Baibol na djisẹ rẹ erọnvwọn re cha phia, ẹdia sansan, kugbe iruemu rẹ ihwo re cha jokaphiyọ “okuphiyọ rẹ eyeren” nana yẹrẹ “oba rẹ akpọ na.” (Matiu 24:3; King James Version) Baibol na se uvwre ọke nana “ẹdẹ re koba na” kugbe “ọke rẹ oba na,” yẹrẹ “oba rẹ ẹdẹ na.”​—2 Timoti 3:1; Daniẹl 8:19; Easy-to-Read Version.

 Baibol na mraro kpahen erọnvwọn buebun ri che kuomakugbe vwọ dia “oka” re che vwo vughe ẹdẹ re koba na. (Luk 21:7) Roro kpahen idje evo:

 Ifovwin vwẹ akpọeje. Jesu tare nẹ: “Ẹkuotọ cha vwọso ẹkuotọ, uvie cha vwọso uvie.” (Matiu 24:7) Vwẹ idjerhe vuọvo na, Ẹvwọphia 6:4 je mraro kpahen ọguiyesi ro mudiaphiyọ ofovwin rọ cha “reyọ ufuoma vwo nẹ akpọ na.”

 Owẹnvwe. Jesu mraro phiyotọ nẹ: “Emu cha kanre.” (Matiu 24:7) Ọbe rẹ Ẹvwọphia mraro kpahen ọguiyesi rẹ udje ọfa, rẹ ẹgua rọyen cha so owẹnvwe vwẹ asan buebun.​—Ẹvwọphia 6:​5, 6.

 Etọ ri che kpogho gangan. Jesu tare nẹ “etọ che kpogho nẹ asan ọvo vwo kpo ọfa.” (Matiu 24:7; Luk 21:11) Etọ ri che kpogho gangan vwẹ akpọ na cha so ojaẹriọ kugbe ughwu te ẹdia ra je rhe mrẹ dẹvo-o.

 Ega. Kirobo ri Jesu djere, ega sansan yẹrẹ “ega ri muoshọ” cha ro akpọ na eje.​—Luk 21:​11, Contemporary English Version.

 Urhiẹchọ. Dede nẹ jurhi ẹyọnrọn herọ vwẹ ikpe ujorin buebun rhire na, jẹ Jesu mraro phiyotọ nẹ vwẹ ẹdẹ re koba na “jurhi ẹyọnrọn” che bunphiyọ.​—Matiu 24:12.

 Ẹghwọrọ rẹ akpọ na. Ẹvwọphia 11:18 mraro phiyotọ nẹ ihworakpọ cha rha “ghwọrọ akpọ na.” Ayen che ru ọtiọyen vwẹ idjerhe buebun, ọ dia womarẹ ozighi-egbe vẹ ogbiru ọvo-o ẹkẹvuọvo ayen je vwọ ghwọrọ otọrakpọ na.

 Iruemu rẹ ihwo re bra phiyọ. Vwẹ 2 Timoti 3:​1-4, Baibol na mraro phiyotọ nẹ ihwo “cha kpẹvwẹ ẹse-e, cha fuevu-un, . . . ota rẹ ohwo ọfa cha ro aye-en, che miovwin ihwo, che se sun oma raye-en, cha djoma, che vwo ẹguọnọ rẹ emu esiri-i, cha shẹ ihwo, che ru uyovwin gangan, che ni oma rhuarho.” Iruemu nana cha bra te ẹdia re de djisẹ rẹ uvwre ọke yena nẹ ọyen “ọke ọgangan rọ bẹn eyeren.”

 Orua re hra. Vwẹ 2 Timoti 3:​2, 3, Baibol na tarọ phiyotọ nẹ ihwo buebun “che vwo ẹguọnọ” rẹ orua raye-en, emọ ji “che muọghọ kẹ esẹ vẹ ini-i.”

 Ẹguọnọ re vwo kpahen Ọghẹnẹ che shekpotọ. Jesu tarọ phiyotọ nẹ: “Ẹguọnọ rẹ ihwo buebun . . . che djiro.” (Matiu 24:12) Ota ri Jesu na mudiaphiyọ nẹ ẹguọnọ rẹ ihwo buebun vwo kpahen Ọghẹnẹ che djiro. Vwẹ idjerhe vuọvo na, 2 Timoti 3:4 je tanẹ vwẹ ẹdẹ re koba na, ihwo tiọyena “che vwo ẹguọnọ rẹ akpọẹriọ ukperẹ ẹguọnọ rẹ Ọghẹnẹ.”

 Omeru rẹ ẹga. Vwẹ 2 Timoti 3:​5, Baibol na tarọ phiyotọ nẹ ihwo che ru kerẹsiẹ a da mrẹ nẹ ayen ga Ọghẹnẹ ẹkẹvuọvo ayen che yeren akpọ nene iwan rọye-en.

 E che vwo ẹruọ rẹ aroẹmrẹ ri Baibol kpobarophiyọ. Ọbe ri Daniẹl tarọ phiyotọ nẹ vwẹ “ọke rẹ oba na,” ihwo buebun che vwo erianriẹn rẹ uyota ri Baibol na kodophiyọ, ayen ji che vwo ẹruọ rẹ aroẹmrẹ nana gbagba.​—Daniẹl 12:4.

 Iruo aghwoghwo re che ru vwẹ akpọeje. Jesu tarọ phiyotọ nẹ: “E che ghwoghwo iyẹnrẹn esiri rẹ Uvie na vwẹ akpọ na ejobi.”​—Matiu 24:14.

 Ọjẹfia kugbe ehwẹjẹ vwẹ asan eje. Jesu tarọ phiyotọ nẹ ihwo buebun che chukoku imuẹro ri kokoroko ro djerephia nẹ oba na sikẹrire. (Matiu 24:​37-39) Vwọ vrẹ ọyena, 2 Pita 3:​3, 4 tarọ phiyotọ nẹ ihwo evo cha vwẹ imuẹro na vwọ jehwẹ, ayen me jẹfia karekare.

 Aroẹmrẹ eje che rugba. Jesu tarọ nẹ orugba rẹ aroẹmrẹ nana eje vwẹ ọke vuọvo yen cha jokaphiyọ oba rẹ ẹdẹ na, ọ dia emevo yẹrẹ buebun rayen ri che rugba ẹsiẹvuọvo-o.​—Matiu 24:33.

 E. Obo re phia vwẹ akpọ na kugbe ikekeri ri Baibol na djerephia nẹ ẹdẹ re koba na tonphiyọ vwẹ ukpe ri 1914, ukpe rẹ Ofovwin rẹ Akpeje I tonphiyọ. Rere wọ vwọ mrẹ oborẹ erọnvwọn re phia vwẹ akpọ na vwo djephia nẹ avwanre yerẹn vwẹ ẹdẹ re koba na, ni ividio na:

Uvie rẹ Ọghẹnẹ tuẹn usuon phiyọ vwẹ obodjuvwu vwẹ ukpe ri 1914, ọvo vwẹ usun rẹ erọnvwọn rẹsosuọ ro ruru yen ọ vwọ djẹ Eshu rọ dia  Idẹbono na vẹ emekashe rọyen nẹ obodjuvwu, ji gbere ughwru kẹ ayen nẹ akpọ na ọvo yen ayen de se ru oborẹ ayen che ru. (Ẹvwọphia 12:​7-12) Oriẹriẹvwe rẹ Eshu vwẹ oma rẹ ihworakpọ nabọ teyenphia vwẹ iruemu vẹ irueru ebrabra buebun rẹ ayen ruẹ re nẹrhẹ ẹdẹ re koba na dia “ọke ọgangan rọ bẹn eyeren.”​—2 Timoti 3:1.

 Ọke ọgangan nana nẹrhẹ ofu dje ihwo buebun. Ọ da ayen nẹ ihworakpọ rhoma miovwẹnphiyọ miovwẹnphiyọ. Oshọ tobọ muẹ ihwo evo nẹ ihworakpọ che hwe omoma rayen vwẹ obaro na.

 Dedena ihwo efa rẹ ofu ji dje fikirẹ obo re phia vwẹ akpọ na vwo iphiẹrophiyọ nẹ erọnvwọn che yovwin vwẹ obaro na. O mu ayen ẹro dẹn nẹ Uvie rẹ Ọghẹnẹ che si ebẹnbẹn rẹ akpọ na ejobi no kẹrẹkpẹ. (Daniẹl 2:44; Ẹvwọphia 21:​3, 4) Ayen vwẹ erhiorin hẹrhẹ ọke rẹ Ọghẹnẹ che vwo ru ive rọyen gba, ayen je mrẹ uchebro vwẹ eta ri Jesu nana: “Ohwo ro chirakon toba yen che vwo usivwin.”​—Matiu 24:13; Maika 7:7.