Jesu sivwin ihworakpọ re fuevun ọke rọ vwọ vwẹ arhọ rọyen kpahotọ kẹ ayen. (Matiu 20:28) Ọ da je ta: Esivwo rha hẹ oma rẹ ohwo ọfa-a, kidie odẹ ọfa rha hẹ otọ rẹ odjuvwu re mu kẹ ihwo ro se sivwi avwanre-e.”—Iruo Rẹ Iyinkọn Na 4:12.

 Jesu ‘davwen ughwu ni kẹ kohwo kohwo’ ro sere gbuyota. (Hibru 2:9; Jọn 3:16) Ọyena vwọ wan nu, Ọghẹnẹ da kparọ “vrẹn nẹ ughwu,” Jesu de rhivwin kpo odjuvwu kerẹ ohwo ẹwẹn. (Iruo Rẹ Iyinkọn Na 3:15) Ọtiọyena, Jesu “ko se sivwi kohwo kohwo rọ wan oma rọye sikẹre Ọghẹnẹ, fikiridie ọ herọ kọke kọke rọ vwọ rẹ kẹ ayen.”—Hibru 7:25.

Diesorọ avwanre vwọ guọnọ nẹ Jesu rẹ kẹ avwanre?

 Kidie avwanre eje irumwemwu. (Rom 3:23) Umwemwu da hẹriẹ avwanre vẹ Ọghẹnẹ, umwemwu suẹn kpo ughwu. (Rom 6:23) Ẹkẹvuọvo Jesu da dia “obruche” kẹ ihwo ri vwo esegbuyota kpahen izobo rẹ ọtanhirh rọyen. (1Jọn 2:1) Kọ rẹ kẹ ayen, rere Ọghẹnẹ vwọ kerhọ rẹ ẹrhovwo rayen, je vwẹ imwemwu rayen vwo ghovwo ayen fikirẹ izobo rẹ ughwu rẹ Jesu. (Matiu 1:21; Rom 8:34) Ọghẹnẹ kpahenphiyọ oyare rẹ Jesu na, kidie oyare na shephiyọ ọhọre rọyen. Ọghẹnẹ ji Jesu rhe rere “akpọ na vwọ sa wan oma rọye rhọ.”—Jọn 3:17.

Esegbuyota kpahen Jesu ọvo teri re vwo vwo usivwin

 Ẹjo. Dede nẹ ofori e vwo esegbuyota kpahen Jesu e se vwo vwo usivwin, jẹ a je guọnọ emu ọfa. (Iruo Rẹ Iyinkọn Na 16:30, 31) Baibol na da ta: “Kirobo rẹ ẹwẹn de nẹ ohwo o mi ghwu na, eriyin esegbuyota ro vwo iruo-o ji ghwu rhe.” (Jems 2:26) Re vwo sivwin rhọ, ofori e vwo:

•   Yono kpahen Jesu vẹ Ọsẹ rọyen, Jihova.—Jọn 17:3.

•   Vwo esegbuyota kpahen ayen.—Jọn 12:44; 14:1.

•   Dje esegbuyota rẹ avwanre phia womarẹ a vwọ kerhọ rẹ iji rayen. (Luk 6:46; 1 Jọn 2:17) Jesu tare nẹ ọ dia ihwo eje ri se re “Ọrovwohwo” yen che vwo usivwi-in, ẹkẹvuọvo ihwo ri “ru ẹguọnọ rẹ Ọsẹ [rọyen] rọ hẹ obo odjuvwu.”—Matiu 7:21.

•   Dje esegbuyota rẹ avwanre phia ọkieje dede nẹ uwenre ganre. Jesu dje ẹkpo yena phephẹn rọ vwọ ta: “Ihwo ri se chirako te oba, kẹ eye re cha rhọ.”—Matiu 24:13.