Iduduru rẹ Iseri ri Jihova vẹ ihwo ri vwo omavwerhovwẹn kpahen Baibol na cha vwoma vwẹ Tuesday, April 7, 2020, vwọ kẹ Ẹkarophiyọ rẹ ughwu ri Jesu rọ dia irueru rọ ma ghanre re ruẹ kukpe kpukpe. Ẹkẹvuọvo, ọruẹrẹphiyotọ rẹ enukpe na cha fẹnẹ fikirẹ ọga ri COVID-19 rọhẹ akpọneje. Vwẹ akpọneje, ihwo buebun che siomakoko womarẹ aplikeshọni re se videoconference.

Usuon rẹ ẹkuotọ buebun dobọ rẹ omẹvwa rẹ ihwo buebun fikirẹ ọga ri coronavirus rọhẹ akpọeje enẹna. Ọtiọyena, ikoko buebun vwẹ akpọneje ki ruẹ emẹvwa ri kudughwrẹn kudughwrẹn rayen womarẹ aplikeshọni ri videoconferencing. Ikoko ri vwo ọrhuẹrẹphiyotọ tiọyena je cha vwẹ aplikeshọni na vwo ru Ẹkarophiyọ na. E che phi ividio rẹ ọrhuẹrẹphiyotọ na phiyọ jw.org rẹ kohwo kohwo se ni yẹrẹ danlodu.

Vwẹ ukpe rọ wanre na, ihwo re vrẹ iduduru 20 yen kpo Ẹkarophiyọ na vwẹ akpọneje. O mu avwanre ẹro nẹ iduduru rẹ ihwo cha vwomaba avwanre vwo ru Ẹkarophiyọ na womarẹ videoconference yẹrẹ ifonu, efa mi rhe ji ni ividio rẹ irueru na vwẹ jw.org.

Vwẹ ekogho buebun, oshọ rẹ coronavirus na rhoma ganphiyọ. Iniọvo rẹ avwanre rehẹ asan tiọyena cha sẹro rẹ oma rayen womarẹ ẹmienyo vwọ kẹ orhọesio ra vwọphia bẹsiẹ enana eje che vwo nẹ otọ. Dedena, avwanre vwẹroso Jihova kokoroko, avwanre ji brorhiẹn re vwo nene iji rẹ Jesu vwọphia rọ vwọ ta: “Ru ọnana vwọ karohọ ovwẹ.”—1 Kọrẹnt 11:24.