E, Baibol na mraro rọyen nẹ ihwo che rhe miovwẹnphiyọ miovwẹnphiyọ vwẹ ọke avwanre na. Ọ tare nẹ ihwo evo che chukoku uruemu ra vwọ yọnrọn urhi rọ sa nẹrhẹ e yerin kugbe. a (2 Timoti 3:​1-5) Ẹkẹvuọvo, Baibol na je tanẹ ọ dia ihwoeje yen che vwo oka rẹ uruemu nana-a. Ukperẹ ọtiọyen, womarẹ ukẹcha rẹ Ọghẹnẹ, ayen cha sen erharhe iroro nana ji ru obo re vwerhan Ọghẹnẹ oma.​—Aizaya 2:​2, 3.

Vwẹ uyovwinrota nana

•  Die yen Baibol na ta kpahen oborẹ ihwo roro emu wan vẹ oborẹ ayen ruẹ vwẹ ọke avwanre na?

•  Mavọ yen uruemu rẹ urhuru rẹ ihwo vwori sa vwọ so ọmiaovwẹ vwọ kẹ ihwo efa?

•  Diesorọ ihwo che rhe miovwẹnphiyọ miovwẹnphiyọ?

•  Siẹrẹ ihwo de dje orharhe uruemu phia, die yen avwanre che ru?

•  Ihwo ejobi yen che miovwinphiyọ?

•  Uruemu rẹ ihwo cha bra tẹdia ozighi vẹ oyanghan ọvo kọyen a cha mrẹ vwẹ akpọ na?

 Baibol na djunute erharhe iruemu rẹ ihwo sansan re cha vọn asan eje fikirẹ urhuru. Ihwo “che se sun oma raye-en,” ayen “che vwo ẹguọnọ rẹ oma rayen ọvo,” kugbe “ẹguọnọ rẹ akpọẹriọ ukperẹ ẹguọnọ rẹ Ọghẹnẹ.”​—2 Timoti 3:​2-4.

 Vwọrẹ uyota, ihwo buebun roro kpahen ọdavwẹ rayen ọvo, kerẹ obo ri che fierere kẹ ayen, obo re cha nẹrhẹ oma vwerhen ayen, kugbe obo re cha nẹrhẹ ayen roro nẹ ayen riẹn akpọ yerin vẹ efa ọtiọyen. Kirobo aroẹmrẹ na djephia, ihwo buebun vwo ọdavwẹ romobọ rayen ọvo, kọ họhọ nẹ ọnana rhoma braphiyọ braphiyọ. Ihwo buebun vwo ọdavwẹ romobọ rayen tẹdia ayen rhe “vwo ẹguọnọ rẹ emu esiri-i,” ayen rhe vwo owenvwe rẹ ayen vwo vwo ẹguọnọ obo ri yovwinri-i. Kidie nẹ ayen sa “kpẹvwẹ ẹse-e,” kẹ ayen no nẹ e vwo dje ọdavwaro phia kpahen oborẹ ayen vwori vẹ oborẹ ihwo efa vwọ kẹ ayen fiemu-u.​—2 Timoti 3:​2, 3.

 Uruemu urhuru je so iruemu efa ri Baibol na mraro rọyen phiyotọ nẹ e cha phia vwẹ ọke avwanre na:

•   Ivwurhuru. Ihwo buebun “vwo ẹguọnọ rẹ igho,” ayen vwo imuẹro nẹ igho vẹ ekuakua rẹ akpeyeren rẹ ayen vwori yen djerephia nẹ ayen riẹn akpọ yerin.​—2 Timoti 3:2.

•   Omaẹyan. Ihwo buebun “cha yonma, che phuoma,” ji “ni oma rhuarho.” (2 Timoti 3:​2, 4) Ihwo tiọyena yonma rẹ ayen vwo dje ẹgba, iruemu vẹ efe rayen phia vwọ vrẹ obo rọ ghene hepha.

•   Ihwo ri miovwon ihwo. Ihwo re “ta eta rẹ ẹgua” vẹ i ri “miovwin ihwo” vọn asan eje nonẹna. (2 Timoti 3:​2, 3) Eta nana se shekpahen ihwo ri yinvwaro ji gun efian vwọ kpahen ihwo efa yẹrẹ Ọghẹnẹ.

•   Udu ọgangan. Ihwo buebun “cha fuevu-un,” “ota rẹ ohwo ọfa cha ro aye-en,” “cha shẹ ihwo,” ji “ru uyovwin gangan.” (2 Timoti 3:​2-4) Ayen dje iruemu nana phia womarẹ ayen vwo jẹ ohwohwo ẹruọ, ayen je yan muẹ ive raye-en.

•   Ozighi. Ihwo buebun nonẹna “djoma,” rẹ ayen vwo muophu djọghrọ djọghrọ, ọke buebun na, o mi mu ayen vwo gbe ozighi.​—2 Timoti 3:3.

•   Jurhi ẹyọnrọn. Jesu mraro nẹ vwẹ ọke rẹ avwanre na “jurhi ẹyọnrọn” che rhe buẹnphiyọ. (Matiu 24:12) Ọ je ta nẹ “oyanghan,” yẹrẹ “oyogho” cha vọn asan eje.​—Luk 21:​9, eta rehẹ obotọ na.

•   Jẹ ẹguọnọ rẹ orua evwo. Kidie nẹ ihwo buebun “muọghọ kẹ esẹ” vẹ ini raye-en ji vwo “vwo ẹguọno [rẹ orua-a],” ọnana kọ nẹrhẹ ihwo chukokuẹ ihwo rẹ orua rayen ji gboja kẹ ayen vrẹ obo ri jovwo.​—2 Timoti 3:​2, 3.

•   Omeru rẹ ẹga. Ihwo buebun họhọ ihwo re de “vwomakpahotọ kẹ Ọghẹnẹ.” (2 Timothy 3:5) Ukperẹ ayen vwọ vwomakpahotọ vwọ kẹ eruo rẹ ọhọre rẹ Ọghẹnẹ, kẹ ayen nene ilori rẹ ẹga re vuẹ ayen oborẹ ayen guọnọ nyo.​—2 Timoti 4:​3, 4.

 Kidie nẹ ihwo buebun ivwurhuru, ọnana ko sua oja vẹ emiavwe vwọ kẹ ihwo efa vwọ vrẹ obo ri jovwo. (Aghwoghwo 7:7) Kerẹ udje, ihwo ri vwo ẹguọnọ rẹ igho ghwa ihwo efa ria. Ihwo ri vwo ẹguọnọ-ọ gboja kẹ ihwo rẹ orua, ọnana sa nẹrhẹ ihwo rẹ orua tiọyena muomaphiyọ gangan yẹrẹ hwe oma rayen. Omaẹwan rẹ ihwo re shẹ ihwo efa yẹrẹ ihwo ri jẹ evun ẹfuọn sua vwọ kẹ ihwo cha dia ọke grongron.

 Baibol na nabọ dje oboresorọ rẹ ihworakpọ vwo wene:

•   Uvi rẹ ẹguọnọ re vwo kpahen Ọghẹnẹ vẹ irivẹ rhe shekpotọ. (Matiu 24:12) Fikirẹ ọnana, uruemu rẹ urhuru kọ rhoma ganphiyọ.

•   A djẹ idẹbono nẹ odjuvwu rhe otọrakpọ na. (Ẹvwọphia 12:​9, 12) Nẹ ọke yena rhe, ọ da nẹrhẹ ihworakpọ vwo uruemu rẹ urhuru vrẹ obo ri jovwo.​—1 Jọn 5:19.

 Baibol na da ta: “Kẹnoma kẹ ihwo tiọyena.” (2 Timoti 3:​5, Easy-to-Read Version) Ọ dia ọnana mudiaphiyọ nẹ e che si oma nẹ ohri rẹ ihwo efa-a. Ukperẹ ọtiọyen, e jẹ a kẹnoma kẹ a vwọ vwẹ ugbeyan ọkpẹkpẹkpẹ vwo muẹ ihwo ri yeren akpọ rẹ urhuru vẹ ihwo re riẹn Ọghẹnẹ-ẹ.​—Jems 4:4.

 Ẹjo. Baibol na mraro rọyen nẹ a cha mrẹ “ihwo re fiọn unu kugbe ihwo ri dirhivwẹ vwi fiki rẹ ẹgua re gberi.” (Izikiẹl 9:4) Ayen cha sen urhuru evwo, je vwẹ iwan rẹ Ọghẹnẹ vwo sun akpeyeren rayen. Eta vẹ iruemu rayen che djephia nẹ ayen fẹnẹ ihwo efa. (Malakae 3:​16, 18) Kerẹ udje, ayen cha davwẹngba vwọ sẹro rẹ ufuoma rayen vẹ ihwo efa je sen ofovwin vẹ ozighi.​—Maika 4:3.

 Ẹjo. Uruemu rẹ ihworakpọ cha sa bra tẹdia rẹ ozighi vẹ oyanghan ọvo vwọ dia otọrakpọ na-a. Ukperẹ ọtiọyen, Ọghẹnẹ cha ghwọrọ ihwo ri brorhiẹn rẹ ayen vwo chukoku iwan rọyen kẹrẹkpẹ. (Une rẹ Ejiro 37:38) Ọ cha vwẹ “akpọ kpokpọ”​—rọ dia eyeren kpokpọ vwẹ otọrakpọ na vwo mu​—asan rẹ ihwo dẹndẹn cha dia vwọrẹ ufuoma bẹdi bẹdẹ. (2 Pita 3:13; Une rẹ Ejiro 37:​11, 29) Iphiẹrophiyọ nana dia ikuegbe ghevweghe-e. Enẹna, Baibol na vwẹ ukẹcha vwọ kẹ ihwo buebun vwo wene akpeyeren rayen rere ayen se vwo yeren akpọ rayen vwo nene iwan rẹ Ọghẹnẹ.​—Ẹfesọs 4:​23, 24.