Die Baibol na Ta Kpahen Eranvwe Ride rẹ Ọke Awanre re se Dinosaur?
Ẹkpahọnphiyọ rẹ Baibol na
Baibol na ta ota kpahen dinosaur phiọngu-un. Ẹkẹvuọvo, Baibol na tare nẹ Ọghẹnẹ yen “mama emu ejobi,” ọtiọyena dinosaur je hẹ usun rẹ erọnvwọn rẹ Ọghẹnẹ mare. a (Ẹvwọphia 4:11) Dede nẹ Baibol na ghwe djunute dinosaur phiọngu-un, jẹ ọ ta ota kpahen ẹko rẹ eranvwe evo rẹ dinosaur na sa dia usun rayen:
“Eniame ride.”—Jẹnẹsis 1:21
“Emu kemu ri kpono vwẹ otọ na.”—Jẹnẹsis 1:25.
“Eranvwe rẹ akpọ na.”—Jẹnẹsis 1:25.
Dinosaur mama nẹ eranvwe efa rhe?
Ibekun rẹ dinosaur ra tọn mrẹ djerephia nẹ ọ dia ayen mama rhe-e. Ọnana ghwa rhọvwenphiyọ oborẹ Baibol na tare nẹ Ọghẹnẹ yen ma eranvwe na eje. Kerẹ udje, Une Rẹ Ejiro 146:6 tare nẹ Ọghẹnẹ yen ọ “rọ ma odjuvwu vẹ akpọ, abadi na, kugbe obo re dia evun rẹ ayen ejobi.”
Ọke vọ yen dinosaur vwọ dia akpọ na?
Baibol na tare nẹ a ma eranvwe rẹ urhie vẹ e rẹ otọ na vwẹ ẹdẹ riyorin vẹ ẹdẹ resan, yẹrẹ vwẹ ọtonphiyọ rẹ emama. b (Jẹnẹsis 1:20-25, 31) Kọyen Baibol na nẹrhẹ a riẹn nẹ dinosaur na dia akpọ na ọke grongron.
Eranvwe re se Bẹhemọt vẹ Leviathan eyen dinosaur?
Ẹjo. Dede nẹ a cha ghwa sa ta vẹ imuẹro oka rẹ eranvwe re djunute vwẹ ọbe rẹ Job na-a, jẹ ihwo buebun tare nẹ eniame yen Bẹhemọt, Leviathan ke rha edjerhe. Obore ihwo dje ayen wan, ji shephiyọ vẹ oborẹ Baibol na djisẹ rayen. (Job 40:15-23; 41:1, 14-17, 31) Obo rọ wanre eje, a cha sa tanẹ “Bẹhemọt” vẹ Leviathan eyen dinosaur kakaka-a. Ọghẹnẹ vuẹ Job nẹ ọ nabọ ni eranvwe nana komobọ, jẹ Job yerin ọke grongron rẹ dinosaur vwo ghwu vwo nẹ akpọ na nu.—Job 40:16; 41:8.
Die yen phia kẹ dinosaur?
Baibol na ghwa ta ota kpahen obo re phia kẹ dinosaur na-a. Ẹkẹvuọvo, ọ tare nẹ a ma emu eje fikirẹ “ọhọre” rẹ Ọghẹnẹ, kọyen o vwo oboresorọ Ọghẹnẹ vwọ ma dinosaur. (Ẹvwọphia 4:11) Ọke rẹ ọhọre rọyen yena vwo rugba nu, Ọghẹnẹ da nẹrhẹ ayen eje kanre akpọ na.
a Ibekun ra tọn mrẹ djerephia nẹ dinosaur diarọ jovwo. Vwọrẹ uyota, ibekun ra tọn mrẹ tiọyena djerephia nẹ vwẹ ọkievo re wanre, oka rẹ dinosaur sansan vọn akpọ na.
b Vwẹ Baibol na, ubiota na “ẹdẹ” se mudiaphiyọ ikpe re vrẹn uriorin buebun.—Jẹnẹsis 1:31; 2:1-4; Hibru 4:4, 11.