Vwo nene ehiahiẹ ọvo re ruru, ẹkẹn 80 rẹ ighene vwẹ America nẹrhovwo, ẹkẹvuọvo ẹkẹn ọvo rayen yen nẹrhovwo kẹdẹ kẹdẹ. Aphro herọ-ọ, evo usun rayen se roro: ‘Ẹrhovwo ghwa obo re sa nẹrhẹ udu rẹ ohwo totọ, gbanẹ ọ vrẹ ọtiọyen?’

•  Die yen ẹrhovwo?

•  Ọghẹnẹ kerhọ rẹ ẹrhovwo?

•  Die yen me sa nẹrhovwo kpahen?

•  Oborẹ edje wẹn tare

 Ẹrhovwo ọyen idjerhe avwanre vẹ Ọmemama na vwọ ta ota kugbe. Di roro oborẹ ọyena mudiaphiyọ! Jihova rho vrẹ ihworakpọ vwẹ idjerhe kidjerhe, dede na “yo sheri kẹ avwanre ohwo ọvuọvo-o.” (Iruo Rẹ Iyinkọn Na 17:27) Vwọrẹ uyota, Baibol na da durhie avwanre: “Si kẹrẹ Ọghẹnẹ, rere o si kẹre owẹ.”—Jems 4:8.

 Mavọ yen wo se vwo sikẹrẹ Ọghẹnẹ?

•   Idjerhe ọvo yen womarẹ ẹrhovwo—wọ vwọ ta ota kẹ Ọghẹnẹ.

•   Idjerhe ọfa ọyen womarẹ uyono ri Baibol—Ọghẹnẹ wọ “ta ota” kẹ wẹ.

 Otaẹtakuẹgbe tiọyena, kọyen ẹrhovwo vẹ uyono ri Baibol cha chọn wẹ uko vwo ru oyerinkugbe wẹn vẹ Ọghẹnẹ ganphiyọ.

 “A vwọ ta ota kẹ Jihova. Avwanre vẹ Ọromekpenu na vwọ ta ota kuẹgbe ọyen uphẹn rọ ma rho rẹ ihworakpọ se vwo.”—Jeremy.

 “Me vwọ ta ẹwẹn mẹ kẹ Jihova womarẹ ẹrhovwo nẹrhẹ mi siẹkẹrẹ phiyọ.”—Miranda.

 Ọ da tobọ dianẹ wo vwo imuẹro kpahen Ọghẹnẹ, wọ da tobọ nẹrhovwo rhe, ọ sa bẹn wọ vwọ rhọnvwe nẹ ọ ghene kerhọ. Dedena, Baibol na se Jihova ‘Ọ ro nyo ẹrhovwo na!’ (Une Rẹ Ejiro 65:2) Ọ tobọ tanẹ wọ “vwẹ ẹnwan wẹn ejobi vwọ ya.” Diesorọ? “Kidie ọye re vwẹ ẹro te we.”—1 Pita 5:7.

 Obo re roro kpahen: Wẹ vẹ ugbeyan wẹn sa mrẹ ọke vwọ ta ota kuẹgbe ọkieje? Wẹ vẹ Ọghẹnẹ se ji ru ọtiọyen. Ta ota kẹ vwọrẹ ẹrhovwo, wo ji ru ọtiọyen womarẹ odẹ rọyen, Jihova. (Une Rẹ Ejiro 86:5-7; 88:9) Vwọrẹ uyota, Baibol na durhie uwe nẹ wọ “nẹ ẹrhovwo kẹdẹ kẹdẹ.”—1 Tẹsalonaika 5:17.

 “Ẹrhovwo ọyen otaẹtakuẹgbe vwẹ uvwre mẹ vẹ Ọsẹ mẹ rọhẹ obo odjuvwu, rọ dia ohwo me ta ẹwẹn mẹ eje kẹ.”—Moises.

 “Oborẹ erọnvwọn na eje phia wan yen mi vuẹ Jihova, kirobo re me cha vuẹ oni mẹ yẹrẹ ugbeyan rọ kẹrẹ ovwẹ.”—Karen.

 Baibol na da ta: “Wa ro ẹnwan rẹ emuọvo-o, ẹkẹvuọvo vwi kemu kemu orẹ kugbe oyare kugbe ẹkpẹvwẹ ta ọdavwẹ wẹn kẹ Ọghẹnẹ.”—Filipae 4:6.

 Kẹ, ọyena mudiaphiyọ nẹ OYOMA wọ vwọ nẹrhovwo kpahen ebẹnbẹn wẹn? E! Baibol na da ta: “Mu oghwa wẹn nyẹ Ọrovwohwo, kọ sẹro we.”—Une Rẹ Ejiro 55:22.

 Vwẹ ẹrhovwo wẹn, ofori nẹ wọ ta eta efa re fẹnẹ ebẹnbẹn wo hirharokuẹ. Aye ọvo re se Chantelle da ta: “Ugbeyan mẹ vẹ Jihova che vwo otọ-ọ, ọ da dianẹ ukẹcha ọvo me nokpẹn rọyen mie. Mi niro nẹ ẹsosuọ ofori nẹ me ka kpẹvwẹ Jihova vwẹ ẹrhovwo mẹ, erọnvwọn me je kpẹvwẹ kẹ me dia buebun.”

 Obo re roro kpahen: Ọrhọ yen erọnvwọn evo vwẹ akpeyeren wẹn wọ cha kpẹvwẹ kẹ? Wo se roro kpahen erọnvwọn erha wọ sa vwọ kpẹvwẹ Jihova kẹdẹ kẹdẹ?

 “Erọnvwọn tutuno dede, kerẹ ododo oyoyovwin se mu avwanre vwọ kpẹvwẹ Jihova vwọrẹ ẹrhovwo.”—Anita.

 “Roro kokodo kpahen emama ri je we yẹrẹ vwẹ ẹkpo ri Baibol ri ghini te ẹwẹn wẹn rere wọ kpẹvwẹ fikirẹ rayen.”—Brian.