Mavọ Wọ Sa Vwọ Dia Bẹdẹ?

HWORO

Ẹkpahọnphiyọ rẹ Baibol na

Baibol na veri: “Ohwo ro ru ọhọre rẹ Ọghẹnẹ kọ dia bẹdẹ.” (1 Jọn 2:17) Die yen Ọghẹnẹ guọnọre nẹ wo ru?

Yono kpahen Ọghẹnẹ vẹ Ọmọ rọyen, Jesu. Vwẹ ẹrhovwo rẹ Jesu nẹ rhe Ọghẹnẹ, ọ da ta: “Ọnana hẹ arhọ ro vwo oba-a na, rere ayen vwọ riẹn owẹ ọvo rẹ Ọghẹnẹ rẹ uyota na, kugbe Jesu Kristi ru wo ji rhe na.” (Jọn 17:3) Die yen o churobọ si a “vwọ riẹn” Ọghẹnẹ vẹ Jesu? Avwanre sa riẹn ayen womarẹ e vwo yono Baibol na, je reyọ ovuẹ rọyen vwo ruiruo vwẹ akpeyeren. a Baibol na dje iroro rẹ Jihova Ọghẹnẹ rọ dia Ọmemama avwanre rọ kẹ ihwo ejobi arhọ na phia. (Iruo Rẹ Iyinkọn Na 17:24, 25) Baibol na je vuẹ avwanre kpahen Ọmọ rọyen Jesu ro yono “eta rẹ arhọ ri bẹdẹ na.”—Jọn 6:67-69.
Vwo esegbuyota kpahen izobo ọtanhirhe rẹ Jesu. Jesu rhe akpọ na “re o vwo gbe odibo, rere o vwẹ arhọ rọye tan ihwo buebu.” (Matiu 20:28) Izobo ọtanhirhe rẹ Jesu na rhie idjerhe phiyọ vwọ kẹ ihworakpọ rere ayen sa vwọ dia bẹdẹ vwẹ Iparadaisi vwẹ otọrakpọ na. b (Une Rẹ Ejiro 37:29) Jesu da ta: “Ọghẹnẹ guọnọ akpọ na ọ da vwẹ Ọmọ ọvuọvo rọye na kẹ, rere ohwo kohwo ro sere gbuyota vwo jẹ ghwọrọ ẹkẹvuọvo ko vwo arhọ ri bẹdẹ.” (Jọn 3:16) Noso nẹ a guọnọ emu ọfa vrẹ e di vwo vwo esegbuyota kpahen Jesu. Ofori nẹ avwanre dje ‘esegbuyota’ na phia womarẹ e vwo yenren akpọ nene iyono rọyen, ji ru ọhọre rẹ Ọsẹ rọyen.—Matiu 7:21; Jems 2:17.
Vwẹ Ọghẹnẹ mu ugbeyan. Ọghẹnẹ guọnọre nẹ avwanre sikẹrẹ, je dia ugbeyan rọyen. (Jems 2:23; 4:8) Ọghẹnẹ herọ bẹdẹ. O che ghwu-u, ọ guọnọre nẹ igbeyan rọyen je dia bẹdẹ. Ọghẹnẹ vuẹ avwanre vwevunrẹ Baibol na, obo ro vwo vwẹ ẹwẹn vwọ kẹ otu re guọnerọ ejobi: “E jẹn udu wẹn dia bẹdẹ!”—Une Rẹ Ejiro 22:26.

Ororochọ Kpahen A Vwọ Dia Bẹdẹ

Ororochọ: Ẹgbaẹdavwọn rẹ ihworakpọ cha ghwa arhọ rẹ bẹdẹ rhe.

Uyota: Dede nẹ, ihworakpọ tẹn ona rẹ omaesivwon rọ sa nẹrhẹ ikpe rẹ ohwo gron, jẹ ẹgbaẹdavwọn tiọyena cha sa nẹrhẹ ohwo vwo arhọ rẹ bẹdẹ-ẹ. Ọghẹnẹ ọvo yen sa kẹ ohwo arhọ rẹ bẹdẹ, kidie ọyen ọvo yen “ogbugbu rẹ arhọ.” (Une Rẹ Ejiro 36:9) O veri nẹ o che “mu ughwu rọ bẹdẹ,” ọ je cha vwẹ arhọ rẹ bẹdẹ vwọ kẹ ihworakpọ re fuevun.—Aizaya 25:8; 1 Jọn 2:25.

Ororochọ: Ihwo ri nẹ ẹbẹre ọvo rẹ akpọ na rhe yen cha dia bẹdẹ.

Uyota: Ọghẹnẹ ghwoma hẹ abọ ọvo jẹ ọvo vwo-o. Vwọ fẹnẹ ọyena, “vwẹ ẹgborho kẹgborho ohwo rọ djẹ oshọ rọye ro de ru obo ri shehọ ọye ọ reyọ.” (Iruo Rẹ Iyinkọn Na 10:34, 35) Ihwo ri nẹ ẹkuotọ sansan rhe, ri ji vwo ohọroma sansan sa dia bẹdẹ siẹrẹ ayen da kerhọ rẹ Ọghẹnẹ.

Ororochọ: Akpọ che nu ohwo ọhọ siẹrẹ a da dia bẹdẹ.

Uyota: Ọghẹnẹ ro vwo ẹguọnọ rẹ avwanre, rọ je guọnọ nẹ oma vwerhen avwanre yen vwẹ uphẹn ra vwọ dia bẹdẹ kẹ avwanre. (Jems 1:17; 1 Jọn 4:8) Ọ riẹnre nẹ avwanre guọnọ iruo ro vwo ọhọre rere oma sa vwọ vwerhen avwanre. (Aghwoghwo 3:12) Ọghẹnẹ veri nẹ ihwo re cha dia bẹdẹ vwẹ akpọ na che ruiruo rọ cha kẹ ayen omavwerhovwẹn, ro ji che fi erere kẹ ayen vẹ ihwo rẹ ayen vwo ẹguọnọ kpahen.—Aizaya 65:22, 23.

Vwọ vrẹ ọyena, ọkieje yen ihwo re cha dia bẹdẹ vwẹ akpọ na che vwo yono erọnvwọn kpokpọ kpahen Ọmemama rayen vẹ iruo ride rọyen. Ọ ma ihworakpọ vẹ owenvwe rẹ ayen vwọ dia bẹdẹ, ji yono kpahọn, dede nẹ ayen “cha sa riẹn ẹtuọhọ vẹ oba rẹ iruo rẹ Ọghẹnẹ-ẹ.” (Aghwoghwo 3:10, 11) Ọtiọyena, ọkieje yen ihwo re cha dia bẹdẹ na che vwo vwo erọnvwọn kpokpọ rẹ ayen che yono, ji ru, re cha kẹ ayen omavwerhovwẹn.

a Iseri Jihova vwẹ uyono rẹ Baibol vwo muẹ kẹ ihwo ọphẹ. Wọ da guọnọ evuẹ efa, ni ividio rẹ Mavọ Yen E Ruẹ Uyono ri Baibol Wan?

b Ni uyovwinrota na “Idjerhe Vọ Yen Jesu Vwo Sivwin Avwanre?”