Jihova Ọghẹnẹ, Ọromevwẹgba na yen “Ẹsosuọ kugbe Oba” na. Ota nana vwomaphia abọ erha vwẹ Baibol na.​—Ẹvwọphia 1:8; 21:6; 22:13. *

Ẹsosuọ kugbe oba ọyen ubiota rẹsosuọ vẹ ọ rọ koba vwẹ ibiwe rẹ Grik, rọ dia ejajẹ re vwo si ẹbẹre rẹ Baibol na ra riẹn phiyọ Ọphọ Kpokpọ, rẹ ọbe rẹ Ẹvwọphia je dia ẹbẹre ọvo rọyen. A vwẹ asan rẹ ibieta ivẹ nana hepha vwẹ ibiwe rẹ Grik na vwo dje nẹ Jihova ọvo yen ọtonphiyọ kugbe oba. (Ẹvwọphia 21:6) Ọyen Ọghẹnẹ Romevwẹgba vwo nẹ awanre rhe, ọyen je cha dia Ọghẹnẹ Romevwẹgba bẹdẹ bẹdẹ. Ọyen ọvo yen herọ “nẹ irhiri re duvwu irhiri.”​—Une Rẹ Ejiro 90:2.

Baibol na vwẹ ota nana vwọ ta ota kpahen Jihova Ọghẹnẹ vẹ Ọmọ rọyen Jesu, ẹkẹvuọvo, obo ro mudiaphiyọ fẹnẹre. Roro kpahen idje ivẹ.

• Vwẹ Aizaya 44:6, Jihova tare nẹ: “Mẹvwẹ ọ rẹ ẹsosuọ Mẹvwẹ ọ rọ ka oba Ọghẹnẹ ọfa gbe herọ vrẹn vwẹ-ẹ.” Vwẹ etinẹ na, Ọghẹnẹ kanrunumuo nẹ ọyen yen Ọghẹnẹ rẹ uyota rẹ bẹdẹ na; ọfa herọ vwọba-a. (Urhi Rivẹ 4:35, 39) Vwẹ ẹdia nana, oborẹ ota na “ẹsosuọ kugbe oba” mudiaphiyọ, yen “Ẹsosuọ kugbe Oba” ji mudiaphiyọ.

• Vwọba, ota na “ohwo rẹsosuọ [pro’tos, ọ dia ẹsosuọ-ọ] kugbe ọ rọ ka oba [e’skha·tos, ọ dia oba-a]” vwomaphia vwẹ Ẹvwọphia 1:17, 18 vẹ 2:8. Vwẹ awọreta nana, obo ra tare djerephia nẹ ohwo ra ta ota kpahen na ghwuru, o de ji vrẹn nushi. Ọtiọyena, awọreta nana che se shekpahen Ọghẹnẹ-ẹ kidie Ọghẹnẹ ji ghwu dẹvo-o. (Habakọk 1:12) Ẹkẹvuọvo, Jesu ghwuru, a da je kparọ nushi. (Iruo Rẹ Iyinkọn Na 3:13-15) Jesu yen ohworakpọ rẹsosuọ re tu rhọnvwọn nushi kpo odjuvwu kerẹ ohwo rẹ ẹwẹn ro ghwẹ-ẹ, enẹna, o yerẹn “bẹdẹ.” (Ẹvwọphia 1:18; Kọlose 1:18) Womarẹ Jesu yen a wan kpare ihwo ri chekọ ejobi ri ghwuru vwo nushi. (Jọn 6:40, 44) Ọtiọyena, ọyen hẹ ohwo rọ ka oba rẹ Ọghẹnẹ ọvo rhọnvwọn vwo nushi. (Iruo Rẹ Iyinkọn Na 10:40) Vwẹ ọ rẹ ọhọ nana, ke se se Jesu nẹ “ohwo Rẹsosuọ kugbe ọ rọ ka Oba.”

Ẹjo. E djunute ohwo rọ ta ota vwẹ Ẹvwọphia 22:13 na-a, jẹ ihwo sansan yen ta ota vwẹ uyovwin yena. Ọke rẹ Professor William Barclay vwọ ta ota kpahen ẹbẹre nana rẹ ọbe rẹ Ẹvwọphia na, o de si: “E si eta na utute-e; . . . ọke buebun, ọ vwọ bẹn a vwọ riẹn ohwo rọ ghene ta ota.” (The Revelation of John, Ukori 2, Ọ Ra Rhoma Si, aruọbe 223) Ọtiọyena, “Ẹsosuọ kugbe Oba” na re djunute vwẹ Ẹvwọphia 22:13 yen je hẹ Ohwo vuọvo ra je vwẹ odova nana vwo se vwẹ asan ọfa vwẹ Ẹvwọphia, ọyen Jihova Ọghẹnẹ.