Igrajueshọni rẹ iniọvo rẹ iklasi 148 rẹ Isikuru ri Giliẹd ghwa fẹnẹ i re ru wan re-e, jokpa rẹ ẹbẹre nana rọ fo obo ra jokaphiyọ: ihwo siomakoko vwẹ ọguan na vwo nughe rẹ irueru na-a. Ihwo eje ri nughe rẹ irueru na, ru ọtiọyen womarẹ intanẹti. Vwẹ ọke nana rẹ ẹkuotọ sansan vwọ rioja rẹ ọga na, ọrhuẹrẹphiyotọ nana ghwe dje oborẹ ukoko na nuẹ nene ewene re vwomaphia vwẹ akpọ na.

E ru ọrhuẹrẹphiyotọ na vwẹ March 14, 2020, vwẹ asan rẹ ukoko rẹ Iseri ri Jihova de ruẹ isikuru vwẹ Patterson, New York. Oniọvo Stephen Lett rọ dia ọvo usun rẹ Ẹko Rọvwẹrote na yen ochidiagbara rẹ ọrhuẹrẹphiyotọ na. Ihwo 55 yen wontọ nẹ isikuru na vwẹ ẹdẹ yena. a

Udughwrẹn ẹvo tavwen e ki ru igrajueshọni na, e nyo iyẹnrẹn buebun kpahen oborẹ ọga ri COVID-19 hrabọ ro akpọeje. Kirobo ra tarọ jovwo vwẹ ẹbẹre re se Asan rẹ Iyẹnrẹn vwẹ jw.org, nẹ ọke ra ruọke yen iniọvo rehẹ esiri ukoko rẹ Iseri ri Jihova vwọ fuẹrẹn ẹdia na, ayen je vwẹ iji sansan rhe ikoko na eje, rere iniọvo na se vwo nene odjekẹ rẹ usuon rẹ ẹkuotọ sansan vwọphia.

Ọvo usun rẹ odjekẹ tiọyena rẹ usuon rẹ ẹkuotọ evo vwọphia shekpahen uche ihwo re sa vwoma vwẹ asan ọvo. Odjekẹ nana kugbe efa yen mu Ẹko Rọvwẹrote na vwo brorhiẹn nẹ e rhe che se durhie ihwo rhe igrajueshọni na-a. Vwọba, ihwo ji che siomakoko vwẹ ọguan na vwo nughe rẹ irueru na-a. Orua ri Bẹtẹl vẹ iniọvo ri che wontọ nẹ isikuru ri Giliẹd na phi uvi rẹ udje phiyotọ rẹ ayen vwo nene odjekẹ na.—Jọn 13:34, 35.

Ẹkẹvuọvo, a vwẹ ọrhuẹrẹphiyotọ na phia kẹ ihwo sansan re durhieri kugbe Orua ri Bẹtẹl womarẹ intanẹti. Ọnana nẹrhẹ iniọvo re vrẹ 10,000 vwẹ akpọeje, ji te igbeyan vẹ ihwo rẹ orua rẹ iniọvo ri wontọ nẹ isikuru na vwẹ ẹdẹ yena se nughe rẹ ọrhuẹrẹphiyotọ na ọke re vwo ruo.

Dede nẹ ọga ri COVID-19 na ro akpọ na eje, Ẹko Rọvwẹrote na guọnọre nẹ a dobọ rẹ irueru rẹ ẹga rẹ avwanre ji-i, marho kẹ emẹvwa ri kudughwrẹn kudughwrẹn rọ dia ẹbẹre ọvo kiriguo rẹ ẹga rẹ avwanre. Ọnana yen sorọ Ẹko Rọvwẹrote na vwọ vwẹ odjekẹ rhe oghọn ukoko na eje vwẹ akpọ na, kpahen ewene re se ru phiyọ emẹvwa rẹ ukoko na vwo nene oborẹ ekogho vuọvo hepha. Ọnana mudiaphiyọ nẹ vwẹ asan evo, ighwoghwota che siomakoko ẹkuẹko yẹrẹ “vwoma” vwo ru uyono womarẹ aplikeshọni rẹ ihwo buebun sa vwọ ta ota kuẹgbe ẹsiẹvo (yẹrẹ videoconferencing). O mu avwanre ẹro dẹn nẹ iniọvo rẹ avwanre rehẹ akpọeje cha rha mrẹ erere vwo nẹ odjekẹ vẹ uchebro re vwo rhe ikoko na eje.

O phẹnre dẹn nẹ o vwo emuvuọvo rọ sa dobọ rẹ Jihova ji ro de jẹ ukokọ rọyen ẹ sa chọn uko vwo phi egbabọse kparobọ-ọ.—Une Rẹ Ejiro 18:29.