E, Idẹbono ọyen obọdẹn rẹ ohwo. Ọyehẹ “osun rẹ akpọ nana,” ohwo rẹ ẹwẹn rọ rhe dia orumwemwu je vwọso Ọghẹnẹ. (Jọn 14:30; Ẹfesọs 6:11, 12) Baibol na dje oka rẹ ohwo rẹ Idẹbono hepha womarẹ edẹ vẹ idjedje nana:

•   Eshu, ro mudiaphiyọ “Ọrọvwọsua.”—Job 1:6.

•   Idẹbono, ro mudiaphiyọ “Ọromiovwohwo.”—Ẹvwọphia 12:9.

•   Ọrọdekọ, a vwerọ wian vwẹ Baibol na vwo mudiaphiyọ “Ọrọphiohwo.”—2 Kọrẹnt 11:3.

•   Ọrọdavwohwo.—Matiu 4:3.

•   Ọvwọrofian.—Jọn 8:44.

Ọ dia ẹwẹn yẹrẹ uruemu rẹ umiovwo rọhẹ oma rẹ ohwo-o

 Ihwo evo ni Eshu rọ dia Idẹbono na kerẹ ẹwẹn yẹrẹ uruemu rẹ umiovwo rọhẹ oma avwanre. Ẹkẹvuọvo, Baibol na djunute otaẹtakugbe ọvo rọ vwomaphia vwẹ uvwre rẹ Ọghẹnẹ vẹ Eshu. Ọghẹnẹ pha gbagba, ọtiọyena o rhe che se vwo orọnvwọn umiovwo ọvo vwẹ oma rọye-en. (Urhi Rivẹ 32:4; Job 2:1-6) Vwẹ idjerhe vuọvo na, Eshu davwen Jesu rọ vrabọ rẹ umwemwu ni. (Matiu 4:8-10; 1 Jọn 3:5) Ọtiọyena, Baibol na de djephia nẹ Idẹbono ghene herọ, ọ dia oka rẹ umwemwu-u.

 Ofori nẹ o gbe avwanre unu nẹ ihwo buebun rhe vwo imuẹro nẹ Idẹbono ghene herọ-ọ? Ẹjo, kidie Baibol na tare nẹ Eshu cha reyọ ophiẹnvwe vwọ ru ọdavwẹ rọyen gba. (2 Tẹsalonaika 2:9, 10) Ọvo vwẹ usun rẹ ona rọ ma rho ro vwori ọyen ọ vwọ phiẹn ihwo buebun vwo roro nẹ ọyen herọ-ọ.—2 Kọrẹnt 4:4.

Efian: Lucifer ọyen odẹ rẹ Idẹbono ọfa.

 Uyota: Vwẹ Baibol evo, ota rẹ Hibru ra fan kpo “Lucifer” mudiaphiyọ “ọ ro lo.” (Aizaya 14:12, NW ) Eta re riariẹ owọrota yena phiyọ djerephia nẹ ota yena mudiaphiyọ urhiẹ rẹ ivie ri Babilọn rẹ Ọghẹnẹ cha phọphọ fikirẹ omaephuo rọyen. (Aizaya 14:4, 13-20) A reyọ ota na “ọ ro lo na” vwọ vwẹ urhiẹ rẹ ivie ri Babilọn jehwẹ vwo nẹ ọke re vwo phiokparobọ nu.

Efian: Eshu wian kẹ Ọghẹnẹ kerẹ “oguẹdjọ rọ vwẹ oja re ihwo.”

 Uyota: Idẹbono ọyen ọvweghrẹn rẹ Ọghẹnẹ, ọ dia odibo rọye-en. Idẹbono vwọso ji gun ẹfian nyẹ ihwo re ga Ọghẹnẹ.—1 Pita 5:8; Ẹvwọphia 12:10.