Baibol na tare nẹ Ọghẹnẹ guọnọre nẹ ihworakpọ “si oma nẹ ọfanrhiẹ.” (1 Kọrẹnt 6:18) Kirobo rẹ Baibol na djere, ubiota na “ọfanrhiẹ” churobọ si igberadja egbe, eshare ri du eshare, kugbe aye vẹ ọshare re mroma jẹ ayen je rọvwọ-ọn.

•  Mavọ yen ọ ghanre kẹ Ọghẹnẹ te re vwo ru orọnvwe tavwen a ke dia kugbe kerẹ aye gbe ọshare?

•  Kẹ ọ ra da dia kuẹgbe vwọ fuẹrẹn sẹ ihwo ivẹ na fo ohwohwo e ki ru orọnvwe na vwo?

•  Mavọ yen ihwo re rọvwọnre se vwo ru oyerinkugbe rayen ganphiyọ?

•   Obọ rẹ Ọghẹnẹ yen ọrhuẹrẹphiyotọ rẹ orọnvwe na nurhe. Ọghẹnẹ tonrọphiyọ ọke ro vwo ru orọnvwe rẹ ihworakpọ rẹsosuọ. (Jẹnẹsis 2:​22-24) Ọ guọnọre nẹ ọshare vẹ aye vuọvo re je rọvwọ-ọn dia kugbe-e.

•   Ọghẹnẹ riẹn obo ri me yovwin kẹ ihworakpọ. Ọ rhuẹrẹ irueru rẹ orọnvwe na rere aye gbe ọshare vwọ dia rhirin te ẹdẹ ughwu, rere o ji vwo fierere je sẹro rẹ ihwo rẹ orua na ejobi. Roro kpahen udje nana. Ọtiobo rẹ ọbe odjekẹ re ru nene orọnvwọn kpokpọ chọn ohwo uko vwọ nabọ rhuẹrẹ phiyọ ẹdia ye, eriyin odjekẹ rẹ Ọghẹnẹ je vuẹ avwanre obo re se vwo ru oyerinkugbe rẹ orua ganphiyọ. Iwan rẹ Ọghẹnẹ fierere vwọ kẹ ohwo ro nene ayen.​—Aizaya 48:​17, 18.

•   Obo ri nẹ obuko rẹ ọfanrhiẹn egbe cha sa gan mamọ. Kerẹ udje, ọ sa nẹrhẹ a mrevun ra guọnọre-e, mwa ega rẹ ọfanrhiẹn ghwa yan, ọ sa nẹrhẹ e rhiẹromrẹ odjadja ji vwo iroro ro tighiri.

•   Ọghẹnẹ vwẹ okẹ re vwo vwiẹ emọ womarẹ ovwerhẹn rẹ aye gbe ọshare vwọ kẹ ihworakpọ. Ọghẹnẹ ni arhọ ghanghanre, ẹgba re se vwo vwiẹ emọ jẹ okẹ ọghanghanre. Ọghẹnẹ guọnọre nẹ a vwẹ ẹro ọghanghanre vwo ni okẹ yena womarẹ e vwo muọghọ kẹ ọrhuẹrẹphiyotọ rẹ orọnvwe.​—Hibru 13:4.

 E se vwo phikparobọ vwẹ orọnvwe, o fori a vwọ “dia kugbe emerha” tavwen a ke rọvwọ-ọn. Ukperẹ ọtiọyen, oyerinkugbe rẹ ihwo ivẹ na se phikparobọ siẹrẹ ayen da nabọ vwo ẹruọ rẹ ohwohwo, je wiankugbe vwo phi ebẹnbẹn rayen kparobọ. a Orọnvwe ruẹ oyerinkugbe ganphiyọ.​—Matiu 19:6.

 O vwo orọnvwe vuọvo rọ gbare-e. Ẹkẹvuọvo, ihwo re rọvwọnre se ru oyerinkugbe rayen ganphiyọ siẹrẹ ayen da vwẹ uchebro ri Baibol na vwo ruiruo. Enana idje evo:

•   Vwẹ ọdavwẹ rẹ ọrivẹ rẹ orọnvwe wẹn ka ọbaro kẹ ọwẹn.​—1 Kọrẹnt 7:​3-5; Filipae 2:​3, 4.

•   Ovwan muọghọ ji vwo ẹguọnọ rẹ ohwohwo.​—Ẹfesọs 5:​25, 33.

•   Ovwan sun eta rẹ unu rẹ ovwan.​—Isẹ 12:18.

•   Ovwan chirakon rẹ ohwohwo ji fobọ vwo ghovwo ohwohwo.​—Kọlose 3:​13, 14.