Baibol na kẹ avwanre uvi rẹ odjekẹ kpahen obo re brorhiẹn wan. Ọ sa cha avwanre uko vwo “vwo aghwanre [kugbe] evughe.” (Isẹ 4:5) Vwẹ ẹdia evo, ọ vuẹ avwanre orhiẹn ro me yovwin. Vwẹ ẹdia efa, ọ vwẹ uchebro re sa cha avwanre uko vwo bru omamọ orhiẹn vwọ kẹ avwanre.

Vwẹ uyovwinrota nana

•  Iroroẹjẹ re sa cha wẹ uko vwo bru omamọ orhiẹn

•  Ofori nẹ mi wene orhiẹn ri mi bru nure?

•  Kẹ ọ da dianẹ mi bru orharhe orhiẹn ri mi che se wene-e vwo?

•   Wo brokpakpa brorhiẹ-ẹn. Baibol na tare nẹ: “Ohwo ro vwo iroro obọ rọ ra ọye o nẹ.” (Isẹ 14:15) Wo de brokpakpa brorhiẹn, ọ sa nẹrhẹ wo jẹ evuẹ eghanghanre e no sua. Nabọ ghwọrọ ọke vwọ fuẹrẹn te eshe te evrẹn rẹ orhiẹn na.​—1 Tẹsalonaika 5:21.

•   Wo muẹ orhiẹn wẹn kpahan oborẹ oma ru we yẹrẹ iroro wẹn ọvo-o. Baibol na si avwanre orhọ nẹ a cha sa vwẹroso ubiudu rẹ avwanre ọkieje-e. (Isẹ 28:26; Jerimaya 17:9) Kerẹ udje, ọkiọvo avwanre che se bru omamọ orhiẹn ọke rẹ ophu de muẹ avwanre, avwanre de muomaphiyọ, ẹwẹn rẹ avwanre da kuọrọn, avwanre de brokpakpa yẹrẹ oma da tobọ ghwọrọ avwanre-e.​—Isẹ 24:10; 29:22.

•   Nẹrhovwo vwọ kẹ aghwanre. (Jems 1:5) Oma vwerhen Ọghẹnẹ rọ vwọ kpahenphiyọ ẹrhovwo tiọyena. Ọyen Ọsẹ ro vwo ẹguọnọ rọ guọnọre nẹ emọ rọyen vrabọ rẹ ebẹnbẹn ra sa kẹnoma kẹ. “Ọrovwohwo [“Jihova,” NW ] re kẹ ohwo aghwanre; unu rọye ọye erianriẹn vẹ ẹruọ nẹ cha.” a (Isẹ 2:6) Baibol na rọ dia Ota rọyen, yen idjerhe rẹsosuọ rọ wan kẹ ohwo aghwanre yena.​—2 Timoti 3:​16, 17.

•   Ru ehiahiẹ. Wo ki se bru omamọ orhiẹn, wọ guọnọ evuẹ ra sa vwẹroso. Kirobo ri Baibol na tare, “ọvwẹghwanren de nyo ọ me riẹn phihọ.” (Isẹ 1:5) Tivọ yen wọ da sa mrẹ omamọ rẹ evuẹ ra sa vwẹroso?

   Ẹsosuọ, ni oborẹ Baibol na komobọ ta kpahen ota nana. Kidie nẹ Ọmemama rẹ avwanre riẹn obo ri me yovwin kẹ avwanre, vwevunrẹ Ota rọyen kọyen a da sa mrẹ uchebro ra ma vwẹroso. (Une rẹ Ejiro 25:12) Vwọ kpahen orhiẹn evo, Baibol na nabọ dje obo re che ru phephẹn, ọkiọvo womarẹ irhi yẹrẹ iji. (Aizaya 48:​17, 18) Ẹkẹvuọvo vwọ kpahen eta efa buebun, Baibol na ghwe dje obo re che ru phephẹ-ẹn. Ukperẹ ọtiọyen, ọ vwẹ uchebro phia womarẹ odjekẹ sansan. Ọnana sa nẹrhẹ avwanre bru omamọ orhiẹn, je kẹ avwanre uphẹn rẹ avwanre vwọ jẹ obo ri mi je avwanre. Wọ sa vwọ mrẹ ẹkpo ri Baibol ri shekpahen orhiẹn ru wo che bru, ru ehiahiẹ vwẹ iyovwinreta sansan yẹrẹ erọnvwọn ra vwọ phia re mu kpahen Baibol na, kerẹ e rẹ wọ sa mrẹ ọphẹ vwẹ wẹbsaiti nana. b

   Vwọ kpahen orhiẹn evo, ọkiọvo o ji se fo nẹ wọ fuẹrẹn evuẹ vwẹ asan efa ra sa vwẹroso. Kerẹ udje, tavwen wọ ke dẹ orọnvwọn, ma rho ọ da dianẹ orọnvwọn na ghanre mamọ, ọyen emu rẹ aghwanre wo vwo ru ehiahiẹ kpahen orọnvwọn na, ohwo ro ruro, kugbe irhi ri shekpahen obo re cha phia siẹrẹ orọnvwọn na de miovwin yẹrẹ wọ da guọnọ reyọ rhivwin. Vwọrẹ uyota, o ji fo nẹ wo vwo imuẹro nẹ orọnvwọn na ghwa oka ru wọ guọnọre dẹn.

   Baibol na tare nẹ, “Ọvwiroro rha hẹ asa-an emu ejobi ko she chọ.” (Isẹ 15:22) Ọtiọyena tavwen wo ki brorhiẹn, vwẹ iroro vwọ nẹ ihwo ra sa vwẹroso. Kerẹ udje, ọyen emu rẹ aghwanre wọ vwọ riẹn mie ọbo vwọ kpahen orhiẹn ro shekpahen omaesivwo ru wọ guọnọ bru. (Matiu 9:12) Vwẹ ẹdia evo, wọ sa riẹn mie ihwo ri hirharoku oka rẹ ẹdia ru wo hirharoku na wanre. Ẹkẹvuọvo karophiyọ nẹ wẹwẹ yen che brorhiẹn na ji mu oghwa rẹ obo ri che nẹ obuko rọyen rhe, ọ dia ihwo ru wọ riẹn mie na-a.​—Galesha 6:​4, 5.

•   Roro kpahen te eshe te evrẹn rọyen. Vwo nene evuẹ ru wọ hiẹ mrẹ na, wo se si idjerhe sansan ru wo se brorhiẹn na wan phiyotọ, ọtiọyen ji te erhuvwu kugbe umiovwo ro se nẹ ọvuọvo rayen rhe. Wọ me ta uyota kẹ oma wẹn ọke wọ da fuẹrẹn obo ri se nẹ obuko rẹ orhiẹn wẹn na rhe. (Urhi Rivẹ 32:29) Kerẹ udje, die yen orhiẹn wẹn na sa so kẹ wẹ, ihwo rẹ orua wẹn, yẹrẹ ihwo efa? (Isẹ 22:3; Rom 14:19) Wo de roro kpahen enọ tiọyena vẹ oborẹ Baibol na tare, ku wo se brorhiẹn rẹ aghwanre ro ji dje ẹguọnọ phia.

•   Brorhiẹn na. Ọkievo avwanre se siomauko re vwo brorhiẹn kidie avwanre vwo imuẹro kpahen orhiẹn na-a. Ẹkẹvuọvo avwanre rhe brorhiẹn na-a, uphẹn sa va avwanre abọ yẹrẹ avwanre me rhe mrẹ oma rẹ avwanre vwẹ ẹdia ra guọnọre-e. Re vwo dje vwẹ idjerhe ọfa, ọyen emu rẹ ẹkpa re vwo jẹ orhiẹn ebro kirobo orharhe orhiẹn je dia emu rẹ ẹkpa. Baibol na reyọ ota rẹ udje rẹ ọghwẹrẹ vwo ruiruo, rọ vwọ tanẹ: “Wọ da hẹrhẹ ọke rẹ odju na vẹ aruọke na che vwo shephiyọ, o vwo ọke vuọvo wọ cha vwọ kọn yẹrẹ vun orọnvwọn vuọvo-o.”​—Aghwoghwo 11:​4, Good News Translation.

 Je karophiyọ nẹ orhiẹn rọ tobọ me yovwin kparobọ ji se jẹ ọ rọ gbare ẹdia. Ọke buebun ojẹ churobọ siẹ orọnvwọn re vwo ze. Vwọba, obo re rhẹro rọye-en je sa phia. (Aghwoghwo 9:11) Ọtiọyena gba reyọ evuẹ ri me yovwin re herọ vwo ruiruo, wọ me je sane ọ rọ cha ma wian vwẹ usun rayen.

 Ọ dia orhiẹn ejobi yen e je se wene-e. Ẹdia wẹn se wene, yẹrẹ wọ sa rhe mrẹvughe nẹ obo wo rhẹro rọye-en yen nẹ obuko rẹ orhiẹn wo bruru jovwo na cha. Ọtiọyena, ọ sa dia emu rẹ aghwanre wọ vwọ rhoma fuẹrẹn, ji bru orhiẹn ọfa rọ sa cha wẹ uko vwo ru oborẹ wọ guọnọre.

 Ẹkẹvuọvo, o vwo orhiẹn evo ro fori nẹ e wene-e. (Une rẹ Ejiro 15:4) Kerẹ udje, Ọghẹnẹ rhẹro rọyen nẹ ihwo re rọvwọnre che ru nene ive rẹ orọnvwe rayen. c (Malakae 2:16; Matiu 19:6) Ọke rẹ ebẹnbẹn da vwomaphia vwevwunrẹ orọnvwe, e jẹ a davwẹngba eje ra vwọ rhuẹrẹ ayen ukperẹ a vwọ fan orọnvwe.

 Vwẹ ọkievo, avwanre eje brẹ orharhe orhiẹn yẹrẹ orhiẹn rẹ aghwanre hepha-a. (Jems 3:2) Avwanre sa tobọ viẹ idiekpọvwẹ yẹrẹ vwo ẹwẹn rẹ abe, ọyen obo re sa phia. (Une rẹ Ejiro 69:5) Vwọrẹ uyota, iroro tiọyena rọ vrẹka-a ọyen obo ri shephiyọ ọ da dianẹ ọ cha avwanre uko re vwo jẹ echobọ tiọyena ẹvwanriẹn vwẹ ọke ọfa! (Isẹ 14:9) Ẹkẹvuọvo Baibol na bru avwanre uche kpahen ẹwẹn rẹ abe rọ vrẹka rọ sa so ofudjevwe kẹ ohwo je nẹrhẹ iroro rẹ avwanre yanghan. (2 Kọrẹnt 2:7) d Baibol na tare nẹ “Ọrovwohwo vọnre vẹ arodọvwẹ vẹ ehrọre.” (Une rẹ Ejiro 103:​8-13) Ọtiọyena davwẹngba vwo yono nẹ orharhe orhiẹn ru wo che se wene-e na rhe, wo mi ji ru oborẹ wo se ru eje vwo ru ẹdia na yovwinphiyọ.