹ 2002 Yearbook of Jehovah’s Witnesses, ọ tare nẹ: “Ra sa vwọ fan ẹbe rẹ ukoko, kẹ avwanre che si je ta eta rẹ ihwo na ji vwo ruiruo vwẹ Papiamento dẹvoo. Ọyen egbabọse rode ra vwọ vwẹ irhi rẹ obo re che si je ta eta wan vwo mu.” Dede nẹ egbabọse nana eje herọ jẹ iniọvo na muomaphiyọ iruo rẹ efanfan na.

Ọbe rẹsosuọ ra ka fan kpo ejajẹ ri Papiamento yen The Joy of All the People, a fan ẹbe na re vwẹ ukpe ri 1948. Ukuotọ rọyen, ayen da rhe fan ẹbe efa buebun, evo usun rayen yen Uwevwin Orhẹrẹ vẹ Awake! Asaọkiephana e siobọnẹ New World Translation na ememerha vwẹ Papiamento. Ọbe ri Baibol rẹsosuọ rẹ ayen ka fan yen Rutu, re siobọnu vwẹ October 1, 2021.

Ighwoghwota ri buẹnphiyọ vwẹ etọ nana rẹ ame riariẹ phiyọ na djerephia nẹ erere gbidiki nẹ ẹgbaẹdavwọn rẹ iniọvo na cha. Ighwoghwota 16 ọvo yen herọ ọke ra vwọ vwẹ ukoko ri Papiamento rẹsosuọ vwo mu vwẹ ukpe ri 1956. Nonẹna, ighwoghwota re vrẹ 1,600 yen ga kuẹgbe vwẹ ikoko 25 re jẹ ejajẹ ri Papiamento. Vwẹ ukpe ri 2023, ayen ru uyono ri Baibol ri bun vrẹn 1,200.

O mu avwanre ẹro nẹ Jihova che bruphiyọ kẹ iniọvo ri Papiamento na eje rẹ ayen vwọ nẹrhẹ urhukpẹ rayen vwo lo, je ghwa urinrin bru Jihova ra.—Matiu 5:16.