Obọ vuọvo yen Baibol na djunute itatu, vwẹ Livitikọs 19:28, rọ tare nẹ: “We si [“itatu” NW] phihọ oma rẹ ovwa-an.” Ọghẹnẹ ji urhi nana kẹ ihwo rẹ Izrẹl, rere ayen vwọ fẹnẹ ihwo rẹ ẹkuotọ re riariẹ ayen phiyọ ri si edẹ yẹrẹ eka rẹ eghẹnẹ rayen phiyọ oma. (Urhi Rivẹ 14:2) Dede nẹ Inenikristi rha hẹ otọ rẹ urhi yena ra vwọ kẹ ihwo rẹ Izrẹl na-a, jẹ ofori nẹ e roro kpahen obo re mu urhi yena kpahen.

Ofori nẹ Onenikristi si itatu phiyọ oma?

 Ẹkpo rẹ Baibol rehẹ obotọ na sa chọn wẹn uko vwo vwo ẹruọ rẹ ota na:

•   “Eya na je sẹ osẹvwe rẹ oma evwokpotọ.” (1 Timoti 2:9) Iji nana shekpahen eya vẹ eshare. Ofori nẹ e muọghọ kẹ ẹro ihwo efa vwo nẹ emu ukperẹ e vwo ru obo re cha nẹrhẹ ihwo tẹnrovi avwanre vwẹ idjerhe ro je fo.

•   Ihwo evo si itatu phiyọ oma kidie ayen guọnọ dje oma phia efa sio vwọrẹ odjephia nẹ ayen sa reyọ oma rayen vwo ru obo ri je ayen. Ẹkẹvuọvo, Baibol na jiriro kẹ Inenikristi nẹ a vwẹ oma rẹ avwanre vwo “ze izobo ọkpokpọ, rọ fọnro ro fo ẹreyọ kẹ Ọghẹnẹ, kọye hẹ ẹga” rẹ ẹwẹn rẹ avwanre ga vẹ ẹgba iroro avwanre. (Rom 12:1) Reyọ ẹgba iroro wẹn vwọ nabọ fuẹrẹn oboresorọ wọ vwọ guọnọ si itatu phiyọ oma. Ọ da dianẹ kiridie wọ guọnọ ru oborẹ ihwo ruẹ yẹrẹ wọ guọnọ vwo djephia nẹ wọ vwomaba ẹko ihwo evo, karophiyọ nẹ iroro wẹn na se wene ẹkẹvuọvo wo re che se phoro itatu wo si phiyọ oma na-a. Wọ da nabọ fuẹrẹn oboresorọ wọ vwọ guọnọ si itatu phiyọ oma, ku wo se brorhiẹn rọ gbare.—Isẹ 4:7.

•   “Iroro rẹ ohwo rọ vwẹ ẹro te otọ je yovwo-o, ẹkẹvuọvo ohwo ro bru okpakpa che fiabọ.” (Isẹ 21:5) Ọke buebun, ihwo ri si itatu phiyọ oma na brokpakpa brorhiẹn na, jẹ orhiẹn tiọyena se djobọte oyerinkugbe rayen vẹ ihwo efa ji te iruo rẹ ayen ruẹ. Vwọba, ọ diẹ ọmọrhiẹ igho yen a ghwọrọ vwo phoro itatu nẹ oma-a, jẹ ephoro rọyen na je miavwan mamọ. Ehiahiẹ re ruru vẹ oborẹ ihwo ri phoro itatu nẹ oma tare djerephia nẹ ihwo buebun ri si itatu phiyọ oma rhoma viẹ diekpọvwẹ vwẹ ukuotọ rọyen.