‘Ko che rien ameoviẹ eje vwo nẹ ẹro rayen, ughwu rha cha dia ọfaa, uvweri yẹrẹ oviẹ yẹrẹ ọmiaovwẹ rha cha dia ọfaa. Erọnvwọn awanre na wanvrẹ re.’​—⁠Ẹvwọphia 21:​4, Efanfan rẹ Akpọ Kpokpọ.

 “Ko che ririe ameoviẹ eje nẹ ẹro rayen, ughwu gbe cha dia ọfaa, uvweri eyẹ oviẹ eyẹ ọmiaovwẹ rha cha dia ọfaa, kidie emu rẹ awanre na wanvrẹ nure.”​—⁠Ẹvwọphia 21:​4, English Standard Version.

 Ọ dia Ọghẹnẹ veri nẹ ọyen che si ọmiaovwẹ vẹ oja rẹ ihworakpọ ria no ọvoo, ẹkẹvuọvo o ji ve nẹ ọyen che si obo re so ebẹnbẹn na eje no.

 “Ko che rien ameoviẹ eje vwo nẹ ẹro rayen.” Eta nana rhọnvwephiyọ ive ri Jihova a rẹ ọmraro Aizaya si phiyotọ rọ tare nẹ, “Ko che ririe ameoviẹ eje nẹ ẹro rayen.” (Aizaya 25:8; Ẹvwọphia 7:17) Ota yena dje ẹguọnọ rẹ Ọghẹnẹ vwo kpahen ihwo re viẹ fikirẹ ihwo rayen ri ghwuru yẹrẹ erọnvwọn efa re so oja vwọ kẹ ayen.

 ‘Ughwu gbe cha dia ọfaa.’ Ota nana ji se mudiaphiyọ nẹ “ughwu rha cha dia ọfaa” yẹrẹ “o vwo ohwo vuọvo ro che ghwu ọfaa.” Ọghẹnẹ veri nẹ ọyen che si ughwu vẹ oja rọ ghwa cha no. Vwọba, evrẹnushi rẹ ihwo ri ghwuru cha dia. (1 Kọrẹnt 15:​21, 22) Ọtiọyena ‘ke che siẹ’ ughwu no.​—⁠1 Kọrẹnt 15:⁠26.

 ‘Uvweri yẹrẹ oviẹ yẹrẹ ọmiaovwẹ rha cha dia ọfaa.’ Ọ dia ive ri Jihova mudiaphiyọ nẹ oma rẹ ihworakpọ che ghwodirhẹ vwọ kẹ emiavwe evoo kidie emiavwe evo nẹrhẹ a kẹnoma kẹ imuoshọ yẹrẹ obo re sa wan ohwo oma. Ukperẹ ọtiọyen, ive nana mudiaphiyọ nẹ Ọghẹnẹ che si emiavwe eje rẹ umwemwu b vẹ jẹgba ghwa rhe no.​—⁠Rom 8:​21, 22.

 “Erọnvwọn awanre na wanvrẹ re.” Okuphiyọ rẹ owọrota nana ruẹ ọdjẹkoko rẹ ewene rẹ ihworakpọ che rhiẹromrẹ. Ọbe ọvo ra rionbọra da ta: “A cha reyọ akpọ kpokpọ vwo wene akpọ rẹ awanre nana rẹ ughwu, uvweri, oviẹ vẹ emiavwe vọnre rẹ ihworakpọ sa vrabọ rọyen naa.” Ihworakpọ ki che yeren akpọ rẹ omavwerhovwẹn vwẹ otọrakpọ na bẹdẹ, kirobo rẹ Ọghẹnẹ guọnerọ vwo nẹ ọtonphiyọ rhe.​—⁠Jẹnẹsis 1:​27, 28.

 Vwẹ ọtonphiyọ rẹ uyovwin 21, ọyinkọn Pọl djisẹ rẹ obo rọ mrẹre vwẹ emramrẹ ọvo rọ vwọ ta: “Me da mrẹ odjuvwu kpokpọ kugbe akpọ kpokpọ.” (Ẹvwọphia 21:⁠1) Ọ reyọ eta rẹ udje vwo dje ewene rode re cha vwomaphia vwẹ obaro na, rẹ awọreta ri Baibol efa je ta ota kpahen. (Aizaya 65:17; 66:22; 2 Pita 3:13) Usuon rẹ Ọghẹnẹ rọhẹ odjuvwu, yẹrẹ “odjuvwu ọkpokpọ” na, che wene usuon rẹ ihworakpọ eje ji sun “akpọ kpokpọ” na, kọyen ihwo re cha dia otọrakpọ na vwẹ ọke yena.​—⁠Aizaya 65:​21-23.

 Die yen djerephia nẹ emramrẹ na shekpahen oborẹ akpeyeren cha dia vwẹ otọrakpọ vwẹ obaro na? Ẹsosuọ, Ọghẹnẹ ton ive rọyen na phiyọ vẹ eta nana: “Utughẹ rẹ Ọghẹnẹ vẹ ihworakpọ herọ.” (Ẹvwọphia 21:⁠3) Kọyen o ve ive nana vwọ kẹ ihworakpọ, ọ dia emekashee. Ọrivẹ, aroẹmrẹ nana djisẹ rẹ akpọ rẹ ‘ughwu rha cha dia ọfaa.’ (Ẹvwọphia 21:⁠4) Otọrakpọ na yen ihworakpọ de ghwẹ, ọ dia odjuvwuu. (Rom 5:14) Ọtiọyena, ọ gbare a da tanẹ owọrota nana djisẹ rẹ oborẹ otọrakpọ na cha dia vwẹ obaro na.

 Nughe rẹ ividio ọkrẹkrẹ nana, wọ mrẹ ọdjẹkoko rẹ ọbe rẹ Ẹvwọphia.