Ọke buebun yen a vwọ vwẹ “Omamọ ohwo ri Sameria” na vwo djisẹ rẹ ohwo rọ jowọ rọ vwọ vwẹ ukẹcha kẹ ihwo re guọnọ ukẹcha. Ọnana ota ro nẹ ikuegbe yẹrẹ itẹ ri Jesu kperi, vwo djephia nẹ omamọ rẹ ọrivẹ ọyen ohwo rọ vwẹ ukẹcha kẹ ihwo efa fikirẹ arodọnvwẹ, o toro ẹkuruemu yẹrẹ asan rẹ ayen nurhe-e.

Vwẹ uyovwinrota nana

•  Mavọ yen Jesu kpe itẹ rẹ “Omamọ Ohwo ri Sameria” na?

•  Diesorọ Jesu vwo kpe itẹ nana?

•  Die yen e se yono vwo nẹ itẹ na rhe?

•  Amono yen ihwo ri Sameria?

•  Ikuegbe rẹ “Omamọ Ohwo ri Sameria” na ghene phia?

Ọnana yen ọdjẹkoko rẹ ikuegbe ri Jesu na: Ohwo ri Ju ọvo nẹ Jerusalẹm kpo Jẹriko. Vwẹ idjerhe, iji de gborho ji hwe, ayen da yan jovwo nẹ o ghwu.

Orherẹn rẹ ohwo ri Ju ọvo rọ yan kanrọ da yan jovwo, ọtiọyen ji te olori rẹ ẹga rẹ ohwo ri Ju ọvo. Dede nẹ asan ọvo yen ayen vẹ ọshare na nurhe, jẹ ọvuọvo vwẹ usun rayen na domaji vwọ vwẹ ukẹcha kẹ-ẹ.

Ukuotọ rọyen, ọshare ọvo ro nẹ ẹkuotọ ọfa rhe da domaji. Ọyen ohwo ri Sameria. (Luk 10:33; 17:​16-18) Vẹ arodọnvwẹ, ohwo ri Sameria na de sivwin era rẹ ọshare na. O de muo kpo uwevwin ọvo rẹ erhorha wonphiyọ. A da vwẹrote kọkirhie. Vwẹ ẹdẹ rọ vwọ kpahọn, ọ da hwosa kẹ ọrọvwẹrote uwevwin na rere ọ vwẹrote ọshare na, o de ve kẹ nẹ ọ da dianẹ ọ ghwọrọ igho efa, ọyen che rhivwin rhe rhe hwa ayen.​—Luk 10:​30-35.

Jesu gbe ikuegbe nana kẹ ọshare ọvo ro rori nẹ ihwo re vẹ ọyen gbe kpo ẹga vẹ ihwo rẹ orere rọyen ọvo yen irivẹ rọyen. Jesu guọnọ yono ọshare nana uyono ọghanghanre ọvo,​—nẹ ofori ọ vwọ riẹn nẹ ọ dia ohwo ri Ju ọvo yen “ọrivẹ” rọye-en. (Luk 10:​36, 37) E si ikuegbe nana phiyọ Baibol na rere o se vwo fierere kẹ ihwoeje re guọnọ ru obo re vwerhen Ọghẹnẹ oma.​—2 Timoti 3:​16, 17.

Ikuegbe na djerephia nẹ omamọ rẹ ọrivẹ gbe arodọnvwẹ womarẹ obo ro ruẹ. Ọyen ohwo rọ vwẹ ukẹcha kẹ ohwo rọ rioja​—o toro ẹkuruemu, ohọroma yẹrẹ asan rẹ ohwo na nurhe-e. Omamọ rẹ ọrivẹ nene ihwo efa yerẹn kirobo rọ guọnọre nẹ ihwo nene ọyen yerin wan.​—Matiu 7:12.

Ihwo ri Sameria dia obohwẹre ọnre ri Judia. Ihwo ri Ju vẹ ihwo re dia ihwo ri Ju-u yehẹ orere na.

Vwẹ ẹgbukpe ujorin rẹsosuọ, jẹ ihwo ri Sameria reyọ ẹga romobọ rayen vwo mu re. Ayen rhiabọreyọ ẹbe iyorin rẹsosuọ rehẹ ẹbẹre ra vwẹ Hibru si vwẹ Baibol na, ẹkẹvuọvo ayen sen i ri chekọ na.

Buebun rẹ ihwo ri Ju vwẹ ọke ri Jesu vwo utuoma kpahen ihwo ri Sameria, ayen je rhọnvwa siẹkẹrẹ aye-en. (Jọn 4:9) Ihwo ri Ju tobọ reyọ “Ohwo ri Sameria” vwọ hanrhan ekan.​—Jọn 8:48.

Baibol na ghwe djephia sẹ obo re ghene phia dẹn yen itẹ na shekpahe-en. Ẹkẹvuọvo, ọke buebun yen Jesu vwọ reyọ ẹkuruemu ra nabọ riẹn vẹ asan rẹ ihwo nabọ vughe vwo ruiruo vwẹ uyono rọyen, rere ihwo re kerhọ kẹ sa vwọ fobọ vwo ẹruọ rọyen.

Ikuegbe djerephia nẹ erọnvwọn buebun re djunute vwẹ itẹ na pha gbagba. Kerẹ udje:

• Jerusalẹm vwẹ uroko 1 vwo kpenu vrẹ Jẹriko. Ọtiọyena, idjerhe rọhẹ uvwre ri Jerusalẹm vẹ Jẹriko sherabọ vwọ vrẹ iroko 20. Ikuegbe na djerephia gbagba nẹ ihwo yerẹn kpotọ vwo nẹ “Jerusalẹm kpo Jẹriko.”​—Luk 10:30.

• Ọkieje yen irherẹn vẹ ihwo ri Livae re dia Jẹriko vwọ wan idjerhe nana kpo Jerusalẹm.

• Ọke buebun na, iji siomanẹ vwẹ asan ro siuvun vwẹ idjerhe na, rẹ ayen vwọ hẹrhẹ ihwo re cha wanvrẹ​—marho ọ da dianẹ ohwo ọvo kpogono yen yan vwọ.