E dje umwemwu re che se vwo ghovwoo phiyọ uruemu rẹ ohwo djephia siẹrẹ o de ru umwemwu nu, rọ sa nẹrhẹ o jẹ evwoghovwo ri Jihova evwo. Diesorọ a vwọ ta ọtiọyen?

 Ọghẹnẹ vwo ghovwo ihwo ri kurhẹriẹ nẹ imwemwu rayen, re vwẹ akpeyeren rayen eje vwo nene iwan rọyen, ri ji vwo esegbuyota kpahen Jesu Kristi. (Iruo rẹ Iyinkọn Na 3:​19, 20) Ẹkẹvuọvo, ohwo se muomaphiyọ umwemwu eruo tẹdia o rhe che vwo emu vuọvo rọ sa nẹrhẹ ọ dobọ rẹ umwemwu ro ruẹ na jii. Baibol na djisẹ rẹ ohwo tiọyena phiyọ ohwo ro vwo “ubiudu umwemwu” rẹ “ẹgba rẹ ophiẹnvwe rẹ umwemwu” rhi ru gan re. (Hibru 3:​12, 13) Kerẹ ọphiẹn re mu phiyọ erhanre ra cha sa ma phiyọ orọnvwọn ọfaa, ọtiọyen yen ubiudu ohwo yena hepha, o rhe che se nene idjerhe Ọghẹnẹ ọfaa. (Aizaya 45:9) O vwo emu vuọvo rọ sa nẹrhẹ e vwo ghovwo ohwo tiọyenaa, kidie o ru umwemwu re che se vwo ghovwoo.​​—Hibru 10:​26, 27.

 Vwẹ ọke ri Jesu, ilori rẹ ẹga evo re dia ihwo ri Ju ru umwemwu re che se vwo ghovwoo. Ayen riẹnre nẹ womarẹ ẹwẹn ọfuanfon rẹ Ọghẹnẹ yen Jesu vwo ru igbevwunu ro ruru na, dedena ayen da vwẹ ẹwẹn rẹ ọkon vwọ tanẹ obọ rẹ Eshu rọ dia Idẹbono yen ẹgba rọyen nurhe.​​—Mak 3:​22, 28-​30.

Eka rẹ imwemwu re se vwo ghovwo

•  Eta rẹ ẹgua ra tare vwọrẹ jẹriẹn. Ọyinkọn Pọl ọyen ohwo rọ ta eta rẹ ẹgua jovwo re, ẹkẹvuọvo ọ da ta ukuko na: “E gbe arodọnvwẹ kẹ vwẹ kidie mi ru enana vwọrẹ jẹriẹn kugbe jẹ esegbuyota evwo.”​​—1 Timoti 1:13.

•  Igberadja. Baibol na djunute ihwo evo ri gbe igberadja vwẹ ọke evo re wanre, ẹkẹvuọvo ayen vwo kurhẹriẹ Ọghẹnẹ de vwo ghovwo ayen.​​—1 Kọrẹnt 6:​9-​11.

“Mi ru umwemwu re che se vwo ghovwoo na?”

 Wọ da viẹ idiekpọvwẹ kpahen umwemwu wo ru wanre je guọnọ wene obọ, kọyen ọ dia umwemwu re che se vwo ghovwoo na yen wo ruruu. Ọghẹnẹ se vwo ghovwo uwe ọ da tobọ dianẹ wo ru umwemwu ọvo abọ buebun re, siẹrẹ ubiudu wẹn rhe ghwu timẹ kpahen idjerhe rọyeen.​​—Aizaya 1:18.

 Ihwo evo se roro nẹ ayen ru umwemwu re che se vwo ghovwoo na, kidie ẹwẹn obrorhiẹn rayen kpokpo ayen fikirẹ umwemwu rẹ ayen ru wanre. Ẹkẹvuọvo, Baibol na vuẹ avwanre nẹ a cha sa vwẹroso ubiudu avwanre ọkiejee. (Jerimaya 17:9) Ọghẹnẹ kẹ avwanre uturhi a vwọ reyọ ohwo vuọvo vwo guẹdjọọ, tobọ te oma rẹ avwanre dede. (Rom 14:​4, 12) O se vwo ghovwo avwanre ọ da tobọ dianẹ ubiudu avwanre brorhiẹn hwe avwanre.​​—1 Jọn 3:​19, 20.

Judas Iskariọt ru umwemwu re che se vwo ghovwoo na?

 E, o ruro. Urhuru evwo rọyen nẹrhẹ o cho igho re torori vwọ kẹ iruo rẹ ẹga na. Ọ tobọ ru kerẹsiẹ ra da mrẹ nẹ o vwo ọdavwẹ rẹ ivwiogbere, jẹ obo rehẹ ẹwẹn rọyen yen o vwo cho igho ba igho ro chori jovwo re na. (Jọn 12:​4-8) Ọke rẹ ubiudu ri Judas vwo ghwu timẹ re, ọ da vwẹ fikirẹ idọnọ efuanfon 30 vwọ shẹ Jesu. Vwọ kpahen obo ri Judas ruru na, Jesu riẹnre nẹ o che se kurhẹriẹ nẹ otọ rẹ ubiudu rọyen rhee, ọtiọyena o de se “ọmọ rẹ oghwọrọ na.” (Jọn 17:12) Ọnana mudiaphiyọ nẹ Judas de ghwu, jẹ o re kẹ, o rhe che vwo iphiẹrophiyọ rẹ evrẹnushi naa.​​—Mak 14:21.

 Judas dje okurhẹriẹ ro nẹ otọ rẹ ẹwẹn rhe kpahen umwemwu rọyen naa. Ukperẹ ọ vwọ fan umwemwu rọyen vwọ kẹ Ọghẹnẹ, ọ da fan umwemwu rọyen kẹ ilori rẹ ẹga re vẹ ọyen gba jiroro kugbe na.​​—Matiu 27:​3-5; 2 Kọrẹnt 7:10.