Aroẹmrẹ ri shekpahen mesaya na djerephia nẹ Jesu yen Mesaya na?
Ẹkpahọnphiyọ ri Baibol na
E. Jesu vwọ hẹ otọrakpọ, o ru orugba rẹ aroẹmrẹ eje ri shekpahen “Ọ ra vwẹ ori te na Osun,” ọ rọ cha dia “Osivwi rẹ akpọ na.” (Daniẹl 9:25; 1 Jọn 4:14) Jẹ, o vwo ghwu nu dede, Jesu ji ru orugba rẹ aroẹmrẹ ri shekpahen Mesaya na.—Une Rẹ Ejiro110:1; Iruo Rẹ Iyinkọn Na 2:34-36.
Die yen “Mesaya” mudiaphiyọ?
Ubiota ri Hibru Ma·shiʹach (Mesaya) kugbe ota ri Grik Khri·stos (Kristi) ivẹ na mudiaphiyọ “Ọ re ku evwri ku.” Ọtiọyena, “Jesu Kristi” mudiaphiyọ “Jesu re ku evwri ku,” yẹrẹ “Jesu Mesaya na.”
Vwẹ ọke ri Baibol na, a da cha vwẹ ohwo mu ẹdia rọ rhoro, ke kuẹ evwri kuẹ uyovwin rọyen. (Livitikọs 8:12; 1 Samuẹl 16:13) Ọghẹnẹ yen vwẹ Jesu mu kerẹ Mesaya rọ dia ẹdia rọ vọnre vẹ ogangan. (Iruo 2:36) Jẹ ukpe rọ vwọ vwẹ evwri ghworo Jesu, Ọghẹnẹ de ku ẹwẹn ọfuanfon kuo.—Matiu 3:16.
Ihwo buebun yen a guọnọre ri che ru orugba rẹ aroẹmrẹ ro shekpahen Mesaya na?
Ẹjo. Omoka ọvo yen e che vwo vughe ohwo na, orugba rẹ aroẹmrẹ ri Baibol riẹn obọ kpo Mesaya yẹrẹ Kristi vuọvo. Ẹkẹvuọvo, Baibol na tare nẹ “Kristi rẹ efian cha rhe kugbe emraro rẹ efian ayen cha vwẹ eka buebun phia kugbe emu rẹ igbunu buebu, rere ayen vwọ phiẹn ihwo buebu ghwru.”—Matiu 24:24.
Mesaya na cha vwomaphia vwẹ obaro na?
Ẹjo. Baibol na mraro phiyotọ nẹ, Mesaya na che nẹ uvwiẹ rẹ Ovie Devid vwẹ Izrẹl rhe. (Une Rẹ Ejiro 89:3, 4) Jẹ, ọbe rẹ iyẹnrẹn rẹ uvwiẹ ri Devid ghwru re, ọkiọvo ọ sa dianẹ ọ guọghọre ọke rẹ ihwo ri Rom vwọ ghwọrọ Jerusalẹm vwẹ 70 C.E. a Vwo nẹ ọke yena rhe, ọ ra lọhọ vwọ kẹ ohwo vuọvo rọ vwọ riẹn sẹ uvwiẹ ri Devid yen o nurhe-e. Vwọ vrẹ ọyena, dede nẹ ọbe rẹ ikuegbe na herọ vwẹ ọke ri Jesu, ohwo vuọvo vwo ẹwẹn ivivẹ kpahen uvwiẹ ri Devid ro nurhe-e tobọ ji te ivweghrẹn rọyen.—Matiu 22:41-46.
Bro aroẹmrẹ ri Baibol na yen shekpahen Mesaya na?
Ọ cha bẹn ra vwọ riẹn uchunu rẹ aroẹmrẹ ri shekpahen Mesaya na. Kerẹ udje, ona re vwo phiẹ ukeri phiyọ aroẹmrẹ sansan sa fẹnẹ vwẹ awọreta ọvuọvo ma rho siẹrẹ aroẹmrẹ na de shekpahen Mesaya na. Awọreta rọhẹ Aizaya 53:2-7 djunute aroẹmrẹ buebun ri shekpahen Mesaya na. Ihwo evo se kere eje phiyọ aroẹmrẹ ọvo, ihwo efa mi rhe no nẹ aroẹmrẹ na eje fẹnẹre.
Aroẹmrẹ evo ri shekpahen Mesaya na rẹ Jesu rugba
Aroẹmrẹ |
Ra mrẹ vwẹ |
Orugba |
---|---|---|
Ọmọ rẹ Ebraham |
Jẹnẹsis 22:17, 18 |
|
Ọmọ rẹ Aizik rọ dia ọmọ rẹ Ebraham |
Jẹnẹsis 17:19 |
|
Uvwiẹ ri Juda vwẹ Izrẹl yen e de vwiẹ |
Jẹnẹsis 49:10 |
|
Uvwiẹ rẹ Ovie Devid yen o nurhe |
Aizaya 9:7 |
|
Ọmọtobẹ yen vwiẹrẹ |
Aizaya 7:14 |
|
E vwiẹrẹ vwẹ Betlẹhẹm |
Maika 5:2 |
|
E de se Imanuẹl b |
Aizaya 7:14 |
|
Ọtonphiyọ ro kperusi-i |
Aizaya 53:2 |
|
Imitete ra teyen hwe re vwo vwiẹ nu |
Jerimaya 31:15 |
|
E de se nẹ Ijipt rhe |
Hosia 11:1 |
|
E che se ohwo ri Nazarẹt c |
Aizaya 11:1 |
|
Ikọn cha kobaro kẹ |
Malakae 3:1 |
|
A Jẹrẹ reyọ kerẹ Mesaya na vwẹ 29 C.E. d |
Daniẹl 9:25 |
|
Ọghẹnẹ sere Ọmọ rọyen |
Une Rẹ Ejiro 2:7 |
|
Oruru rẹ uwevwin rẹ Ọghẹnẹ muro rọ |
Une Rẹ Ejiro 69:9 |
|
Oghwoghwota rẹ iyẹnrẹn esiri na |
Aizaya 61:1 |
|
Aghwoghwo rọyen vwẹ Galili urhukpẹ rode |
Aizaya 9:1, 2 |
|
O ru emu rẹ eka kerẹ Mosis |
Urhi Rivẹ 18:15 |
|
Kerẹ Mosis, ọ ta eta romobọ rọye-en |
Urhi Rivẹ 18:18, 19 |
|
O sivwin ega buebun |
Aizaya 53:4 |
|
Ọ guọnọ ujiri romobọ rọye-en |
Aizaya 42:2 |
|
O che gbe arodọnvwẹ kẹ ihwo re shenyẹ |
Aizaya 42:3 |
|
O djerephia nẹ Ọghẹnẹ ohwo ro brorhiẹn ọsoso |
Aizaya 42:1, 4 |
|
Ọgba-Aghwanre |
Aizaya 9:6, 7 |
|
O ghwoghwo odẹ ri Jihova |
Une Rẹ Ejiro 22:22 |
|
O kpe itẹ buebun |
Une Rẹ Ejiro 78:2 |
|
Osun |
Daniẹl 9:25 |
|
Buebun sere gbuyota-a |
Aizaya 53:1 |
|
Uchukurhe umwemwu |
Aizaya 8:14, 15 |
|
Ihworakpọ senrọ |
Une Rẹ Ejiro 118:22, 23 |
|
E vwo utuoma kpahọn ekueku |
Une Rẹ Ejiro 69:4 |
|
Ọ ro Jerusalẹm vẹ ekẹtẹkẹtẹ |
Zekaraya 9:9 |
|
Imitete jiriro |
Une Rẹ Ejiro 8:2 |
|
Ọ rhere vwẹ odẹ ri Jihova |
Une Rẹ Ejiro 118:26 |
|
Ugbeyan rọ kẹrerẹ shẹrẹ |
Une Rẹ Ejiro 41:9 |
|
A shẹrẹ ikpahọ gbẹ isene ihwe rẹ idọnọ ọfuanfon e |
Zekaraya 11:12, 13 |
|
Idibo rọyen yan jovwo |
Zekaraya 13:7 |
|
E se oseri rẹ eku hwe |
Une Rẹ Ejiro 35:11 |
|
E vwo gun efian nyẹ, ọ kpahe ota vuọvo-o |
Aizaya 53:7 |
|
E dje enya kuo |
Aizaya 50:6 |
|
A teyerọ uyovwin |
Maika 5:1 |
|
A farọ |
Aizaya 50:6 |
|
Ọ họnre ihwo re ghwiẹrẹ-ẹ |
Aizaya 50:6 |
|
Isun chahen urhi muo |
Une Rẹ Ejiro 2:2 |
|
E hwe awọ vẹ abọ rọyen mu urhe |
Une Rẹ Ejiro 22:16 |
|
Ihwo vwẹ iwun rọyen duvwu itẹ |
Une Rẹ Ejiro 22:18 |
|
E kerire ba irumwemwu |
Aizaya 53:12 |
|
A vwerọ jehwẹ, e mienu kuo |
Une Rẹ Ejiro 22:7, 8 |
|
Ọ rioja kẹ irumwemwu |
Aizaya 53:5, 6 |
|
Kọ họhọre nẹ Ọghẹnẹ senrọ |
Une Rẹ Ejiro 22:1 |
|
A vwẹ udi rọ yara korokoro kẹ da |
Une Rẹ Ejiro 69:21 |
|
Urhuru rẹ ame hwere tavwen o ki ghwu |
Une Rẹ Ejiro 22:15 |
|
O phi erhi rọyen phiyọ obọ rẹ Ọghẹnẹ |
Une Rẹ Ejiro 31:5 |
|
Ọ vwẹ arhọ rọyen kpahotọ |
Aizaya 53:12 |
|
Ọ hwa osa rẹ ọtanhirhe na ro vwo si umwemwu no |
Aizaya 53:12 |
|
E vwirhi ibeku rọye-en |
Une Rẹ Ejiro 34:20 |
|
E duvwiro |
Zekaraya 12:10 |
|
E shiro phiyọ ushi rẹ edafe |
Aizaya 53:9 |
|
A kparerọ nẹ ushi |
Une Rẹ Ejiro 16:10 |
|
E wene ọ rọ shẹrẹ na |
Une Rẹ Ejiro 109:8 |
|
O chidia phiyọ obọrhen rẹ Ọghẹnẹ |
Une Rẹ Ejiro 110:1 |
a Ọbe ri McClintock vẹ Strong’s Cyclopedia da ta: “Ọ pha bẹnbẹn a vwọ sen nẹ ọke ra vwọ ghwọrọ Jerusalẹm yen a vwọ guọghọ ọbe rẹ uvwiẹ rẹ ihwo ri Ju, ọ dia tavwen oghwọrọ na ke phia-a.”
b Odẹ ri Hibru re se Imanuẹl, ro mudiaphiyọ “Ọghẹnẹ vẹ avwanre herọ,” nabọ djisẹ rẹ ẹdia ri Jesu kerẹ Mesaya. Iruo ro ruru ọke rọ vwọ hẹ akpọ na djerephia nẹ Ọghẹnẹ vẹ idibo rọyen herọ.—Luk 2:27-32; 7:12-16.
c A reyọ ubiota na “Nazarẹt” vwo nẹ ota ri Hibru neʹtser, ro mudiaphiyọ “tan.”
d Vwọ kpahen evuẹ ri Baibol na efa re rionbọ kpo 29 C.E. rọ dia ukpe rẹ Mesaya na cha vwọ vwomaphia, ni uyovwinrota na “How Daniel’s Prophecy Foretells the Messiah’s Arrival.”
e Aroẹmrẹ nana hẹ evunrẹ ọbe ri Zekaraya, ẹkẹvuọvo ọbe ri Matiu tare nẹ “ọmraro Jerimaya yen tarọ.” (Matiu 27:9) Ọ họhọre nẹ ọbe ri Jerimaya yen e ke phiẹ phiyọ ẹdia rẹsosuọ vwẹ ẹbẹre re Baibol na re se “Emraro na.” (Luk 24:44) Ọ sa dianẹ Matiu djunute “Jerimaya” rọ vwọ ta ota kpahen ẹbe na eje, ro ji churobọ si ọbe ri Zekaraya.