Ọga kpokpọ re se coronavirus (COVID-19) rọ ro akpọeje na djobọte iduduru rẹ Iseri ri Jihova re guọnọ nene odjekẹ rẹ usuon rẹ ẹkuotọ rayen, ji vwobọ vwẹ irueru rẹ ẹga na ọkieje. Iniọvo rẹ avwanre vwẹ ena kpokpọ vwo ruiruo rẹ aghwoghwo rayen vwẹ ẹkuotọ sansan rẹ ihwo da muọga na.

Oniọvo ọvo vwẹ Pisa rọhẹ Italy da ta: “Iruo rẹ aghwoghwo rẹ avwanre nabọ yan obaro ghwraghwraghwra! Kidie nẹ ihwo buebun rhe se kpo asan vuọvo-o, mẹ vẹ aye mẹ da hiẹ guọnọ ukeri rẹ ihwo sansan vwẹ ifonu rẹ avwanre, avwanre da jiroro nẹ a cha vwẹ aplikeshọni ra sa vwọ ta ota kuẹgbe je mrẹ ohwohwo vwo se ayen (videoconferencing). Kidie nẹ avwanre vwo ukeri rẹ orhivwinbrura sansan, ihwo buebun rẹ avwanre vwẹ Baibol yono, ihwo kpokpọ vwẹ ukoko na, kugbe e rẹ avwanre ghwoghwo ota kẹ jovwo re, ọnana da nẹrhẹ avwanre sa nabọ ghwọrọ inọke buebun vwo ghwoghwo ota.”

Vwẹ South Korea, ọga na nẹrhẹ ighwoghwota buebun sa mrẹ ọke vwọ nabọ reyọ ekuakua sansan re ru phiyọ wẹbsaiti ri jw.org kugbe aplikeshọni ri JW Library vwo ruiruo. Kerẹ udje, o gbe oniọvo ọvo unu ọke rẹ ohwo ọvo rọ vwẹ Baibol vwo yono vwẹ ọke ọvo rọ wanre rọ je dobọ rẹ uyono rọyen ji vwẹ ẹgbukpe erha re wanre na vwo si ovuẹ rhe. Ohwo na tare nẹ ọga rọ ro akpọeje na nẹrhẹ ọyen nabọ roro kpahen oka rẹ ẹdẹ re kobọ na. Oniọvo na da vwẹ ẹbẹre ri “Share Link” vwẹ aplikeshọni ri JW Library vwọ sẹndi rẹ evuẹ eghanghanre evo rhe ohwo na womarẹ ifonu. Oniọvo na tare nẹ “ọ vwerhoma nẹ ọga na rọ dia oka rẹ ẹdẹ re koba na sa rhanriẹ urhurusivwe rẹ ihwo kpahen Ota rẹ Ọghẹnẹ.”

Iyẹnrẹn buebun ri nẹ oghọn ukoko sansan cha na djerephia nẹ iniọvo rẹ avwanre ni iruo rẹ aghwoghwo na ghanghanre. Ọ vwerhoma ra vwọ mrẹ oborẹ ayen nabọ vwẹ “aghwanre” vwo ghwoghwo iyẹnrẹn esiri na vwẹ ẹdia nana ra hepha na.—Maika 6:9.