Ikuegbe ri Lazarọs vẹ ọdafe ri Jesu djunute na dia obo re phiare-e. (Luk 16:​19-31) Vwẹ ikuegbe na, eshare nana mudiaphiyọ ẹko rẹ ihwo ivẹ: (1) ilori rẹ ẹga rẹ ihwo ri Ju ri phuoma vwẹ ọke ri Jesu kugbe (2) ihwo ghevweghe ri rhiabọreyọ iyono ri Jesu.

Vwẹ uyovwinrota nana

•  Die yen Jesu ta kpahen Lazarọs vẹ ọdafe na?

•  Ikuegbe nana ghene phia?

•  Ikuegbe na rhọnvwephiyọ uyono rẹ ẹtẹrhe rẹ erhanre?

•  Die yen ikuegbe ri Lazarọs vẹ ọdafe na mudiaphiyọ?

 Vwẹ Luk uyovwin 16, Jesu ta ota kpahen eshare ivẹ rẹ ẹdia rẹ akpeyeren rayen weneri.

 Ọnana yen ọdjẹkoko rẹ ikuegbe ri Jesu na: Ọdafe rode ọvo vwo ekuakua rẹ akpeyeren buebun. Ovwiogbere ọvo re se Lazarọs chidia anurhoro rẹ ọdafe na; o vwo owenvwe rọ vwọ re emu ro she nẹ enu rẹ emẹjẹ rẹ ọdafe na cha. Ọke vwọ yanran na, Lazarọs de ghwu, emekashe de muo vwo kpo ẹbẹre rẹ Ebraham hepha. Ọdafe na de ji ghwu, e de sho. Vwẹ ikuegbe na, a ta ota kpahen ihwo ivẹ nana kerẹ ihwo ri yerẹn vwẹ ọke rẹ ayen vwo ghwu nu. Ọdafe ro ghwuru na dahẹ ẹdia rẹ odjadja vwevunrẹ erhanre, ọ da vuẹ Ebraham nẹ Lazarọs duvwun urhiobọ rọyen phiyọ ame, o suon phiyọ ẹrẹnvwe rọyen rere o djiro. Ebraham sen oyare rẹ ọdafe na, ọ da vuẹ nẹ ẹdia rẹ akpeyeren rayen weneri asaọkiephana re, a je tọn ọgọdọ rode ra cha sa shariẹ-ẹ phiyọ uvwre rayen.

 Ẹjo. Ọnana itẹ ri Jesu kperi vwo yono uyono ọghanghanre ọvo. Ihwo ri yono ẹbe kodo rhọnvwere nẹ ọnana ghini itẹ. Kerẹ udje, uyovwinrota otete ọvo vwẹ Luther’s Bible ra vwọphia vwẹ 1912 tare nẹ ọnana itẹ. Vwẹ Jerusalem Bible, ẹbẹre rẹ eta rehẹ obotọ tare nẹ ọnana “itẹ re kperi vwo gbikuegbe ro shekpahen ohwo vuọvo ro yerin wanre-e.”

 Akpọ re che yerin siẹrẹ e de ghwu nu yen itẹ ri Jesu na shekpahen? Ọ tanẹ ihwo evo rioja vwẹ ẹtẹrhe rẹ erhanre siẹrẹ ayen de ghwu nu, nẹ Ebraham vẹ Lazarọs hẹ odjuvwu? Erọnvwọn buebun djerephia nẹ ọ dia ọtiọyen yen ọ hepha-a.

 Kerẹ udje:

•   Ọ da ghene dianẹ evunrẹ erhanre yen ọdafe na hepha, erhanre na rha ya ame rọhẹ urhiobọ ri Lazarọs na mu?

•   Ọ rha tobọ yamu-u, amame ro che sun vwo nẹ urhiobọ ri Lazarọs rhe na se hwe urhurhu rẹ ame ro sio na?

•   Mavọ yen Ebraham sa vwọ dia udjuvwu, jẹ Jesu tarọ phephẹn nẹ ọke rẹ ọyen vwọ hẹ akpọ na ohwo vuọvo ji kpo odjuvwu-u?​—Jọn 3:13.

 Ẹjo. Dede nẹ ikuegbe nana dia obo re ghene phia-a, jẹ ihwo evo phraphro kpahọn nẹ o mudiaphiyọ nẹ ihwo esiri ri ghwuru kpo odjuvwu, erharhe rẹ ihwo me rha rioja vwẹ ẹtẹrhe rẹ erhanre. a

 Iroro yena ghene gba? Ẹjo.

 Uyono rẹ ẹtẹrhe rẹ erhanre rhọnvwephiyọ obo ri Baibol na ta kpahen ẹdia rẹ ihwo ri ghwuru hepha-a. Kerẹ udje, ọ tare nẹ ihwo esiri ri ghwuru kpo odjuvwu re yeren akpọ rẹ omavwerhovwẹ-ẹn, yẹrẹ ke gboja kẹ erharhe rẹ ihwo vwẹ ẹtẹrhe rẹ erhanre-e. Ukperẹ ọtiọyen, Baibol na da ta: “Ihwo ekpokpọ riẹnre nẹ ayen che ghwu, ẹkẹvuọvo ihwo ri ghwuru riẹn emu ọvuọvo-o.”​—Aghwoghwo 9:5.

 Ikuegbe na djerephia nẹ ẹko rẹ ihwo ivẹ che rhiẹromrẹ ewene vwẹ akpeyeren rayen kẹrẹkpẹ.

 Ọdafe na mudiaphiyọ ilori rẹ ẹga rẹ ihwo ri Ju ri “vwo ubiupho rẹ igho.” (Luk 16:14) Ayen kerhọ vwẹ ọke ri Jesu vwọ ta ota, ẹkẹvuọvo ayen vwọso obo rọ ta. Ilori rẹ ẹga na vwẹ ẹro okueku vwo nẹ ihwo ghevweghe na.​—Jọn 7:49.

 Lazarọs mudiaphiyọ ihwo ghevweghe ri rhiabọreyọ iyono ri Jesu, rẹ ilori rẹ ẹga rẹ ihwo ri Ju niri kueku.

 Ewene rọ vwomaphia vwẹ uvwre rẹ ẹko rẹ ihwo ivẹ nana rhoro mamọ.

•   Ilori rẹ ẹga rẹ ihwo ri Ju na rori nẹ ayen vwo aroesiri rẹ Ọghẹnẹ. Ẹkẹvuọvo, ọ họhọre nẹ ayen ghwuru kidie Ọghẹnẹ sen ẹga rayen womarẹ iyono ri Jesu rẹ ayen senre. Ovuẹ ri Jesu vẹ idibo rọyen ghwoghwori na pha kerẹ erhanre rọ torhẹ ayen.​—Matiu 23:​29, 30; Iruo rẹ Iyinkọn Na 5:​29-33.

•   Ihwo ghevweghe rẹ ilori rẹ ẹga na nẹ kueku ọke grongron rhire na, rhi vwo aroesiri rẹ Ọghẹnẹ asaọkiephana. Buebun rayen rhiabọreyọ iyono ri Jesu je mrẹ erere nẹ ayen rhe. Uphẹn rẹ ayen vwọ riavwerhen rẹ aroesiri rẹ Ọghẹnẹ bẹdẹ de rhi rhiephiyọ enẹna.​—Jọn 17:3.