Ugbeyan se toroba omavwerhovwẹn je nẹrhẹ e phikparobọ vwẹ akpeyeren. Omamọ rẹ igbeyan toroba uruemu rẹ ohwohwo vwọrẹ erhuvwu je nẹrhẹ a dia omamọ rẹ ihwo.​—Isẹ 27:17.

 Ẹkẹvuọvo, Baibol na kanrunumu obo rọ ghanre te ra vwọ vwẹ aghwanre sane igbeyan. O si avwanre orhọ kpahen imuoshọ rọ herọ e de mu orharhe rẹ igbeyan. (Isẹ 13:20; 1 Kọrẹnt 15:33) Ohwo ro mu igbeyan tiọyena se brorhiẹn rẹ ẹkpa, yẹrẹ miovwon omamọ rẹ iruemu ro vwori.

Vwẹ uyovwinrota nana

•  Die yen omamọ rẹ igbeyan ruẹ?

•  Erhọ yen idje rẹ ihwo evo re dia omamọ rẹ igbeyan vwẹ Baibol na?

•  A sa dia ugbeyan rẹ Ọghẹnẹ?

•  Ẹkpo ri Baibol ri shekpahen ugbeyan emuo

 Baibol na yonori nẹ omamọ rẹ igbeyan vrẹ ọ rẹ ayen vwo vwo omavwerhovwẹn kpahen orọnvwọn ọvo. Kerẹ udje, Une rẹ Ejiro 119:63 da ta: “Mẹvwẹ otu rẹ ayen ihwo re djẹ oshọ wẹn a, ọvo vwẹ ayen otu re yọnrọn iji wẹn.” Noso nẹ ohwo ro si ẹkpo ri Baibol nana tare nẹ ihwo ri vwo oshọẹdjẹ rẹ Ọghẹnẹ, ri ji vwo owenvwe rẹ ayen vwo yeren akpọ nene iwan rọyen yen o vwo mu igbeyan.

 Baibol na kanrunumu iruemu ro fori nẹ omamọ rẹ ugbeyan vwo. Kerẹ udje:

•   “Igbeyan vwo ẹguọnọ kpahe ohwo kọke kọke, e vwiẹ oniọvo kpahe ohwo fiki rẹ ẹdoja.”​—Isẹ 17:17.

•   “Igbeyan evo herọ re vwẹ oma ruẹ igbeyan, ẹkẹvuọvo ugbeyan ọvo herọ re kẹrẹ ohwo nọ oniọvo.”​—Isẹ 18:24.

 Ẹkpo nana yono avwanre nẹ omamọ rẹ ugbeyan fuevun, dje ẹguọnọ phia, vwo uruemuesiri ji ruẹse. Omamọ rẹ ugbeyan ọyen ohwo ra sa vwẹroso nẹ ọ cha chọn avwanre uko vwẹ ọke rẹ ebẹnbẹn. Omamọ rẹ ugbeyan fiudugberẹ ta ota phia ọke re de ruẹ obo ri je fo, yẹrẹ a da guọnọ brorhiẹn rẹ ẹkpa.​—Isẹ 27:​6, 9.

 Baibol na vọnre vẹ idje rẹ ihwo re dia omamọ rẹ igbeyan dede nẹ asan rẹ ayen nurhe, ẹkuruemu, ikpe, kugbe ẹdia rẹ ayen hepha fẹnẹ ohwohwo. Roro kpahen igbeyan erha tiọyena.

•   Rutu vẹ Naomi. Naomi ọyen oniorọnvwe ri Rutu, o ji muẹro nẹ Naomi che vie Ruru shesheri. Vwọba, ẹkuruemu rẹ asan ri Rutu nurhe fẹnẹ ọ ri Naomi. Dede nẹ ayen fẹnẹre vwẹ ẹdia nana, jẹ ayen ihwo ivẹ na uvi rẹ igbeyan.​—Rutu 1:16.

•   Devid vẹ Jonatan. Dede nẹ Jonatan vwẹ ẹgbukpe 30 vwo vie Devid, Baibol na tare nẹ “Jonatan de rhi churu mu erhi ri Devid.”​—1 Samuẹl 18:1.

•   Jesu vẹ iyinkọn rọyen. Jesu vwo ọgangan vwẹ enu rẹ iyinkọn rọyen kidie oyono vẹ onini rayen yen o ruẹ. (Jọn 13:13) Dedena, o vwo ọke vuọvo ro vwo no nẹ ayen dia ihwo ri muwan rẹ vwọ dia igbeyan rọye-en. Ukperẹ ọtiọyen, Jesu vẹ ihwo ri nene iyono rọyen vwo uvi rẹ oyerinkugbe. Ọ da ta: “Mi se ovwan igbeyan, kidie obo ri mi nyo mie Ọsẹ mẹ ejobi me vwẹ ayen phia kẹ ovwan.”​—Jọn 15:​14, 15.

 E, ihworakpọ sa dia igbeyan rẹ Ọghẹnẹ. Baibol na tare nẹ, “Ọ vwẹ ẹro sua ohwo rọ dia ọvwata.” (Isẹ 3:32) Ọnana mudiaphiyọ nẹ ihwo ri Jihova vwo mu igbeyan, eyẹn ihwo re pha dẹndẹn, re fuevun, ri dje uruemu rẹ ọghọ phia, re je davwẹngba rẹ ayen vwo yerin mu iwan rọyen. Kerẹ udje, e se Ebraham ugbeyan rẹ Ọghẹnẹ vwẹ Baibol na.​—2 Ikun Rivie 20:7; Aizaya 41:8; Jems 2:23.