Aguare re se Lensky District Court of the Republic of Sakha che ghwoghwo orhiẹn ro bruru kpahen Oniọvo Igor Ivashin vwẹ March 31, 2020. Ohwo ro mudia vwọsuọ na vuẹ aguare na nẹ e muo phiyọ uwodi vwẹ ẹgbukpe ighwrẹn.

Vwẹ February 2018, aguare re se Yakutsk City Court da vuẹ elọkpa nẹ ayen ra bẹbẹ chọrọ ekuakua phiyọ asan rere ayen sa vwọ rha kerhọ rẹ Oniọvo Ivashin siẹrẹ ọ vẹ ihwo da ta ota vwẹ ifonu. Emeranvwe evo vwọ wan nu, usuon na de ji ihwo ra hiẹ iwevwin rẹ Iseri ri Jihova ẹrenren, ji te uwevwin rẹ Oniọvo Ivashin. E de muo vẹ Iseri ri Jihova 21 vwo kpo ogba rẹ elọkpa ra nọ ayen enọ. Ọ rọ vwọ kpahen ohwo rẹsosuọ ro mudia vwọso Oniọvo Ivashin kọ guọnọ idjerhe rọ vwọ yọnrọn oniọvo na, rọ vwọ tanẹ oniọvo na suẹn “ẹko omuomuoshọ ọvo.”

Vwẹ November 20, 2019, e de mu ẹdjọ na rhivwin bru ohwo rẹsosuọ na ra, kidie a mrẹ obo ri djerephia nẹ Oniọvo Ivashin churhi-i. Ẹkẹvuọvo, ohwo rẹsosuọ na de mu apili, a da rhoma mu ẹdjọ na rhivwin kpo aguare rẹ ubrotọ na (Lensky District Court). A ton ẹdjọ na phiyọ vwẹ ọtonphiyọ ri February 2020.

Oniọvo Ivashin vẹ aye rọyen Natalia vwo emetẹ ivẹ. Rẹ ẹdjọ na vwo siẹkẹrẹ ure rọyen na, avwanre nẹ ẹrhovwo nẹ Jihova chọn orua rọyen uko vwo “vwo erhiori” je “ghọghọ vwẹ evun rẹ oja.”—Kọlose 1:11.