Vwẹ March 23, 2020, vwẹ Ubrotọ ri Khabarovskv vwẹ Russia, Elọkpa re se Federal Security Services (FSB) da ra hiẹ uwevwin rẹ Oniọvo Igor Avramenko, ẹdẹ esan rẹ ọga rẹ ubiudu vwo hwe nu. Dede nẹ odẹ rẹ Oniọvo Avramenko yen e si phiyọ ọbe rọ kẹ ayen uturhi na, jẹ ayen je reyọ ekuakua ri Yelena rọ dia aye rọyen ro ghwu jovwo na, ekuakua kerẹ ikọmputa, ikẹmẹra, kugbe erọnvwọn efa.

Tavwen ọyena ke phia, vwẹ ẹdẹ yena, elọkpa evo kpo asan rẹ Oniọvo Aye Avramenko da wian, ayen de suon nẹ oboyin rhe uwevwin, rhe vwa onini rayen re se Stanislav Grebenkin rọ yọnre ọbe rọ kẹ ayen uturhi rẹ ayen vwọ hiẹ uwevwin na. Oniọvo Aye Avramenko da vuẹ Grebenkin nẹ ọshare rọyen ghwure. Ọ riẹnre jovwo, dedena ọ je hiẹ uwevwin na ghene, kidie ọ tare nẹ e si ọbe rẹ uturhi na kẹ ọyen tavwen e ki nyo kpahen ughwu rẹ Oniọvo Avramenko.

Ọlọkpọ na da vuẹ Oniọvo Aye Avramenko nẹ ayen cha nama hiẹ ekuakua buebu-un, ayen che di ni erọnvwọn evo rere e se vwo sio phiyotọ nẹ a hiẹ uwevwin na nure, kidie ọ tare nẹ e che ruo ọtiọyen rere “ota nana se vwo nẹ otọ kpakpata, ọyen me je sa vwẹ iyẹnrẹn rẹ obo rọ mrẹre vwọ kpahotọ kẹ [FSB] umẹ rọ sẹro rẹ iyẹnrẹn.” Ẹkẹvuọvo, ayen da ton uwevwin na ẹhiẹ phiyọ.

Vwẹ Ubrotọ ri Khabarovsk, a niyẹnrẹn rẹ urhiẹchọ kpahen Iseri ri Jihova Ihwe. Usuon na davwẹngba rayen eje rere ayen sa vwọ ghwọrọ esegbuyota rẹ iniọvo rẹ avwanre rehẹ Russia, avwanre riẹnre dẹn nẹ iniọvo na cha mrẹ ẹgba vwẹ “oma ehwemuẹ kugbe ẹro ẹvwọ suọ” rẹ Ọsẹ rẹ avwanre ro vwo ẹguọnọ na, Jihova.—Aizaya 30:15.