Vwẹ April 26, 2023, igọmẹti ri Spain de ru ewene ọghanghanre ọvo phiyọ osa rẹ uyovwin rẹ ẹkuotọ na. Orhiẹn nana rẹ ayen bruru na fierere vwọ kẹ Iseri ri Jihova vwẹ idjerhe buebun.

Orhiẹnbro rẹ igọmẹti na si ukoko avwanre vwo nẹ osa rẹ uyovwin rẹ ayen hwa phiyọ iruo rẹ ebanbọn jovwo vwẹ ẹkuotọ neje. Ọnana ji mudiaphiyọ nẹ ihwo ri toro igho vwọ kẹ iruo rẹ Iseri ri Jihova cha hwosa rẹ uyovwin fikirẹ igho rẹ ayen torori-i. Vwọba, ewene nana djerephia nẹ ukoko rẹ Iseri ri Jihova ọyen “ẹga ra nabọ riẹn” kirobo rẹ European Court of Human Rights djere.

Dede nẹ ukoko rẹ Iseri ri Jihova ọyen ẹga ra nabọ riẹn vwẹ idjerhe ro nene urhi vwẹ June 2006, a je vuẹ ayen nẹ ayen hwosa rẹ uyovwin vwẹ ẹkuotọ na, rọ dia oborẹ ẹga efa ruẹ-ẹ. Nọke fiọke kọyen iniọvo avwanre vwo siẹ rhe igọmẹti rere ayen vwo vwo uturhi rẹ ẹga efa ji vwo na. Vwẹ ọke e rhẹro rọye-en, vwẹ April 24, 2023, ihwo rẹ igọmẹti ri nẹ Ministry of the Presidency rhe de durhie ihwo ri mudia kẹ ukoko rẹ Iseri ri Jihova vwẹ Spain vwọ kẹ echidiotọ ọvo. Vwẹ echidiotọ na, a da vuẹ iniọvo rẹ avwanre nẹ e che ru ewene phiyọ urhi rẹ osa rẹ uyovwin ro shekpahen ikoko re chueki-i, nẹ ọnana che fierere kẹ Iseri ri Jihova. Vwẹ ẹdẹ ivẹ re vwọ kpahọn, vwẹ April 26, 2023, ihwo re vwẹ irhi muẹ ra riẹn phiyọ Congress of Deputies da ghwobọphiyọ ewene re ru phiyọ urhi na. E rhẹro rọyen nẹ ẹreyọ vwo ruiruo rẹ ewene nana cha tonphiyọ vwẹ June 2023.

Oma vwerhen avwanre mamọ vwọ kẹ orhiẹnbro ọghanghanre nana, ro toroba ugbomọphẹn rẹ ẹga rẹ Iseri ri Jihova vwẹ Spain.​—Filipae 1:7.